Ataatsimiinneq 1/10
Qupperneq 3/4: Ilissi nammineq inuunermit misilittakkasi attaveqarnermut avissaartitaanermullu tunngasutIlissi nammineq inuunermit misilittakkasi attaveqarnermut avissaartitaanermullu tunngasut
ATTAVEQARNERMUT ARTORNARTUMILLU AVISSAARTITAANERMUT MEEQQAT INUUSUTTULLU QISUARIAATIGISARTAGAAT
Meeqqani inuusuttunilu avissaartitaanernik annaasaqarnernillu artornartunik misigisaqarsimasuni pissusilersuutitigut ajornartorsiutit naammattuugassaagajuttarput (soorlu tunuarsimaarneq, avammut sammititamik qisuariaateqartarneq, avataaniitsitsisarneq, killissamik ujartuineq, kamarujussuartarneq, imminut aserorterneq, nikallunganeq il.il.). Meeqqat inuusuttullu kiserliortutut kamaateqartutulluunniit misigisinnaapput, imminnut naleqartinngingajallutik imminnullu tatigerpiaratik. Ilaqutariit marluk akornanni avissaartitaasutut misigisimasinnaapput tatiginnissutsimillu aporaaffeqarneranik tiguagaasimasutut misigisimasinnaallutik, peqatigisaanillu oqartussaasut, angajoqqaat angajoqqaarsiallu naatsorsuutigisaat imminnut akerleriissutut isigisinnaallugit. Tamatuma inersimasunut inuusuttunullu allanut toqqissisimasumik attuumassuteqarluni ataqatigiissumik kinaassuseqalernissaq inuusuttumut ajornakusoorluinnalersittarpaa. Avissaartitaanernut annaasaqarnernullu meeqqat qanoq qisuariaateqartarnerat aatsaat paasigaanni taamatut pissusilersortarneq aatsaat paasineqarsinnaavoq iliuuseqarfigineqarsinnaallunilu. Annaasaqarnermut, avissaartitaanermut toqqissisimannginnermullu tamanna qisuariaataavoq pissusissamisoorluinnartoq, amerlasuutigullu naalakkumannginnertut eqiasunnertullu isumasiorneqartarpoq, inersimasut meeqqallu akornanni tatigeqatigiinnginneq, uppertikkuminaannermik akerliuniarnermillu takutitsisarmat. Eqimattani maani kikkut tamarmik toqqissisimaneq namminerlu peroriartorfimmiit avissaartitaaneq pillugit naleqarluartunik misilittagaqarput, taakkualu meeqqat paarisat misigissusaasa pissusilersuutaasalu paasinissaannut ikiorsinnaavaasi. Ilissi angajoqqaarsiatut ilisimasassi taakku ilumut pingaarnersaraat, taamaattumik ilissi meeraanissinni inuusuttuunissinnilu nammineq sunik nalaataqartarsimanersi marlukkaarlusi oqaluuserilaarsiuk.
ANGAJOQQAARSIAT AKORNANNI MARLUKKAARLUNI APERSUINEQ:
Ataatsimiinnermi matumani meeraanissinnit misilittakkassi pingaarnersaata nassaarineqarnissaa, taamaasilluni meeqqat paarisassi inersimasumit pingaaruteqartumit avissaartitaanermik misigisaqarnerminni qisuariaataat paasilluarsinnaaneruniassagassigit. Tamanna assersuutigalugu pisarpoq inissinneqaraangamik nuunneqaraangamilluunniit. Meeqqat paarisat qanoq misigisimasaqarnerisa ilaanneeriarlutillu ajornartorsiuteqarnartumik pissusilersortarnerisa, inersimasut pillugit aliasuuseqartarnerisa taakkununngaluunniit tatiginnissuteqartannginnerisa paasinissaannut ilissi nammineq meeranissinnit misilittakkasi pingaaruteqarput.
Nammineq peroriartornissinni inunnut pingaaruteqartunut attuumaassutissi qanoq pingaaruteqarsimatiginerata paasineqarnissaa, peroriartornissinnilu avissaartitaanermut annaasaqarsimanermullunniit qanoq qisuariaateqarsimanissi paasinissaa apersuinermi siunertaavoq. Aammattaaq angajoqqaarsiatt ataasiakkaat tamarmik namminneq misilittakkaminnik inuussutissarsiutigalugu sulinerminni atuisinnaanerannik oqaluuserinnittoqassaaq.
