Select Page

Ataatsimiinneq 2/10

Qupperneq 1/4: Attaveqariaatsimut ilisimasanik tunngaviusumik paasinninneq: ilissi ilaqutariittut paarsisartutut sulinissinni tunngavigisarsi

Attaveqariaatsimut ilisimasanik tunngaviusumik paasinninneq:
Ilissi ilaqutariittut paarsisartutut sulinissinni tunngavigisarsi

 

    Ataatsimiinneq 2, attaveqariaatsimut tunngatillugu ilisimasanik tunngaviusumik paasinninnermut tunngasoq, angajoqqaarsiat isumassuisullu tamarmik ilisimasariaqagaannik tunniussivoq. Oqariartaatsinut toqqissisimasumik aallaaveqarneq, attaveqaateqarfigisanut pissusilersuutit aamma misileraalluni pissusilersuutit ilissinnut ilisaritinneqassapput.

    Piginnaasat ineriartortinneqartussat:

    • Attaveqariaatsimut tunngatillugu ilisimasat qanoq meeqqat inuusuttullu misigissutsikkut inooqataanermilu ineriartornerannut isumaqarneranik paasisaqarnissaq.
    • Ulluinnarni attaveqarfigisanut pissusilersuutit toqqissisimanartut qanoq takutinneqartarnerannik ilisimasat.
    • Meeqqat inuusuttullu toqqissisimaffimmiik misilittaanermut uteqattaartumik qanoq pissusilersortarnerannik ilisimasat, angajoqqaarsiatullu qanoq meeqqamut toqqissisimaffisamik pilersitsisinnaanermik ilisimasat, meeqqallu pinnguarusussuseqarneranut ilikkarusussuseqarneranut suleqataarusunneranullu tapersersuinissamik ilisimasat.

    Ataatsimiinnermi qulequtaq:

    Uani ataatsimiinnermi matumani kingullermik ataatsimiinnermi ilikkakkavut sulissutigissavagut, tassaasut ilissi nammineq meeraanissinni avissaartarnerit sapernartut qanoq misigisimanerisi. Taamaasilluni attaveqariaatsimut tunngatillugu ilisimasat ullumikkut sulissutigisassavut paasiuminarnerulissammata. Ilisimasat taakku tassaapput meeqqanik inuusuuttunillu – aamma ilissi nammineq meeqqassinnik – sullissinermi tunngaviunerpaasut – ilisimasallu taakku paasiuminartuupput. Attaveqariaatsimut tunngatillugu ilisimasat tassungalu tunngatillugu toqqissisimasumik inersimasunut attaveqariaatsimut paasinnittaaseq, paasisassarsiorsinnaanermut ilikkagaqarniarsinnaanermut inooqataasinnaanermullu piginnaasanut paasinnittaatsit ataatsimiittarnissatta sinnerini meeqqanillu paarisanik sullissinissinni tunngaviussapput: 

     

    • Attaveqaateqarfigisanut pissusilersuutit suuppat, aamma meeqqani inuusuttunilu toqqissisimanermik ujartuisuni taakku qanoq takuneqarsinnaasarpat? 
    • Angajoqqaarsiat qanoq meeqqamut toqqissisimaffik pilersissinnaavaat?
    • Meeqqamut toqqissisimaffik pilersinneqareerpat, taava meeqqat inuusuttullu misilittaarusussuseqarnerat qanoq tapersersorneqarsinnaava?: pinnguarnissamut ilikkagaqarnissamullu kajumissusaat, aamma meeqqanik allanik ikinnguteqalernissamut piginnaasaat?

    Ataatsimiinnermi anguniakkat:

    • Attaveqariaatsimut ilisimasat paasinissaat ataatsimiinnermi matumani siunertaavoq, taamaasilluni ilissi meeqqat toqqissisimalersinnissaat ineriartornerisalu qulakkeernissaannut piginnaasasi ineriartortissagassigit. Meeqqat nalinginnaasumik ineriartortarnerat kiisalu meeqqat inuusuttullu pissusilersuutimikkut ajornartorsiutaat inuunerminni ukiuni siullerni pingasuni pitsaasumik naammaginanngitsumilluunniit isumassorneqarsimanerannit annertuumik aalajangerneqartarnerat paasissallugu pingaaruteqarpoq.

     

    • Meeqqat, inuunerminnik artorsaateqarlutik angajoqqaaqartut, amerlasuutigut ulluinnarni isumassorneqartanngillat, annaasaqarnermik inersimasullu paarlakaannerannik misigisarpassuaqartarlutik. Tamanna pissusilersuutitigut ajornartorsiuteqalersitsisinnaavoq, ilissinnullu paarsisartutut angajoqqaajusunut attuumassuteqalernissaq ajornartorsiutigisinnaallugu. Taamaattumik meeqqap paarisap inooqataanikkut misigissutsikkullu ineriartorneranut ilissi piffissami sivisuumi naammagittarlusi toqqissimasumik attaveqarniarnermut pissusilersuutinik takutitsisinnaanersi apeqqutaalluinnarpoq.