ATAATSIMIINNEQ 1/10
Qupperneq 2/4: Najoqqutassaq qanoq atorneqassava?Najoqqutassaq qanoq atorneqassava?
ANGAJOQQAATUT PAARSISARTUTUT SULINISSINNI ILISSI TASSAAVUSI IMMIKKUT ILISIMASALLIT
Kalaallit Nunaanni Isumaginninnermut Aqutsisoqarfiup, ilisimatuut aamma Fairstartip, anguniakkanik makkuninnga suliarinnissimasup suut tamaasa ilisimanngilaat – pingaarnertulli: ilaqutariiususi ilisserpiaat meeqqalluunniit paarisasi taakkorpiaat ilisarisimanngilaat. Angajoqqaarsiat tamarmik immikkuullarissuupput, meeqqallu ataasiakkaat asseqaratik. Ataatsimiinnerni isumassuineq pillugu nalinginnaasunik ilisimasarpassuaqalissaasi, ilissiinnaappulli suliassinnik ’meeqqassinnillu’ ilisimannittut – taamaanneratigut ilikkakkassi ilisserpiaq ulluinnarisassinni qanoq atorneqarsinnaanerannut immikkut ittumik ilisimasalinngorpusi. Anguniakkat imatut alanngaaganngorlugit ilinniassanngilasi. Ilisimasanik siunnersuutinillu tuniorassavassi, tamatuma kingorna ataatsimiinnerit akornini angerlarsimaffissinni siunnersuutit qanoq atorniarnerisi nammineq aalajangissavarsi aaqqiissutissanillu misiliillusi. Neriuppugut taamatut akisussaaffilerneqarnissigut suliarsi soqutiginarnerulissasoq. Ilisserpiaq nammineq ilaquttasi meerarlu paarisarsi qanoq inooriaaseqarnerat pillugu ilissi immikkut ilisimasaliuvusi, taamaattumik ataatsimiinnerit isumassarsiorfittut atorsigit sulinersilu ineriartortillugu. Tamannalumi ilissi ilaqutariittut inooqataanermut akisussaaqataasutut attuumassutisi ineriartortinnissaannut pissanganartumik periarfissaqartitsilerpoq.
”Isumassuisut eqimattat ilinniartitamma ilisimasat nutaat assut ammaffigivaat, oqallinnernilu peqataasarlutik. Isumassuisut meeqqanut atassuteqarnermik pitsanngortinniarnerat iluatsippaat. Maanna ilisimalerpaat meeqqanik assigiinngitsunik, assigiinngitsunik pisariaqartitsisunik oqaloqateqarnermi suut maluginiagassaanersut. Isumassuisut assigiinngitsunik tunuliaqutaqarput misilittagaqarlutillu, tamakkualu meeqqanik sullissineranni asseqanngipajaartumik nalituujupput. Namminneq misilittakkatik atussavaat, meeqqallu tungaannit isiginnissinnaallutik, tamatumani ataatsimiinnerni periutsit pillugit ilikkakkatik atorlugit meeqqamut suna pitsaanerpaanersoq nalilersorsinnaallugu.
– Fairstartimi ilitsersuisoq
NAAPEQATIGIILLUNI ATAATSIMIINNEQ SUNIK IMAQARPA?
Ataatsimiinnerup imarisai aatsaat ulluinnarni piviusumik sulissutigalugit atorussigit ilissinnut meeqqanullu iluaqutaassapput. Eqimattatut ataatsimoorlusi aalajangissaasi ataatsimiinnerit akunneranni qanoq ineriartussanerlusi sulissanerlusilu. Ataatsimiinnerit nassuiarnissaannut peqatigalusilu samminissaannut, atortut saqqummiunnissaannut oqallinnerillu aqunnissaannut ilitsersuisoq akisussaasuuvoq. Kisiannili angajoqqarsiat atuagarsorluni oqallinnernik kisissi pivisunngortitsisinnaavusi meeqqanik inuusuttunillu ulluinnarni najuinissinni misilittakkasi atorlugit. Ataatsimiinnerit akornini sulinerup taama pingaaruteqartigineranut tamanna pissutaavoq.