Peqataasup aappaata peqataasoqatini minutsini 15-ini apersussavaa. Tamatuma kingorna inissisimaffiit paarlaanneqassapput, apersuinerlu aammaarluni ingerlateqqinneqarluni. Apersuinerup kingorna misilittakkasi pillugit marluullusi eqqarsaatiginnissaasi.
Apersuisoq apeqqutilliisassaaq akissutillu tusarnaartassallugit. Apeqqummik akissuteqartup akissuteqalernerani unitsinnginnissaa pingaaruteqarpoq. Akissutit tusarnaakkit, kingornalu apeqquteqarlutit.
”Uanga eqimattaqatigiinni marlukkaarluni apersuinermi uanga imminut pillunga misigisarsimasakkalu pillugit oqaluttualaarnikkut ammasuunissamik pilersitsineq aallartittarpoq. Apersuinerup kingorna oqaloqatigiittuaannalersarpugut, amerlavallaannginnattami. Allaaneq ajorami isumassuisut tupaallaatigilaartaraat meeqqanik inuusuttunillu sullissinissaq toqqarsimagamikku sooq eqqarsaatigisimanagu. Soorlumili tassa ikkussortakkat allat sinnerlugit naammassisimallugit. Meeqqatut misigisimasatik aamma tunngavioqataapput namminneq meeqqanik inuusuttunillu sullissinissaminnik toqqaasimanerminnut
– Fairstartimi ilitsersuisoq
APERSUINEQ
Ilissi nammineq inuunissinnik aallartitsinersi:
- Illit naartuugallarninni angajoqqaatit qanoq atugaqarpat? Sumi najugaqarpat, qassinik ukioqarpat qassinillu meeraqarlutik?
- Inunngoqqaarninniit atualernissavit tungaanut kimit isumagineqartarpit?
- Taamanikkut inummit inersimasumit pingaaruteqartumit (ataatamit, anaanamit, allamit) avissaartinneqarpit?
- Angajoqqaavit ilinnik isumassuinerannit suna nuannernersaava?
- Ilaqutariittut inuunermut atatillugu naleqassutsinik sunik tamanna ilinnut tunniussisimava – illit isummat malillugu suna pingaaruteqarpa?
- Illit eqqaamasatit malillugit avissaartitaanerit artornartut siullersaat sunaava?
- Annaasaqarneq qanoq qisuariaateqarfigaajuk – kiserliortutut, kamattutut nikallungasutulluunniit misigisimavit? Pinnguarusukkunnaarpit atuarusukkunnaarlutilluunnit? Inersimasunut tatiginninneq?
- Meeqqami paarisanni qisuariaaseq assigisaa ilaanneeriarlutit takusinnaasarpiuk?
- Avissaartitaanermut tuppallersarniarlutit ikiorniarlutillu inersimasup iliuuserisimasaa naleqarnerpaaq sunaava?
Illit angajoqqaarsiatut ineriartornerit:
- Inuunermi misilittakkat suut angajoqqaarsianngortippaatsit?
Illit/ilissi angajoqqaarsiatut sulinerit/-nersi:
- Suut nuannaarnermik annerpaamik pilersitsisarpat, ilissilu meeqqamik paarisamik sulissuteqarnissinni suna ajornakusoornersaava?
- Angajoqqaarsiatut pikkorinnerulerniarluni tapersersorneqarnissamut ilisimasaqalernissamullu illit/ilissi suut atorfissaqartinnerpaavisigit?
EQIMATTAKKUUTAANI OQALLINNEQ – minutsit15-it
- Meeqqat paarisassi paasinissaannut sooq ilissi nammineq inuunermi misilittakkasi sakkussaappat pingaaruteqartut?
- Angajoqqaarsiaanermi suna nuannernersaava?
- Eqimattaqatigiinni suleqataanissamut tapersersorneqarnissat ilikkagaqarfiginiarlugu ulluinnarni ajornartorsiutit suut oqaluuserineqarnissaat pisariaqartippisiuk?
