Ataatsimiinneq C/10

Paarsineq atorunnaarpat inuusuttoq inuulluaqqullugu fiisternermik aaqqissuussinissaq isumassarsiatsialaavoq – soorlu inuusuttut apersortikkaangata malunnartinniarneqartartoq inerisimasunngoriartulersut, taamatullu nuannaarutigineqarnermikkut ilaqutariillu inuunerannut sunik tunniussaqarsimanertik allallu inuunerannut qanoq pingaaruteqartiginertik tusaraangamikku nukissaqalernerusarput.

Fiistertinnasi assit, videokkut immiussat inuttullu immiussat allat katersorsinnaavasi, fiisternermilu inuusuttumut tunniussinnaallugit.

Ilaqutariinni paarsisartuni inoqutigiit tamarmik fiistimut pilersaarusioqataasinnaapput. Angajoqqaarsiat arlaat inuusuttup imminerminut ilaqutariinnullu qanoq pingaaruteqarsimanera nukittuffiillu suut inuusuttup ineriartortissimanerai pillugit oqalugialaarsinnaavoq.

Inuit pingaaruteqartut allat qaaqquneqarsinnaapput: qanigisat, ilinniartitsisut perorsaasullu, ajornanngippallu qinnuigalugit inuusuttoq ilaqutariinnit nooreeriarpat periarfissaqartillutik ikiortaqqullugu.