Ataatsimiinneq 7/10
Qupperneq 5/8 Nakkutilliinermiit akuutitsinermut isumaqatigiissuteqarnermulluNakkutilliinermiit akuutitsinermut isumaqatigiissuteqarnermullu
Inissaqartitsinerup (kamassaatigisaqarasi paasinnillusili) kiisalu aalajangersimasunik piumasaqaateqartarnerup oqimaaqatigiissinnissaat ilissinnut angajoqqaarsiatut pingaaruteqarpoq. Taamaattumik ilissinnut namminermut erseqqissaatigissavarsi piumasaqaatit suut isumaqatigiinniutigineqarsinnaanersut piumasaqaatillu suut oqaloqatigiissutaasussaanngitsut.
Aalajangiinisi killissasilu misileraavigineqartut ilisimassallugu pingaaruteqarpoq. Inuusuttuaqqap killissassinnik misiliisarnera pissusissamisoorluinnarpoq, taamaattumik killiliussasi ilissinnut erseqqilluinnassapput.
Maleruagassaq iluaqutaasoq unaavoq: inuusuttuaqqap inersimasutut pissusaa oqaluuttuartarsiuk – qanorluunniit meerarpalutsigisumik pissusilersuuteqartutut isigigaluarussiulluunniit.
Inissisimaffiit “uagut illit angajoqqaarsiaraatsigut, illillu meerarsiaavutit” suujunnaartutut ilisarput, taamaattumik allatut suleqatigiinnissaq nassaariniartariaqarpoq. Isumaqatigiissuteqartarnerit isumassarsiatsialaasinnaapput. Isumaqatigiissummi siunertaavoq inuusuttuaraq nammineq isumaqatigiissusioqataappat, imaluunniit ataatsimoorussamik maleruagassanut aalajangeeqataasartutut misigisimappat, sunniuteqarnerulissaasi aaqqiagiinnginnerillu ikinnerussallutik.
Assersuutigalugu:
“Maanna ukioqqortunerulernikuuvutit, aamma takusinnaavarput nammineq suliarisinnaasatit amerlisimasut. Qanoq sivisutigisumik sunngiffeqarnissat ilinnut assortuussutigerusunngilarput. Pisarnitsitut paariuassavatsigit, kisianni nammineersinnaalernissannut sungiusartussaavatsigit. Paasiuminaassinnaavoq, taamaattumik oqaloqatigiissutigisigu.
Isumaqatigiissusiorfigerusuppatsigit, tassani ataatsimoorluta isumaqatigiissutigissavarput ullut tamaasa suut suliarisassagitit, qanoq sivisutigisumik ikinngutitit aneeqatigissaneritit, illillu uatsinnit akueritikkumasatit ilanngullugit.
Assersuutigalugu sumut tunngasuugaluarnersut illit nammineq aalajangersinnaasatit, illillu aalajangikkatit oqaloqatigiissutigisariaqanngilagulluunniit.
Isumaqatigiissummi aamma allassavarput, isumaqatigiissutigisavut malinngikkukkit, uagut angajoqqaarsiatut qanoq iliussanersugut. Ataatsimoorluta allalluta aallarteqisa –sunik isumaqatigiissutinik siunnersuutissaqarpit – suna ilinnut pingaaruteqarpa?”
SAMMISANUT SIUNNERSUUT: Ataatsimoorussamik isumaqatigiissut allassiuk
Isumaqatigiissusiornermut inuusuttuaqqap aalajangeeqataasinnaaneranut inuusuttuaraq piareersarsinnaavarsi, inuusuttuaraq siulliulluni siunnersuuteqartillugu. Assersuutigalugu qanoq sivisutigisumik aneertoqarsinnaanersoq, inuusuttuni eqimattani artornartunik pisoqarsimappat angajoqqaarsiat oqaloqatigineqartassasut, nammineq ineeqqami kisimiinnissaq pisinnaatitaaffiusoq, inersimasullu kasuttoqqaartassasut.
- Ulluinnarni pisartunik marlunnik, isumaqatigiissummik pisariaqartitsiviusunik nassaarniaritsi.
- Qanoq allassimasoqarnissaanik kissaatigisasi allariarsigit, inuusuttulli nammineq siunnersuutai tamatigut tusaaniaqqaartarsigit!
- Isumaqatigiissut naammassereeriarpat nillataartitsivimmut nivinngarneqassava?