Immikkoortoq 8/8

Annaasaqarnermi meeqqat qanoq qisuariartarpat

Meeraq imaluunniit inuusuttoq angajoqqaaminiit avissaaraangami ukiut apeqqutaallutik qisuariartarpoq aliasunnerminillu takutitsisarluni. Meeqqat aamma aliasunnerminnik assigiinngitsunik aqutseriaaseqarput. Angajoqqaamik qatanngutinilluunniit attaveqarnermik annaasaqarnermi inuit oqakkajuttarput, “piffissap suna tamaat aaqqittarpaa”, tamannali nalinginnaasumik meeqqanut mikisuararsuullutilli angajoqqaamit imaluunniit attaveqaammik pingaaruteqartumit avissaarsimasunut, erngertumillu angajoqqaat inaanni allamut inissittunut atuuttarpoq.
Annaasaqarnermik misigisaq angajoqqaap toquneranut attuumassuteqartuaannanngilaq, aammali timikkut avissaarnerusinnaalluni. Angajoqqaaq timikkut najuussinnaavoq, kisiannili meeqqamik paarsisinnaanani assersuutigalugu erninermi isumatsassimaneq, tarnikkut nappaatit, atornerluineq imaluunniit angajoqqaap nammineq meeraanermini isumassorneqarsimannginnera pissutaallutik.

Annaasaqarnermi qisuariaatip sivisussusaa annertussusaalu aamma apeqqutaavoq, isumassuisut nutaat attaveqarnermik qanoq neqerooruteqarnerat.

Avissaarnermik imaluunniit isumassuinermik amigaateqarnermi meeqqat misigisaqarnerminni nalinginnaasumik akerliunarnermik aqqusaagaqartarput: qiasarput, toqqissisimasanngillat saammarsaruminaattarlutillu, isumassuisuminnit nutaanit qanimut attaveqarfiginiarneqarnertik immaqa itigartittarpaat. Tamanna piviusumik qisuariaat nalinginnaasuullunilu peqqinnartuuvoq: meeqqap attaveqarsinnaanera avissaarnermit aallartinneqassaaq, allamik avissaarnermik misigisaqarnissaq pinaveersaartinniarlugu. Qisuariarneq taanna immikkoortoq 4-mi Dr. Ed Tronick’ip “Still Face Experiment”-iani takuarsi. Siullermik anaanaq tusarnaarpoq suleqatikkuminarlunilu – taava kiinnani misigissutsinik takutitsissanngitsoq qinnuigineqarpoq. Meeraaqqap ingerlaannartumik qiviarsalerpaa. Tamanna iluatsinngimmat, meeraq neriuutaarutilerpoq naggataagullu qissaserluni.

Misilittaanermi videomit matumannga takorlooruminarpoq meeraaraq qisuariarneq ajortumik isumassuisoqartoq qanoq annertutigisumik annilaangasinnaanersoq. Annilaanganerlu tamanna inuunerup ilaani isumassuisunik ilinniartitsisunilluunniit nutaanik naapitsinermi qanoq aallarteqqissinnaanersoq.

Siusissukkut artornartunik avissaarnernut meeqqat inuusuttullu qisuariaataat

Avissaarneq sakkortuumik takkuteriasaarsimappat – immaqa meeraq oqartussaasunit politiinillu angajoqqaat akerlerisaannik peerneqarsimappat – meeraq nalinginnaasumik uippakajaarnermik aamma avissaarnissamut annilaanganerujussuarmik ineriartortitsisinnaavoq. Meeraaqqap attaveqarsinnaassusaa malussajavallaalersinnaavoq ”uniffeqarunnaarsinnaallunilu” siusinnerusukkut tupassimaneq tupassimanerilluunniit pissutaallutik.

Taamaattumik meeraq imaluunniit inuusuttoq kingusinnerusukkut ulluinnarni assigiinngitsutigut qisuariaateqarsinnaavoq:

Katerisimaanernut peqataanngivittarsinnaavoq, inimit anillakkaangassi imaluunniit allamut saaginnartusi ersilerujussuartarluni uivilertarlunilu, qimanneqannginninilu uppernarsakulanissaa pisariaqartissinnaasarpaa. Meeraq imaluunniit inuusuttoq malugineqarnissamut arlaatigut sukataarujussuarsinnaavoq, imaluunniit annertuumik qisuariaateqarsinnaalluni uniffeerussinnaallunilu. Meeqqat avissaarnermut malussajasorujussuanngornikut immaqa ilissinnut attuumarusuttuaannarsinnaapput, sininniarnermi ajornartorsiuteqarsinnaallutik kiisalu sivikitsumik nalinginnaasumillu avissaaqqareernerup kingorna piffissami sivisuumi toqqissisimanissamik saammarsarneqarnissamillu pisariaqartitsisinnaasarlutik.

Misissuinerit takutippaat meeqqat inuusuttullu tamarmik inissinneqareernerup imaluunniit skolehjemmimi aallartereernerup kingorna ukiup affaani annertuumik uippakajaartartut. Matumani pingaartumik pingaaruteqarpoq annaasaqarneq avissaarnerlu pillugit sammisat qaqilissallugit, taamaasilluni uippakajaarneq annikillineqarluni.

EQIMATTAKKAARLUNI OQALLINNEQ