Immikkoortoq 2/8

Sammisaq B: Toqqissisimasumik tunngavimmik kiisalu paasisassarsiornermi pissusilersornermut tapersiinermik sulineq.

Attaveqalersarnerup ikumanerani meeqqat nukissatik tamaasa avissaarnissaq pinngitsoortinniarlugu, toqqissisimaneq piginiarlugu isumassuisumut ujaasillutik atortarpaat, qasunartorujussuusarporlu.

Bowlbyp paasivaa toqqissisimasumik isumassuineq attaveqalersarnermi annilaanganermik ”qamitsisinnaasoq”. Taanna taavaa, meeqqap toqqissisimasumik tunngaveqarnermik misigineranik. Aatsaat toqqissisimaneq patajaatsumik isumassorneqarnikkut ineriartortinneqarpat misigineqarlunilu, meeqqap inuusuttulluunniit misigisassarsiorsinnaassusaa, meeqqap nunarsuarmik misissuerusussusaata, pinnguarusussusaata ilinniarusussusaatalu pissusilersuut tiguassavaa ikillugulu. Atuartuunermi toqqissisimasumik tunngaviuvoq ilinniartitsisoq imaluunniit isumassuisoq naalaarluartoq, eqqissisimanermik pilersitsisoq annilaanganermi imaluunniit nalorninermi eqqamiissinnaasoq.

Meeraq inuusuttorluunniit toqqissimasumik tunngavimmik misigigaangami qanoq pissuseqartarpa?

Sivikitsunnguamik meeqqamut mikinermut uterta, tassani takujuminarnerusarmat attaveqalersarnerup misigisassarsiorsinnaanerullu meeqqap pissusilersuutaanik qanoq aqutsisarnera:

Meeraq mikisoq avissaarneqaraangami ass. angajoqqaap ini qimakkaangagu avissaarnissamut annilaanganeq ikinneqartarpoq, meeqqallu tamaviaarluni isumassuisuni utertinniarsarisarpaa: qiasarpoq, nilliasarpoq, paatsiveeruttarpoq, arpalluni angajoqqaaq malittarpaa il.il. Assersuutigalugu tamanna ersarittarpoq meeqqat meeraaqqerivimmiittalernissamut imaluunniit meeqqerivimmittalernissamut avissaaqqanissaq ilinniaraangamikku. Siullermik meeqqap allat saammarsaaniaraluarnerat itigartittarpaa.

Meeqqap arlaleriarluni misigisimappagu inersimasoq eqqaminiittartoq, saammarsaasartoq kiisalu qimattaqattaarivallaanngitsoq imaluunniit sivisuallaamik qimatsisanngitsoq, meeraq toqqissisimasumik tunngaveqalersarpoq: isumassorneqarnissaminut qulariunnaartarpaa, taamaasilluni nammineersinnaalluni, aamma angajoqqaaq eqqaminiittuaannanngikkaluartoq, eqqissisarporlu – attaveqalersarneq ”qaminneqartarpoq”. Tamanna aatsaat pigaangat misigisassarsiorsinnaassutsip pissusilersorneq tiguarsinnaasarpaa: meeqqap toqqissisimasup angajoqqaani qimassinnaasarpai pinnguariarluni, ilinniariarluni, misissuilluni meeqqanullu allanut attaveqarluni. Ersileruni attaveqalersarneq aallarteqqittarpoq, misigisassarsiornerlu unittarpoq.

Tamanna tunngaviuvoq meeqqat inuusuttullu toqqissisimanngitsumik attavillit nutaanik ilikkagaqarnissamut malinnaasinnaanermullu ajornartorsiuteqartarnerannik: attaveqariaasiat ima annilaangalersitsiatigaaq, misigisassarsiorsinnaanerat aallartissinnaanani.