Immikkoortoq 2/8

Qupperneq 4/5: Toqqissisimasumik tunngavik: Kingusinnerusukkut pinnguartarnerup, ilikkagaqarnerup inooqatigiinnullu piginnaaneqarnerup isumaa

Toqqissisimasumik tunngavik: Kingusinnerusukkut pinnguartarnerup, ilikkagaqarnerup inooqatigiinnullu piginnaaneqarnerup isumaa

SIUSINAARTUMIK ATTAVEQARSINNAANERUP PAASINISSAA MEEQQAT INUUSUTTULLU PISSUSILERSUUTAANNIK AJORNARTORSIUTAANNILLU PAASINNINNISSAMUT PINGAARUTEQARPOQ

Sulisutut pisariaqarpoq paasissallugu meeqqat/atuartut mikinermi qanoq pitsaatigisumik imaluuniit ajortigisumik isumassuisuminnut siullernut attaveqalersimanerat, meeqqap annerusup/inuusuttuaqqap inoqatiminut qanoq naatsorsuuteqarneranut attaveqalersarnermi misilittagaat siulliit annertuumik sunniuteqartarmata.

Matumani pissutaasoq pingaarutilik tassaavoq kalaallit atuartut affaasa pingajorarterutaasalu akornanni inooqataanermi ilikkagaqarsinnaanermilu ajornartorsiortarnerannut. Meeqqat inuusuttullu perorsaasutik ilinniartitsisutillu siusissukkut misilittakkaminnit isigisarpaat, isumassuinermik avissaarnermillu misigisaminnit; illersorneqarnissamut, saammarsarneqarnissamut isumassorneqarnissamullu pisariaqartitsinermi malugititsiniarnerminni isumassuisutik siulliit qanoq qisuariarsimanersut.

Misilittakkat taakku isumassuisunut tulliinut ingerlateqqittarpaat – taamaasilluni inuusuttoq, siusinnerusukkut pitsaasumik isumassorneqarsimasoq tatiginninnermik, alapernaannermik takutitsisarpoq kiisalu pisariaqarpat ikioqqusarluni. Inuusuttoq siusinnerusukkut annertuumik sumiginnagaasimasoq tatiginninnginnermik, kamammik, upperinninnginnermillu takutitsisarpoq imaluunniit inuuneq artornaraangat inersimasumut ikioqqussanani imaluunniit tatiginnilluni oqaluttuassanani – aamma sulisoq inussiarnisaaraluarpalluunniit.

Amerlasuuni takuneqarsinnaasarpoq attaveqarnermi pissusilersuut toqqissisimanissamik aamma isumassorneqarnissamik ujartuinermik takutinneqarneq ajortoq, kisiannili inersimasunut nutaanut pitsaanngitsunik naatsorsuuteqarlutillu pissusilersuuteqarfigisaraat – naatsorsuutit nutaanik annaasaqarnernik pinngitsoortitsisussat. Isumassuisunut naatsorsuutit taama ittut ass. misigittaannerunnguatsiarput soqutigitsaannerunnguatsiarlutillu, imaluunniit sulisunit sumiginnagaanissamut imaluunniit soqutigineqannginnissamut annilaangajuarnerullutik. Assinganik kamanneq, ikioqqunissamut piginnaasaqannginneq, inoqatinut akulerunnissamut annilaangasarneq il.il. meeqqap/inuusuttup qanilaarnermik avissaarnermillu misigisaqaqqaarneri pitsaanngitsuuneranik takussutaasinnaapput. Meeqqat siusinaartumik sumiginnagaasimasut, perunganngitsumik iliuuseqartarnerat inersimasunillu isiginnittariaasiat inuunermi siusissukkut pilersinneqarsimasut, inuunerminni ingerlatiinnartaraat sulinermi ilisimassallugu aalajangiisuuvoq. Tarrarsuutitut assilissamik allanngortitsisutut isigisarpaatsit.

Assersuutigalugu Naja, nunaqarfimmi alliartorsimasoq maanna inersimasuusoq oqaluttuarpoq:

