Ataatsimiinneq 7/10

Meeraq ilaqutariinni paarsisartuniittoq inuusuttuaranngoraangat

Inuusuttuaqqat tamarmik inuunerminni piffissamik aalajangiisumik nalaataqartarput. Timi allanngulersarpoq, ikinngutinut pissutsit angajoqqaarsianut pissutsinit tassanngaannaq pingaarnerulertarput. Imaassinnaavoq inuusuttuaraq aamma peerartaartoq? Aamma atuarfimmi nutaanik piumasaqaateqartoqalerpoq, kiisalu meeraanerup inersimasuunerullu killinga tikinneqarluni.

Ukiunit siusissunit tunuliaqutit nalorninartut pissutigalugit, ilaqutariinni paarsisartuni piffissaq inuusuttuaraaffiusoq annertuumik unammillernarsinnaasarpoq, misigissutsillu nikerarnerat nalinginnaasumit sakkortunerusinnaasarlutik. Piffissami tamatumani attuumassuteqarneq pillugu apeqqut muminneqartarpoq, kiffaanngissuseqaleriartorneq qanoq ililluni pitsaasumik ingerlanneqarsinnaaneranik apeqqutinngorluni, taamaasilluni inuusuttuaraq ilinniagaqassammat kiffaanngissuseqarlunilu inersimasutut inuuneqalissalluni. Meeqqat naalungiarsuunerminni sakkortuumik atornerluisoqarneranik annaasaqarnermilluunniit misigisaqarsimasut, siusinnerusukkut inuusuttuaranngorajuttarput (ilimanarpoq tamanna inuuinnarniarnermut timip qisuariaatigigaa) ilaasa 8-10-nik ukioqaliinnarlutik ikaarsaariarfik taanna tikittarpaat.

Inuusuttoq inuunerminik artornartumik aallartitsisimagaangat, inuusuttuaraq angajoqqaarsiaminut annertuumik unammillernarsinnaasartoq ilisimatusarneq tikkuussivoq. Qanoq ilillusi isumassuisinnaavisi siunnersuisinnaallusilu, peqatigisaanillu inuusuttoq nammineq aalajangiisinnaasunngorlugu nammineersinnaasunngorlugulu tapersersorlugu?

Inuusuttuaranngulernermi inersimasunut pissutsit allanngortarput. Nammineertussanngorluni ineriartornerup pissusissamisoortumik ilaatut assortuunnerit aaqqiagiinnginnerillu pilersinnaasarput. Taamatut ukioqarnermi timikkut attorneqarneq qanittumiinnerlu qinngarnarsinnaasarpoq, ilaanneeriarluni aaqqiagiinnginnerit paarsinerup unitsinneqarneranik kinguneqartarput. Inuusuttoq inuusuttunik allanik ilagisartagaqalersinnaavoq, angajoqqaarsiallu isumaqarsinnaallutik tamanna inuusuttumut pitsaavallaanngitsoq. Tamatuma kingunerisinnaavaa inuusuttuaraq imminut mattuttoq, tusaajumanngitsoq imaluunniit angajoqqaarsiaminut akerliulluni tunngavilersuuteqartuaannartoq il.il. Inuusuttup killissani unammillerfigalugit aallartikkaangat angajoqqaarsiat qanoq qisuariaateqartarnerat sorpassuarnut apeqqutaavoq.

Inuusuttuaranngulertoq pineqartoq imminut nutaamik kiffaanngissuseqartumillu isigilertussaavoq, amerlasuutigullu meerarpaluttumik pinngitsuuisinnaanngitsutut pissusilersoriarluni angajoqqaarsiami tikitsaaliornerisigut kiffaanngissuseqarneq angorusullugu. Amerlaqisutigut inuusuttoq angajoqqaavimminut ilaquttaminullu uternissamik pisariaqartitsilersarpoq, paaserusullugu suna sinnattuaqinerunersoq sunalu piviusuunersoq. Tamanna pissusissamisoorpoq, angajoqqaarsianili tamanna annertuumik qulalersitsisarpoq: qaqugukkut piumasaqaatit aalajangiussat atussavagut, aamma qaqugukkut akisussaaffimmik annertunerusumik tunniussissaagut?

Apeqqutit imatut ittut ”Unnukkut qassinut angerlarsimassaanga – festertut ornissinnaavakka – siutikkut pututissinnaavunga, il.il.?” nalinginnaasumik takkuttassapput. Misissuinerit takutippaat inuusuttut inissinneqarsimasut ukioqatiminnut malinnaaniarnermut annertuumik ajornartorsiuteqartartut: angajoqqaarsiat (tunngavissaqarluartumik) annilaangagigajuttarpaat inuusuttoq soorlu festimut illoqarfiliarnissamulluunniit akuerigunikku qanoq pisoqarumaarnersoq. Tamanna isumaqarsinnaavoq angajoqqaat nalinginnaasumik pissuserisartagaannit anneroqisumik killiliisartut, tamannalu inuusuttumut annertuumik ajornartorsiutinngorsinnaavoq.

Inuusuttuaqqamut ikinngutit atuaqatillu angajoqqaarsiat takorloorsinnaasaannit annerusumik pingaaruteqarput. Tamanna paasineqartariaqarpoq akuerineqarlunilu. Taamaattumik illit angajoqqaarsiatut tassaassaatit inuusuttup ikinngutiminut atatillugu unammilligassai pillugit “inuk tusarnaartoq oqaloqatigineqartartorlu”. Aaqqiissutissanut tamatigut siunnersuuteqartariaqanngilasi, oqaloqatigiinnerimmi namminermik akuersaartumillu isummersimaneq annertuumik ikiuutaasinnaammata. Assersuutigalugu inuusuttup ataatarsiani imatut eqqaamavaa: “Suut tamaasa pillugit tamatigut oqaloqatigisinnaasarpara – tusarnaaginnartarpaanga sunnguamilluunniit isornartorsiunngisaannarlunga“.

Ajornartorsiutinut tamakkununnga ajornaatsunik aaqqiissutissaqanngilaq, pitsaasumilli siunnersuisoqarsinnaavoq iluaqutaasinnaasunik. Ilissi angajoqqaarsiatut paasinninnissinnik inussiarnersumik, eqqissisimasumik aalajangersimasumillu takutitsinissarsi, kiisalu aalajangernernut maleruagassanullu tamassi isumaqatigiinnissarsi pingaarnerpaavoq.

Meeqqap inuusuttuaranngulernissaanut piareersaariaatsit pingaarnerpaat ilagaat piffissaq ukiualunnik sioqqulluguli meeqqap piareersalereertarnera. Ilaatigut meeraq ulluinnarni suliassanut tigussaasunut peqataatittarlugu, taamaasilluni kingusinnerusukkut nammineersinnaalerniassammat. Ilaatigullu inuusuttuaranngulernermi timi qanoq allanngorumaarnissaa kiisalu inersimasunut ikinngutinullu pissutsit pillugit piareersaataasumik oqaloqatigisarlugu.