Ingerlaatsip ingerlanerani ilitsersuisup peqatigalusi qulequttat assigiinngitsut arfineq marluk sammissavai. Meeqqat paarisat pissusilersuutaasa annaasaqarnermi ilissinnullu pinngikkallaramik isumassorneqannginnermut misisigisarsimasaannut pissusissamisoortumik qisuariaataanerisa qanoq paasineqarnissaannut tunngasuupput. Imaassinnaavoq inersimasunut tatiginninngitsut? Imaassinnaavoq inersimasunit ikiorneqarneq sungiusimanngilluinnaraat, isumaqarlutik suut tamaasa namminersuutigissallugit. Imaluunniit ilaqutariinni qanoq pissusilersortoqartarnera ilisimanngikkaat? Imaassinnaavoq aliasuuteqartut angajoqqaatillu qimassimasatik maqaasillugit, pinnguaqatissaqaratillu ikinnguteqaratik? Imaassinnaavoq kamannermik misigisimasut, isumassorneqarnerlu siusinnerusukkut amigaatigisimasartik pissutigalugu tatiginninngitsut?
Meeqqanik inuusuttunillu qanoq tapersersuisinnaanissinnut ataatsimiinnerit ataasiakkaat tamarmik tunngasuupput, taamaasillusi ulluinnarisat ingerlalluarnissaannut meeqqallu ineriartulernissaanut ilisimasasi amerligaluttuinnassallutik:
- 1: Ingerlaatsimik suleqatigiinnermillu ilisarititsineq kiisalu meeraanissinnit misilittakkat pingaaruteqartut pillugit marlukkaarluni apersuineq.
- 2: Meeqqat toqqissisimalersinneqarnerisa pingaarutaa paasillugu ilissinnullu qanimut attaveqatigiilersillugit. Matumani attaveqarneq pillugit ilimagisat ilikkagaqarfigissavai, toqqissisimasumillu attaveqarneq meeqqat inuunerminnik nuannaaruteqarnerannut, pinnguarnerannut ilikkagaqaleriartornerannullu qanoq isumaqartoq.
Aammattaaq ilissi nammineq ingerlalluarnersi kiisalu meeqqat inuusuttullu ingerlalluarnerat pillugu apersuilluni immersugassamik immersuiumaarpusi. Periuseq aamma ilissi isumassuinermik sulinissi qitiutinnissaanut ikiuutaasarpoq, meeqqat inuusuttullu tarnip pissusaasigut qanoq issusiannik ersersitsisarmat, kiisalu unammilligassat pissusilersuutitigullu ajornartorsiutitut pissutaasa paasinissaannut ikiuutaasaarluni.
- 3: Meeqqat inuusuttullu inersimasut toqqissisimaffigisinnaavaat, meeqqalli ilaat ajattuisuupput, kamaqarlutik uppertikkuminaallutillu, imaluunniit annertuumik ersigisaqarlutik ataqatigiinngitsunillu iliuuseqartarlutik. Matumani attaveqariaatsit sisamaasut paasiniarlugit sulissaasi, aamma meeqqat ilissinni inooqataanerminni toqqissisimanermik nassaarsinnaasunngorlugit qanoq iliuuseqarfigissanerisi.
- 4: Atassuteqaatit toqqissisimanartut aamma meeqqanik naapitseriaatsit toqqissisimalersitsisut eqqissisimalersitsisullu qanoq pilersinneqartarpat. Ulluinnarni qanoq sinaakkusiisoqartarpa ileqqoqalersitsisoqartarlunilu? Kiisalu ilaqutariinni ulluinnarni suliassanut meeqqat inuusuttullu qanoq akuulersinneqartarpat, taamaasillutik aamma paarineqareernermik kingorna nammineersinnaaneq ilikkassammassuk?
