Ataatsimiinneq B/10
Qupperneq 3/5 Meeraaqqat isumaasuisuinik suleqateqarneq: Ulluunerani paarsisartut, meeraaqqerivik meeqqerivilluMeeraaqqat isumaasuisuinik suleqateqarneq:
Ulluunerani paarsisartut, meeraaqqerivik meeqqerivillu
MEEQQAT MIKISUT SUNIK PISARIAQARTITAQARPAT, AAMMA ALLAT QANOQ TAAKKUNANNGA TAPERSERSUISINNAAPPAT?
Meerarsiat mikisut meeqqani anginerusunit toqqissisimanissamut inersimasumullu aalajaatsumut qanitaqarnissamut pisariaqartitsinerupput. Ulluinnarni isumassuisut taarseraattarnerat meeqqanut artornartarpoq, sulilu artornarnerusarluni meeqqanut ilissinnut pitinnatik sumiginnagaanermik misigisarsimasunut. Taamaattumik ajornanngippat meeqqap marluk-pingasunik ukioqalernissaa tikillugu angajoqqaarsiaminnit paarineqarnissaat pitsaanerussaaq. Ilaanneeriarlunili angajoqqaarsiat aamma suliffimmik allamik nakkutigisaqartarput, meerarlu toqqissisimalersinniarlugu qanoq iliortoqassava?
Meeraaqqerivimmik meeqqerivimillu oqaloqateqartarnerit: Meeraq paaqqinniffimmi aallartitsinnagu, ilissi paarsisinnaatinnasi meeqqamik paaqqinnittussat naapikkussigit pitsaviussaaq. Meeqqap inissinneqartinnani isumassorneqannginnermik misigisimasai oqaluttuarisigit, maannalu aatsaat ilissinnut attuumassuteqalernissaq ilikkariartuleraa. Taamaattumillu paaqqinniffimmi inersimasunut aalajangersimasunut imminerminik toqqissisimalersitsisunik qanilaarfiginnittunillu qanitaqarnissaq atorfissaqartinnerugaa.
Assersuut:
Âkaja marlunnik ukioqarluni ilaqutariinnut paarisartunut nuuppoq. Aallaqqaammut anaanarsiani inimit aniinnartoq ersilerujussuartarpoq saammarsagassaajunnaarlunilu qiasarluni. Maanna pingasunik ukioqarpoq meeqqerivimmilu aallartittussaalluni, anaanarsimali qimannissaa suli annertuumik ersissutigisarpaa. Anaanarsiaata perorsaasoq oqaloqatigeqqaarpaa, meeqqerivimmi ullap tungaa sivisujaamik issiaqatigiipput, inersimasoq nutaaq Âkajap sungiunniassammagu. Aallaqqaammut anaanarsiaa nalunaaquttap akunnerata affaata missaa meeqqerivimiittassaaq, niviarsiaqqap meeqqanik allanik pinnguaqateqalernissaata tungaanut. Âkaja taamaallaat nalunaaquttap akunnera ataaseq marlulluunniit aallaqqaammut meeqqerivimmiittarpoq, piffissalli ingerlanerani ima toqqissisimatigilerpoq, anaanarsiani inuulluaqqullugu aalateriffigisinnaalerlugu erniinnarlu meeqqanik allanik pinnguaqateqalerluni. Anaanarsiaata perorsaasullu isumaqatigiissutigaat Âkajap nammineq takutissinnaagaa qaqugukkut ersilernani inuulluaqqusinissamut piareersimanerluni, sivitsunngitsorlu meeqqerivik meeqqatulli allatut nuannaritigilerpaa.
SAMMISASSANUT SIUNNERSUUTIT
Meeqqat mikisut angerlarsimaffiup avataani paarineqarnissamik ilikkartinniarlugit, paaqqinnittarfimmi aallartitsinnagit avissaarnermik sungiusarnissaat isumassarsiatsialaasinnaavoq:
- ”Kuukkoortaqattaarnermik” meeraq pinnguaqatigalugu. Inersisup toqqissisimanartup – aamma takusinnaanngikkaluaraanniluunniit – maaniinnerannik meeqqap takorluuisinnaaneranut iluaqutaasarpoq.
- Angerlarsimaffimmi ”meeqqerivimmi aallartinneq” pinnguaatigisarlugu. Meeqqap meeqqerivimmukarnini – assersuutigalugu inuusat atorlugit – pinnguaatigereeraangamiuk, inersimasumik nutaamik naapitsilluni meeqqanillu allanik pinnguaqateqarluni, piviusumik aallartinnissani annertuumik oqinnerutissavaa. Angajoqqaarsiat angajoqaajusuusaarlutillu meeqqamillu tigusisussatut perorsaasuusaarsinnaallutik, aamma anaanarsiaq inuulluaqqullugu aalateriffigalugu.
- Meeraq sininniassatillugu: meeraq qinnuigisiuk oqaqqullugu siniffini ersilissutiginngisaminik sapinngisamik ungasinnerpaamut qimassagissi – taamatut iliornikkut qimanneqassanngilaq, siniffimmili qimatsinissarsi nammineq aalajangeeqataaffigissallugu.
Taakku siunnersuutaaluinnaapput. Ilaquariissinni tamanna aamma oqaloqatigiissutigisinnaavarsi, meeraq ersilernani avissaarneq qanoq ilikkarsinnaaneraa amerlanerusunik siunnersuuteqarfigisinnaallugu. Imaassinnaavoq nammineq meeqqasi aamma isumassarsiaqartut?
Ilissi maani qanoq eqqarsarpisi isumassarsillusilu?