Immikkoortoq 8/8

Sammisq B: Meeqqani annerusuni inuusuttunilu annaasaqarnermi qisuariaatit

ANNAASAQARNERMIK MISIGISSUTSIKKUT PAASINNINNEQ IMMINUT NALEQARTINNERMIK ANNIKILLISAASARPOQ

Meeqqat inuusuttullu sivisunerusumik avissaaqqaneq nalinginnaasumik misigissutsikkut paasisarpaat:

“Itigartitaavunga, taamaammat asaneqarsimanngilanga naleqarnangalu”. Pingaaruteqarpoq paasissallugu paasinninneq taanna misigissutsiniimmat isumassuisunillu nassuiaatinut erseqqissunut piviusunullu attuumassuteqarpiartarani – misigissusaaneruvoq ilisimasaanngitsoq. Angajoqqaanit isumassuisunillu avissaarnermut iluamik nassuiaateqarsinnaavoq, misigissuserli suli pigineqarsinnaavoq, inuunermilu kanngusuttuarnermik kiisalu inuunerup isumaanik takunnissinnaannginnermik pilersitsisinnaalluni. Imminut naleqartinnermik appasissorujussuanngortitsisinnaavoq, taamaasilluni meeraq inuusuttorluunniit atorusunngisaminik takutikkusunngisaminilluunniit iluaqutissaqarsinnaalluni.

NALEQANNGITSUTUT MISIGINISSAQ PINAVEERSAARTINNIARLUGU PERIUTSUT INERISARNEQANNGITSUT

Meeqqat inuusuttullu itigartitaanermik asaneqannginnermillu misigineq naammagittarlutik atorsinnaanngilaat, taamaattumik naleqanngitsutut itigartitaasutullu misiginiarnatik tarnikkut illersuutinik pilersitsisarput.

Illersuutit taakku aamma siunertamut tulluussorinarsinnaanngikkaluartut, isumaliortaatsimut naleqquttuupput: annaasaqarnissamut avissaarnissamullu nutaamut imminnut illersorniarlutik iliuusissanik nassaarniartarput. Misilittaanerit inerisarneqanngimmata anniannginnissamut iliuusisst qanganisarpalussinnaapput. Eqqaamajulli, meeqqamut inuusuttumullu anniartuarnissamut nanertisimajuarnissamullu tassanerpiaq pinaveersaartitsiniarluni aaqqiissut pitsaanerpaammat. Kikkunni tamani qisuariiaatsit taakku takuneqarsinnaapput, meeqqanili inuusuttunilu artornartumik avissaarnermik misigisaqarsimasuni taakku sakkortunerusarput, ilaannilu aserorterisinnaasarlutik. Pinnguarnermut ilinniarnermullu nukissat atugassaraluatik tamaasa tassunga atortarpaat.

• Misigissutsit iluaatsut uterfigeqqikkusunnagit ilaasa piumanngivittarpaat pisimasut eqqartornissaat.
• Ilaat ”misigittaatsuusaartarput”: qanorluunniit pisoqaraluarpat, meeqqat nillertutut ittarput, allanillu qanilliniarneqaraluarnerminnut uumissuisutut qisuariartarlutik, “Illit kammatit allallu tamaasa soqutiginngilassi. Eqqissisimatinneqarusuppunga! “ (takuuk attaveqartariaaseq niguisoq/ itigartitsisoq). Isuma tamanna paasinarpoq, allat ingalassimatittarmagit annaasaqarnissallu nutaat misiginissaat ingalassimatittarlugu – taava annaanissaat isumaqassanngilaq.
• Ilaat namminersorsinnaassuseeruttarput “niviarsiaratsialaasuaannarlutik nukappiaratsialaasuaannarlutik”, isumassuisut isumaqartiginiarlugit nukitik tamaasa atortarpaat. Aaqqiagiinnginnerit pinngitsoortinniartarpaat, namminnerlu isumaqarsinnaanermik isumassuisunillu isumaqateqanngissinnaanermik taamaatitsiinnartarlutik – “Qanoq iliussasunga oqaluttuutinnga, nammineq qanoq iliussanerlunga naluara.” Aalajangernissartik annilaangagikkajuttarpaat, isumaqatigineqannginnissaq imaluunniit isornartorsiorneqarnissaq pinaveersaartittuarusukkamikku.
• Meeqqat ilaat “sapinngisamik pitsaasuliorniortartunngortarput”: suna tamaat pitsaasumik naammassiniakkajuttarpaat pisullu eqqortumik ingerlannerlugit aqunniartarlugu. Kukkulaarnissaminnut sunalu tamaat eqqortumik allannginnissanut annilaangasorujussuusarput. Unammillerneerannguit kukkuneerannguillu tamaasa tamaviaarnarisarpaat “Suna tamaat kukkusumik ingerlattarpara, ajorsakuuvunga, sunulluunniit pikkoriffeqanngilanga. Sianiittuuvunga, toqorusunneruvunga il.il.”
• Ilaat eqqissiveeruttarput uippakajaalertarlutillu annerusumik minnerusumilluunniit uninngaveeruttuusisarlutik. Eqqissillutik uninngasinnaanngillat eqqissisimanngisaannarlutik sakkortuumillu oqaluttuaannarsinnaallutik, tamatuma ersarissisippaa meeraq taanna uummaarissuinnaanngitsoq: meeraq tassaavoq sivikitsumilluunniit eqqissisimasinnaanngitsoq pisimasullu eqqarsaatsiminit peeqqatinniarsarigai.
• Ilaat “kisimiittunngortarput”: Sinittarfimminni imminnut mattuttarput, kisimiillutik computeriminnik imaluunniit pinngussaminnik ilalerlutik, anerusussanatik imaluunniit peqaapajaaminnik qaaqquserusussanatik. Ataatsimoornerit qaaqqusinerillu nuannarinngilaat naameernissamullu utoqqatsissuteqartuaannarlutik. Misigissutsikkut tunngavittut isuma tassaavoq “Kammaqanngikkuma allanillu kammattaarnanga arlaannaataluunniit itigarteqqissinnaanngilaanga”
• Ilaat angajoqqaaminnut allanullu, avissaarfigisimasaminnut qinngarinninnikkut kamannikkullu annattarput. Tamatuma anniaatit maqaasinerillu ingalassimatittarpai “Inersimasut tamaasa nuannarinngilakka, tamarmik sallusarput, tatigineqarsinnaanngillat, pisariaqartitsinermi tassaniinngisaannarput”.

Iliuusissat taakku tamarmik inerisimanngitsut ilisimanngisallu meeqqap inuusuttullu avissaaqqinnissap annernassusaanik pinaveersaartitsinerisarpai.