- 5: Avissaartitaanerit artornartut annaasaqarnerlu misigisimasaat meeqqanut qanoq ammasumik oqaloqatigiissutigineqartarpat, taamaasillutik namminneq unammilligassatik paasilluarnerusinnaassammatigit, misigisimasatillu nukissarsiffigalugit? Aamma taakku angajoqqaavi qanoq suleqatigineqartarpat, taakku amerlanertigut allaanerulluinnartumik meeqqanik perorsaariaaseqartarmata?
- 6: Kalaallit Nunaanni inuiaqatigiit ineriartupiloorput, tamanna meeqqat inuusuttullu kinaassutsiminnik ineriartortitsinerannut annertuumik sunniuteqartarpoq. Meeqqat inuusuttullu ilaqutariit marluk akornanni pingaarnerutitassaarussinnaasarnera, aamma meeqqat kikkuunerat, sunillu takorluugaqarnerat pillugit meeqqanik oqaloqateqarluarsinnaaneq ataatsimiinnermi matumani sulissutigissavarput.
- 7: Inuusuttuaqqanik qanoq suleqateqartoqartarpa, isumaqatigiissutitsialannik isumaqatigiissuteqartoqarsinnaaqqullugu? Ajornartorsiuteqalinngikkaluarlutik inersimasunit kiffaanngissuseqarusunnerannut qanoq ililluta peqatigisaanik tapersersussavagut? Aammaarlusi ilissi nammineq kiisalu meeqqat inuusuttullu ingerlalluarnerat pillugu apersuilluni immersugassat akissuteqarfigisassavasi, ingerlaatsip ingerlanerani ineriartorsimanersi paasisaqarfigiumallugu. Aamma ingerlaatsip naammassereernerata kingorna suliaqarfiit suut tamakkiisumik qitiutinneqartariaqarnerisa paasinissaanut periutsikkut ikiorneqassaasi.
Ataatsimiinnerni ataasiakkaani tamani ilitsersuisup qulequtaq pillugu allakkat videollu atorlugit takutittassavaasi meeqqat paarisat qanoq toqqissisimalersinneqartarnersut. Ataatsimiinnerit ataasiakkaat naalerneranni qinnuigineqassaasi ilitsersuisup oqaluttuarisimasai qanoq ilillusi angerlarsimaffissinni sulissutigisinnaanerlugit. Ilitsersuisoq peqatigalugu nammineq isumassarsiniaqquneqassaasi, ilisimasallu nammineq sulinissigut ilisimalersimasassi qanoq naleqqussarsinnaanerisi nassuiaqqullugu qinnuigineqassallusi.
Ataatsimiinnerit ataasiakkaat naalernerisa tamaasa angajoqqqaarsiat qinnuigineqassapput isumassarsiasi pilersaarutisilu tullianik ataatsimiinnissamut piareernissassi tungaanut qanoq misilerarniarnerisi allattoqqullugu. Ataatsimiinnerni tamani sammisassat isumassarsiallu tullianik ataatsimiinnissap tungaanut angerlarsimaffissinni sulissutigisinnaanerisi siunnersuutigineqartassaaq. Naapeqqikkussi qanoq ingerlasimanera oqaluuserisinnaavarsi.
Aammattaaq ullorsiuteqarnissarsi kaammattuutigaarput – amerlanertigut piviusumik siuariarsimanerit kingumut qiviarnikkut takuneqarsinnaasarput, aamma meeqqap paarisassi allinissaanut allattugaaterpassuaqalissaasi meeqqamut paarisassinnut ingerlateqqissinnaasassinnik. Maluginiakkat allattukkasi inunnit ilinniartitaanermut peqataanngitsunit takuneqanngisaannassapput. Atortussat taakku isertuussassaapput, ilissinnit, eqimattaqatissinnit ilitsersuisumillu atorneqartussat.