Ataatsimiinneq 6/10

Piginnaasat ineriartortinneqartussat:

• Paarineqarneq peqatigisaanillu ilaqutaveqarneq pillugu ammasumik oqaloqatigiinnernik pilersaarusiornermut ingerlataqarnermullu piginnaasat
• Meeqqap inuusuttulluunniit angajoqqaaviisa atugaannik paasinninneq
• Nammineq inuunerup oqaluttuassartaanik oqaluttuarnikkut nammineq inuunermit misilittakkat nukissatut atorneqartarnerat (oqaluttuat assersuutissaalluartut).

Ataatsimiinnerup qulequtaa:
Ilinniartitsilluni ataatsimiinnermi matumani meeqqat imminnut pitsaasumik isigilernissaannut imminnullu tatigilernissaannut ikiornissaat siullertut anguniassallugut sulissutigissavarput. Meeqqat inuusuttullu toqqissisimananngitsumik tunuliaquteqarnerminnik qanoq aqutsisinnaanerannut kiisalu imminnik tunuliaqutiminnillu pitsaasumik isiginnilersinnaanerannut sakkussanik ataatsimiinnermi pissarsitinneqassaasi.

Ataatsimiinnermi anguniakkat:
Meeqqat tunuliaqutiminnik paasinninnissaannut ikiornerisigut imminnik ajunngitsumik isiginnilernissaannut ikiornissaat ataatsimiinnermi matumani anguniakkat siullersaraat. Meeqqatut inuusuttutulluunniit inissinneqarsimasuugaanni, toqqissisimanangitsumik tunuliaquttami sumiiffissiorneq aaqqinneqarsinnaanngitsutut aaqqiagiinngissutaasinnaavoq: kinaavunga, inuunermilu sussaanga? Meeqqat inissinneqarsimasut amerlaqisut atuarnerminnik iluatsitsinngitsoortarnerannut inersimasuunerminnilu pitsaasumik inuuneqalertannginnerannut tamanna pissutaasut pingaarnersaraat. Meeqqat inuusuttullu kinaassutsiminnik ineriartortitsinerannik tapersersorniarlugit angajoqqaaviusunut attaveqarnerup suleqateqarnerullu qanoq aqunneqarsinnaanerat sulissutigissavarput. Angajoqqaarsiat angajoqqaaviillu akornanni isumaqatigiittoqarnera ataqqeqatigiittoqarneralu misigissallugu meeqqamut inuusuttumullu pingaaruteqarpoq.