Ataatsimiinneq 3/10

Attaveqaatigisanut pissusilersuutit assigiinngitsut sisamat

Piginnaasat ineriartortinneqartussat:

• Meeqqani inuusuttunilu attaveqaateqarfigisanut toqqissisimasumik pissusilersuutit ilisarisinnaassallugit

• Meeqqani inuusuttunilu akuliutsitaanaveersaarnermik toqqissisimanngitsumik attaveqaateqarfigisanut pissusilersuutit ilisarisinnaassallugit

• Meeqqani inuusuttunilu toqqissisimanngitsumik arlariinnik isumalimmik attaveqaateqarfigisanut pissusilersuutit ilisarisinnaassallugit

• Meeqqani inuusuttunilu toqqissisimanngitsumik aaqqissugaanerliortumillu attaveqaateqarfigisanut pissusilersuutit ilisarisinnaassallugit

• Meeqqanut inuusuttunullu toqqissisimanngitsumik attaveqaateqarfigisanut ineriartortitsisimasunik, taamaattumillu inersimasunik tatiginninngitsunik qanoq attaveqartalernissarsi ilisimassallugu.

• Meeqqat inuusuttullu qanoq ilillusi toqqissisimasumik naapissinnaanerisi ilisimassallugu, taamaasillutik toqqissisimasumik attaveqartarneq kigaatsumik ineriartortissammassuk.

Ataatsimiinnerup qulequtaa:

Ataatsimiinnermi matumani attaveqaateqarfigisanut ajornartorsiutit siusissukkut pisut qanoq takuneqarsinnaanersut ilisarineqarsinnaanersullu sulissutigissavarput, kiisalu meeqqat paarisat ilaanneeriarlutik attaveqaateqarfigisanut ileqqut toqqissisimananngitsut ineriartortittarneraat paasiniassallutigu. Meeqqat angajoqqaani paarsisartuni attaveqaateqarfigisanut pissusilersuutit toqqissisimanartut piffissami sivisuumi misigisimagunikkit, taakku ilorraap tungaanut aallartinneqarsinnaapput. Meeqqat attaveqaateqarfigisanut nalorninartunik ileqqullit qanoq sulissussinnaanerisi siunnersuutigineqassaaq.

Ataatsimiinnermi siunertat:

Kalaallit Nunaanni meeqqat inuusuttullu amerlaqisut siusissukkut artukkigaasarsimapput: inunngujaarpallaarlutik inunngornerminnilu oqippallaarlutik, naartuunerup nalaani imigassamik ajoqusigaallutik, sumiginnagaallutik, paarlakaattunut inissitaasarlutik atornerlugaasarlutillu. Aarlerinaatit tamakku tamarmik kattullutik meeqqani inuusuttunilu attaveqaateqariaatinik toqqissisimananngitsunik kinguneqarsinnaapput, meeqqani nalinginnaasumik annertunerujussuusumik. Ilissinnik peqateqariaasiat artukkiisarpoq, inunnillu allanik nalinginnaasumik peqateqariaasiat artukkiisarluni. Tamanna meeqqanut angajoqqaarsianullu annertuumik ajornartorsiortitsisarpoq, kiisalu ilaqutariit meeqqallu ulluinnarisaanni amerlanertigut annertuumik eqqissiviitsitsisarluni. Ajoraluartumilli pissusilersuutaat pissusivimmisut isiginiarneqarneq ajorpoq: isumassorneqaqqugaluarnermut kukkusumik periuseqarneq. Taamaattumik meeqqat inuusuttullu taamatut isummiussaqarluni naapinneqarnissaat angajoqqaarsisartutut pingaaruteqarpoq. Attaveqaateqarfigisanut pissusilersuutit toqqissisimananngitsut ilusaat ilisimasaqarfigissallugu pingaaruteqarpoq, ilisimallugulu meeqqani paarisani attaveqarneq toqqissisimanerusoq qanoq tapersersorneqarsinnaanersoq.