Immikkoortoq 3/8

Attaveqarnermi pissusilersuutit assigiinngitsut sisamat

Piginnaasat ineriartortitassat:

• Meeqqani inuusuttunilu attaveqarnermi pissusilersuutip toqqissisimasup ilisarisinnaanissaa
• Meeqqani inuusuttunilu attaveqarnermi pissusilersuutip toqqissisimanngitsup niguisullu ilisarisinnaanissaa
• Meeqqani inuusuttunilu attaveqarnermi pissusilersuutip toqqissisimanngitsup arlariinnik pissusillip ilisisarisinnaanissaa
• Meeqqani inuusuttunilu attaveqarnermi pissusilersuutip toqqissisimanngitsup innarlernikup ilisarisinnaanissaa
• Ilisimassallugu, meeqqat inuusuttullu toqqissisimanngitsumik attaveqarnermik ineriartortitsisimasut, taamaattumillu inersimasunut tatiginninngitsut qanoq atassuteqarfiginissaat.
• Toqqissisimanngitsumik attaveqalersimasut qanoq sulissutigineqarnissat pilersaarusiussallugu.

Immikkoortumi sammisaq::

Immikkoortumi matumani suliarissavasi attaveqarnissanut ajornartorsiutit siusissukkut malugisassaanersut ilisarisassaanersullu – ilikkagaqarsinnaanermut annikillisimasutut kiisalu inersimasunik peqatipajaanillu nutaanik atassuteqalernissamut annikitsumik piginnaasaqartutut takutittarput. Piginnaasat taakku annertuumik pitsanngorsarneqarsinnaapput, meeqqat ilissinniit piffissami sivisuumi toqqissisimasumik isumassuinermik pissusilersorfigineqarnermik misigisaqarunik. Toqqissisimanngitsumik attaveqalersimasut atassuteqarfiginissaannut qanoq sulissanersusi siunnersuuteqartoqassaaq.

Immikkoortumi anguniagaq:

Kalaallit Nunaanni meeqqat inuusuttullu amerlasoorpassuit siusissukkut amerlasuunik artorsartitaasimasarput: inorluni inuuneq inunngornermilu oqippallaarneq, naartunermi imigassamik ajoqusernerit qaratsap ineriartorneranut sunniuteqarsinnaasut, angajoqqaanit ajornartorsiutilinnit toqqissisimanartumik isumassorneqarnissamut amigaateqarneq, imaluunniit isumassuisut taarseraattut kiisalu inissinneqarnerit amerlavallaat.

Aarlerinaatit taakku ataatsimut meeqqani inuusuttunilu toqqissisimananngitsumik attaveqartarnermi ineriartornernik pilersitsisinnaapput, agguaqatigiissillugu kisitsisaasunit annertunerujussuarmik. Ima artorsartitsipput, inoqatinut atassuteqarnermi ilaallutik kiisalu ataqatigiinnermik nalinginnaasumik qanoq aqutsisinnaaneq. Tamanna meeqqanut sullissisuinullu annertuumik ajornakusoortitsisarpoq, kiisalu eqimattanut peqataaffimminnut ajoqusikkajuttarlutik. Ajoraluartumik pissusilersuutaat taamaannermisut takuneqarneq ajorput: isumassorneqarnissamik misiliigaluarneq iluatsinngitsoq. Taamaattumik pingaaruteqarpoq taama isumaqarluni naapissallugit, aamma pissusilersuutaat ajorsitsaarisinnaagaluartoq.