Immikkoortoq 8/8

Sammisaq A: Ukiut 0-7

MEEQQAT MINNERIT MEEQQERIVIMMIITTULLU ANNAASAQARNERUP QAANGERNISSAANUT IKIORNERI: AVISSAARNERMI QISUARIAATSIT ANNIKILLISARNERI

Sulinissinnik anguniagaanngilaq meeqqat nuannaartuaannarnissaat. Meeqqap avissaarnermut qisuariaataasa sakkortussusaa annikilliartuaartissimagussiuk meeraq nalinginnaasumik qisuariarnissaanut ikiorsimavarsi. Ittuulaarneq misigissuseqalaarnerlu nalinginnaasuupput – assigiinngissutituaraa qisuariaatip qanoq sakkortutiginera. Nalinginnaasuunngilaq inimit anigaangavit meeqqap uiverujussualertarnera, nalinginnaalluinnarporli nammineertinneqaleraangami qialertarnera imaluunniit pakatsisarnera.

Aajuku siunnersuutit atorsinnaasasi. Ikiuutaanersut apeqqutaasorujussuuvoq sulisup meeqqallu pineqartup attaveqarnerat. Taamaattumik ”eqqortumik” piniarsarissanngilasi. Misilissiuk misigissuseqarlusi, aaqqiissutit nammineerlusi katitersigit, ullullu tamaasa meeqqap sulinissinnut qanoq qisuariarnera pillugu allattaritsi.

SAMMISASSANUT SIUNNERSUUT

• Sulinissani pilersaarutini allannguisinnaaneq eqqartorsiuk, taamaasillutik meeqqat ullukkut isumassuisunik imaluunniit ilinniartitsisunik assigiinnik sapinngisamik annertunerpaamik ilagineqartarnissaat siunertaralugu. Assersuutigalugu isumassuisut marluk meeqqanut eqimattanut aalajangersimasunut akisussaasuutillugit.

• ”Toqqissisimasumik isumassuisup pissusilersuutai” sisamat sungiusakkit (immikkoortoq 4 takuuk). Meeqqamik tunuarsimasorujussuarmik imaluunniit nippusimaannavissumik pitsaanngitsumik sunnertinnani sullissinissaq ajornartorujussuuvoq. Meeraq nalinginnaasumik qisuariartanngikkaluarpalluunniit attaveqarnissamut ammasuuinnarnissarsi pillugu suleqatigiinni oqaloqatigiillattaartariaqarpusi qanoq iginerlusiuk.

• Timikkut attaveqatigiinneq atorsiuk: ass. nalaasaarfimmi qanillusi issiallusi, kivillugit kaavisittarlugit, eqissisarlusi immaqalu sarliartarlusi. Utaqqilluataaritsi qaammatit ukiulluunniit ingerlasinnaapput meeqqap attaveqarnermi pissusilersuummik nalinginnaasumik takutitsinissaanut, soorlu eqinneqarnermik, sarliarneqarnermik imaluunniit inequssuunneqarnermik nuannarinnilernissaanut.

• Meeqqamut takutissiuk najorlugu naatsorsuutigisiullu toqqissisimanissamik, ilissilu sivisunerusumik najuunnissassinnik, allanut sanilliullugu pisariaqartitsinerusut.

• Meeqqat toqqortaatikulaqatigisigit. Taama pinnguarnerup meeraq ikiussavaa avissaaqqaneq nuannersutut illarnartutullu tigunissaanut.

• Sammisassap aamma meeqqat ikiussavai tamaaniittuaannarnissinnik qamani naatsorsuuteqarnermik pilersitsilluni. Meeqqap timikkut qanittuaannarnissassinnut pisariaqartitsineranik annikillisaassaaq. Aamma arlaannik toqqorsisinnaavusi meeqqanullu ujartillugit – tamatuma aamma meeqqat paasitissavai inuit sukujuillu tassaniiginnartartut, aamma takusinnaanagillu tusaasinnaanngikkaluaraanni.

• Meeqqap perungassusaa paasinnissinnaaneralu apeqqutaallutik: Meeqqat innalernermi sinittarfimmut qimaannarnagit ima pinnguarsinnaavusi: Meeqqat namminneq sinittarfimmit ”qimagutitissavaasi” ersilerunillu aggeqqullusi. Taamaalillutik avissaaqqanerup aqussinnaaneranik misigitissavai, ”qimagaaginnartutut” misigitinnagit. Tamatuma kingorna nersualaarsinnaavasi piffissami sivisunerusumi ”sinittarfimmit qimagutitissallusi” sapiissuseqarnerannut. Atisassinnut allunaasamik qilersisinnaavusi, taamaasillutik meeqqat siniffimmut utertissinnaassammasi. Pinnguaat nuannersuuvoq!

Aalajangereerussi, periaatsit qulaani taaneqartut qanoq katigullugit misilissallugit, allattorsinnaavasi allallugulu, meeqqat ataasiakkaat suna pitsaanerpaamik qisuariarfigineraat.