“Annertuumik imigassamik ajornartorsiuteqarneq pissutigalugu anaanama mikigallarama paarisinnaasimanngilaanga. Angajoqqaakka kamaateqqajaasarput, ataatamalu anaanaga unataraangagu illersorniartaraluarpara, ataatamali ajaannartarpaanga. Sulisuaannarpoq, eqqaamasaqarfiginngilaralu ataasiaannarluniluunniit eqinnikuugaanga imaluunniit soqutiginikuugaangaluunniit. 12-inik ukioqartunga nakuuserneq pissutaalluni anaanaga qaratsamigut aanaartoorpoq, inissiisarfimmullu inissinneqarpunga. Inissinneqarama inersimasut upperiunnaareersimavakka, aamma inussiarnisaaraluartut sinittarfimmut mattuttarpunga, oqaluuttarnagit imaluunniit nuannarinagit nilliaffigisarlugit. Atuarfimmi qinngasaarneqarlungalu nakkarsarneqartarpunga, aallussisinnaannginnera pissutigalugu. 14-inik ukioqarlunga hashimik atornerluisunngorpunga. Taamaattumillu 7. klasseullunga atuarfimmiit anillunga, sorpassuarnik ilikkagaqanngitsoorpunga – inuuneralu unittuusivoq. Aatsaat 17-inik ukioqarlunga perorsaasumik naapitaqarama uteriilluni uannut oqaluussiinnaavittumik, massa amerlasooriarlunga itigartittaraluariga. Katsorsartippaanga, attaveqarnini attatiinnarlugu angajoqqaama nukissaqarfiginikuunngisaannik. Ullumikkulluunniit artorsarsinnaasarpunga kisiannili taanna sullissisullu allat pissutaallutik imminut naniartorpunga allanullu upperinnissinnaajartorlunga. Sulisunut oqariartuutigerusuppara inuusuttut ajornartorsiutaat pillugit oqaloqatigisaqqullugit, itigartinneqaraluaraangamilluunniit”.

Tunngaviusumik paasinnittariaaseq taannarpiaq immikkoortumi matumani pingaartinneqarpoq: atuartuunermi ineriartornermut ilikkagaqarnissamullu toqqissisimasumik isumassuineq apeqqutaasartoq pingaartumik ukiuni siullerni, kiisalu sulisut toqqissisimanermik pilersitsinissaat. Ilissi sulinissinnit misilittakkasi takoriartigit.

Ilissi ulluinnassinnit assersuutit: Meeqqat inuusuttullu toqqissisimanngitsut toqqissisimasullu

20 minutsit

Allanut nassuiarlugu misiliguk: meeraq/ inuusuttoq ima annilaangatigisoq takoqquinnaavittarluni, eqqissiveqanngitsoq imaluunniit aaqqiagiinnginnernik aallartitsisartoq?
Ataatsimik eqqaasaqarniarsarigit imminut annikitsuinnarmik naleqartittumik, tunuarsimasumik, oqaaseqarneq ajortumik ikinnguteqanngitsumik, ilikkarsinnaannginnerminillu eqqarsartartumik, immaqalu ilinnut ujartuerusunnerusoq meeqqanik/ inuusuttunillu allanik ujartuinermit? Immaqaluunniit imminut mattussimasumik?
Ataatsimik eqqaasaqarniarsarigit toqqissisimasumik, alapernaattumik ilikkagaqarusuttumik sammisassanullu peqataarusuttumik?

Toqqissisimasumik Tunngaveqarnermik Pissusilersuummut assersuut

Aana meeraaqqat isumassuisumit toqqissisimasumik tunngaviliisumik sumiiffimmilu ataatsimi eqqissisimallutik takutitsisut pillugit assersuut. Tamatuma meeqqat misigisassarsiortilertarpai. Asserluinnaanik meeqqat anginerit inuusuttullu inersimasumit toqqissisimanartumik neqeroorfigineqaraangamik taama pisarput.

Sulinissinnut nuutsillugu:

Meeqqamik/ inuusuttumik sullitaqaraangassi eqqissisimallusi sumiiffimmi ataatsimi issiasarpisi imaluunniit nikorfasarpisi?
Ullormi ataatsimi qanoq akulikitsigisumik inersimasut paarlakaattarpat? Meeqqat/ inuusuttut sorliit paarlaannermut qanoq qisuariartarpat?
Sammisani/ tiimini aalajangersimasuni oqarasuaatit angallattakkat inerteqqutiginikuuisigit?
Piumasaqannginnissinni toqqissisimanermik qanoq pilersitsinissamik siunnersuuteqarpisi – pissusilersuutit suut ilissinnut sunniuteqarnerpaasarpat?

NAKKUTIGISASSAT

- Attaveqarnermi pissusilersuutit qanoq ilisarineqarsinnaappat?
- Meeraq toqqissisimasumik tunngavilissallugu isumassuisoq qanoq iliorsinnaava?
- Misigisassarsiornermi pissusilersuut qanoq ilisarineqarsinnaava?
- Sooruna meeqqap ineriartorneranut misigisassarsiornermi pissusilersuut taama pingaaruteqartigisoq?

Siulia

Tullia