Select Page

Ataatsimiinneq 7/10

Qupperneq 4/8 Inuusuttuaranngulerneq pillugu oqaloqatigiinnerit

Inuusuttuaranngulerneq pillugu oqaloqatigiinnerit

Inuusuttuaranngulernermi allanngornerit meeqqanut inuusuttuaranngortunut tamanut sakkortusaqaat ilaanneeriarlutillu tupannarsinnaasarlutik. Meeraq 8-9-nik ukioqartilluguli qanoq pisoqarnissaanik piareersalereerussiuk, allanngornerit paasinarnerulersissavasi.

Ulluinnarni oqaloqatigiinnerni meeqqamut oqaluttuarisinnaavarsi timimi, suiaaqatiginngisanik isiginninnermi kiisalu ilissinnut angajoqqaarsiatut pissutsimini qanoq pisoqarumaarnersoq. (Aamma ilaqutariit meerartai mikinerit oqaloqatigiinnernut ilaanneeriarlutik peqataasarsinnaapput, taakku aamma paasissammassuk meeqqami maanna inuusuttuaranngortumi qanoq pisoqarnersoq). Matumani toqqissisimasumik attuumassuteqarnerup pilersinnissaa pingaaruteqarpoq, meeqqap inuusuttulluunniit misigisimassammagu paasineqarluni isummamillu pigiliussaqartoqanngitsoq.

Inuusuttuaranngulerneq pillugu meeqqanik inuusuttunillu oqaloqateqarnermi suut pingaaruteqarpat?

1. Ataatsimiinnermi matumani marlukkaarlusi apersuinissinni nammineerlusi eqqarsaatisi eqqarsaatersuutigisasilu ilissi meeraanermiit inuusuttuaranngornermut ikaarsaariarnissinnik meeqqamut oqaluttuarnissinni atorsinnaavasi. Suut ajornakusoorsimappat, naallu inuusuttuaraanersi ajornarsimasoq qanoq ilillusi inersimasutut akisussaassuseqartutut iluatsitsisimanersusi?

2. Pingaartumik inuusuttuaqqat qanoq ilillutik angajoqqaarsiaminnut angajoqqaaminnullu kamassinnaasarnerat taakkuninngalu pakatsissuteqarsinnaanerat meeqqamut oqaluttuarisinnaavarsi. Tamatuma pissusissamisoortuuginnarnera aamma oqaluttuarisiuk, taamatullu pisoqarpat inuusuttuaraq isorissanngikkissi inuttullu nammineq ajorusuutiginagu. Soorunalumi aamma ilaqutariinni qanoq pissusilersortarnissamut suli maleruagassaqassaasi.

3. Inuusuttuaqqat meeqqap atuarfimmi allaniluunniit takusimasai oqaluuserisinnaavasi, aperalugillu taakkunani suut maluginiartarneraat. Maligassaqarnissaq inuusuttuaqqamut pisariaqartuuvoq pissanganarlunilu, maligassiuisunilli meerarsiap inuuneranut naleqquttunik nassaarniarnissaq ajornakusoorsinnaavoq. Inuusuttuaqqanik ingerlalluartutut takusinnaasaanik oqaluuserinninnissamut meeraq ikiorsiuk – assersuutigalugu aalakoorniarluni imigassartornermut qujaannartartut, imaluunniit pujortarneq ajortut, naak ikinngutai pujortartaraluartut.

Imaassinnaavoq meeqqap tamanna maannakkorpiaq soqutiginngikkaa, kingornali eqqaamassavaa suna oqaloqatigiissutigisimanerissi, aamma meeraq nammineq inuusuttuaranngulerpat tamatuma oqaloqatigiissutiginissaa ajornannginnerulissaaq.

Taamatut oqaloqatigiittareerussi inuusuttuaqqap inuttut apersorneqarnissaa inuusuttuaqqamut siunnersuutigisinnaavarsi,   ilaatigut imminut pilluni eqqarsaataanut tunngasumik: qularutit, siunissamut takorluukkat, ajornartorsiutit kipisagisallu. Apersuineq filmiliareqqullugu, pappialamut allattoqqullugu, nipituumik akissuteqartaqqullugu inuusuttuaqqamut siunnersuutigisinnaavasi, apeqqutaalluni suna inuusuttuaqqamut tulluarnerpaanersoq. Inuusuttuaraativit apersuineq ikinngunni ilagalugu ingerlakkusuppagu, peqataatikkusutai peqataanissamut qinnuigisinnaavasi. Videup pappialalluunniit assilineqarneranik toqqorsigitsi, inuusuttup angajoqqaarsiaminik qimatsinermini nassarsinnaasaanik.

”Amerlasoorpassuupput siunissamut pilersaaruteqanngitsut kissaateqaratillu. Siunissaq pillugu oqaloqatigiinnissaq pingaaruteqarpoq, aataap tamatuminnga ilinniartippaanga. Taamaattumik uagutsinni taamatut iliortaqaagut.”

Inuusuttuaqqamut 15-inik ukiulimmut anaanarsiaq

SAMMISANUT SIUNNERSUUT: oqaloqatigiinnitsialak

Meerarsiaqarpisi ungasinngitsukkut inuusuttuaranngulersussanik imaluunniit inuusuttuaranngoreersimasunik? Meeqqamiit inersimasumut ikaarsaariarneq pillugu qanoq oqaloqatigisinnaanerat misilillugu pilersaarusioritsi.

  • Piffissani nuannisaaqatigiiffiusuni nammineq inuusuttuaraanissi nalaani misigisarsimasasi, misigisimasasi eqqarsaatisilu pillugit oqaluttuaritsi. Imaassinnaavoq inuusuttuaraanissinneersunik assiuteqartusi takutissinnaasassinnik?
  • Inuusuttuaqqani misigissutsit qanoq nikerarsinnaatiginerat, aamma ilaanneeriarluni kiserliortorujussuartut aamma nuannaarujussuartutut misigisimasoqartarnera meeqqamut inuusuttuaqqamulluunniit oqaluttuarisiuk.
  • Kammalaatit eqimattakkaat qanoq annertutigisumik pingaaruteqarnerat pillugu meeraq inuusuttorluunniit tusarnaaruk oqaloqatigalugulu, oqarlusilu inuusuttup taakkuninnga ilaqarnissamik pisariaqartitsinera paasisinnaallugu. Eqimattani sulerisarnersut apeqqutigiuk: suna pitsaasuua, kikkut ikinngutigilluarneraat, sunik aarlerinartoqarsinnaanersoq. Assersuutigalugu allanit akuersaarneqarnissaq piinnarlugu imigassartornermut, uumisaarinermut, immaqalu atoqatigiinnermut qanoq ajornaatsigisumik ussiisoqartartoq.
  • Meeraq inuusuttorluunniit ikiorsiuk ilissinni kammalaatiminik ualikkut unnukkulluunniit aalajangersimasumik nuannisaaqatigiittarnissamut qaaqqusitillugu. Inuusuttuaraalluni qanoq ittarnersoq pillugu oqaloqatigiinnermut tassani aamma ikiorsinnaavasi, taava oqaloqatigiinnermut pikkorinnerulernersi ilutigalugu inuusuttoqatigiinni qanoq pisoqartarnersoq pillugu ammariartulissapput.

 

Siulia
Tullia