Immikkoortoq 1/8

Atortut sulinermi qanoq atussavagut?

Ilinniaqqinneq nunarpassuarni ilissitut sulisunik ingerlatsisunillu inerisarneqarlunilu misilittarneqarsimavoq. Sumiiffinni oqaatsit assigiinngitsorpassuit atorlugit piuvoq, tamatigut atuisut suleqatigalugit inerisarneqartarluni.

Ingerlaneq ineriartortitsinermik psykologimi ilisimatusarnermik kiisalu suliffimmi suleqatigiissinnermik ilisimatusarnermi tunngaveqarpoq. Ilisimasat taakku innersuussutinut, eqimattakkaarnernut, siunnersuutinut sungiusarnernullu allanngortinneqarput. Immikkoortuni peqataasut ilitsersuisorlu ataatsimut suleqatigiissapput, ilitsersuisup atortussat saqqummiussai tunngavigalugit. Peqataasut ulluinnarni misilittagaat siunnersuutaallu ingerlanermi pingaaruteqarput.

Immikkoortut naaneranni tamatigut peqataasut sulinissamut pilersaarusiortassapput: immikkoortumi suliarisimasaminnik qanoq naammassinnissappat. Immikkoortup tulliata aallartinnerani sulinermi qanoq iliorsimanermi misilittakkat avitseqatigiissutigineqassapput.

Immikkoortumi ilisimasat taamaallaat iluaqutaassapput, ulluinnarni sulinermi atorneqarunik. Ilissi sulisutut kiisalu ilitsersuisorsi ataatsimoorlusi aalajangissavarsi, immikkoortut akornanni sulinersi ineriartortillugulu misileraavigisinnaanerlugu.

Ilitsersuisoq immikkoortunut tamanut atuakkamik najoqqutassamik peqarpoq kiisalu atortussat saqqummiunnissaanut oqallinnerillu aqunnissaannut akisussaasuuvoq, ilissili peqataasutut siunnersuutit ulluinnarni sulinissinni timitalersinnaavasi. Tamanna immikkoortut akornanni sulinerup pingaaruteqarneranut tunngaviuvoq.
Immikkoortut aallartinneranni tamatigut imaqarniliortussamik toqqaasassaasi, suut oqallisigineqarsimanerannik, sulisut kiisalu ilitsersuisup aalajangersimasaanik kiisalu immikkoortup tulliata aallartinnginnerani suliassat suut naammassineqareersimassanerinik oqaaseqatigiit naatsunngorlugit allattuisussamik. Ass. meeqqanik pissusilersornikkut ajornartorsiuteqartunik siunertalimmik sulineq.
Inuit, siunertarisamik ineriartortitsisut, pitsaasumik isumassuinermi ilinniartitsinermilu ilisimatusarnermut annertuumik ilisimasaqarput, kisiannili ilissi suliffissinni meeqqat inuusuttullu ataasiakkaat pillugit ilisimasasi piginngilaat. Taamaattumik atuartitsinermi imarisat tassaanngillat, alanngaaginnarlugit imaluunniit misilerarnagit ilikkarsinnaasasi: Sulisut ilitsersuisorlu nammineerlutik aalajangiisariaqartassapput kiisalu piffissap ingerlanerani nammineerlutik iliuusissaminnik sungiusartariaqartassallutik, taamaasilluni ulluinnarnut pisariaqartitanullu tulluussaasoqassalluni. Ataatsimut suliasi naleqqussarnissaat, siunertalernissaat pissanganarnerulernissaallu anguniagaavoq.

Ilissi sulisutut ima naatsorsuutigineqarpusi:

• Atortussat paasinissaannut immissinnut ikiussasusi. Ulluinnarnit assersuuteqarsinnaavusi
• Paasinnilluarniarlusi oqallisigisassaqartariaqarussi ilitsersuisoq unitsikkallaqqusassagissi.
• Eqimattakkaarluni oqallisigisaqarnerni oqaloqatigiinnernilu tamassi peqataasarnissarsi – eqqarsaatisi anissigit, isummasi pingaaruteqarput.
• Immikkoortut akornanni suleriutsit nutaat misilittassagisi kiisalu meeqqanik isiginnittariaatsinik isumassuisinnaanernillu nutaanik misilittaassasusi.
• Immissinnut, ilitsersuisorsi aqutsisorsilu tapersersoqatigiissasusi atuartitsinermik/ ingerlanermik sapinngisamik annertunerpaamik pissarsiaqarniarlusi.

Immikkoortumi matumani meeqqat inuusuttullu pissusaannik paasinnittariaatsinik inuunissinni misilittakkassinnik oqaloqatigiinnersi siulleq pissaaq, kiisalu immikkoortoq 1-ip 2-llu akornanni nakkutiginninnermik suliassaq ataaseq pilersaarusiussallugu.

EQIMATTAKKAARLUNI OQALLINNEQ