Ataatsimiinneq 5/10
Qupperneq 2/7: Annaasaqarneq avissaartitaanerlu pillugit aammasumik oqaloqatigiissinnaaneq sooq pingaaruteqarpa?Annaasaqarneq avissaartitaanerlu pillugit aammasumik oqaloqatigiissinnaaneq sooq pingaaruteqarpa?
Ataatsimiinnermi matumani angajoqqaarsiat katsorsaasuussatut inissinnginnissaat siunertaavoq. Akerlianilli aliasunnermut avissaartitaanermullu qisuariaatit, qisuariaatillu taakku meeqqat inuusuttullu pissusilersutaanni qanoq takuneqarsinnaasarnerat ilisimaneqassapput. Tarnip pissusaanik ilisimasalik tusaamasarsuaq, Freud soorlu oqarsimasoq: “Katsorsaasut pitsaanerpaat tassaanngillat tarnip pissusaanik ilisimasallit – tassaapput taakku meeqqanik ulluinnarni sullissisartut”.
Arlaannik annaasaqarneq inuunerup ilagiinnarpaa, namminerlu imminik ajoqusiisuunani. Ilisimatusarnerulli takutippaa, annaasaqarnerit oqaloqatigiissutigineqarneq ajortut attaveqarfigisanut periutsinik ingerlaartitsilersartut, misigissutsinillu ajoqusersuiuaannalertarlutik, ilikkagaqarnissarlu kiisalu inooqatigiinnermi ineriartornissaq aporfeqalersittarlugit. Tamanna pissusilersuutitigut ajornartorsiuteqarnikkut, imminut ikilernikkut, kiisalu anniaateqarneq annikillisinniarlugu inuusuttuunermi pinerlunniartarnermut atornerluinermullu ajornannginneroqisumik pulanikkut takuneqarsinnaasarpoq.
Taamaattumik annaasaqarnermi artornartumillu avissaaritaanermi annaasaqarneq namminermi aalajangiisuunngilaq, tamatumali qanoq qaangerneqarnissaa aalajangiisuulluni, taamaasilluni misigissutsit eqqississammata pisimasoq inuunermi misilittakkatut nutaamillu nukissaqalersitsisutut akuersaarneqarsinnaasunngorlugu inuunermilu atorneqarsinnaasunngorlugu. Meeqqani inuusuttunilu sullitassinni ajornartorsiutit amerlanersaat annaasaqarnermik misigisaminnik oqaloqateqarsinnaannginnerannut tunngasuupput.
Assersuutigalugu Canadami misissuinerit takutippaat, naggueqatitta Inuit nunaqarfianni 500-nik innuttaqartumi ukiup ataatsip ingerlanerinnaani inuusutut aqqaneq marluk imminnut toqussimasut. Inuusuttunut oqaloqatigiinnermut eqimattakkuutaat aaqqissuunneqarmata, nunaqarfimmilu kikkut tamarmik oqaloqatigiinnernut akuutinneqalermata, ukiuni tulliuttuni imminut toquttoqanngilaq. Nipangiussiinnarneq oqaloqatigiinnerlu assigiinngissutituaavoq!
Ataatsimiinnermi matumani annaasaqarneq pillugu qanoq annertunerusumik ammasuunissaq ineriartortissinnaanerissi pineqarpoq, taamaasilluni meeqqat inuusuttullu namminneq ajornartorsiutitik pillugit pitsaanerusumik paasinnissinnaanngussammata. Siullermik ilissi nammineq ilisimasasi naleqaqisut isiginiariartigit, taakku annaasaqarneq avissaartitaanerlu pillugit meeqqanik inuusuttunillu oqaloqateqarnissinni nukissaqarfittut atorsinnaagassigit.
ANNAASAQARNEQ NUKITTUSSUSERLU PILLUGIT OQALOQATIGIINNEQ
MARLUKKAARLUNI APERSUINERIT, TAMANUT 10 MINUTSIKKAARTUT
Artornartumik avissaartitaaneq, annaasaqarneq imaluunniit piffissami sivisunerusumi angajoqqaannit siullerpaamik avissaartitaaneq eqqarsaatigiuk.
- Taamatut pisoqarmat qassinik ukioqarpit?
- Tamatuma qanoq misigissuseqalersippaatit?
- Tamanna inersimasunut tatiginninninnut taakkununngalu pissusilersuutigisartakkannut qanoq sunniuteqarpa?
- Ikinnguteqarninnut tamanna qanoq sunniuteqarpa?
- Tamanna ilikkarusussutsinnut atuarninnullu qanoq sunniuteqarpa?
- Isumassuisunik nutaanik naapitsineq qanoq ippa – itigartippigit?
- Annaasaqarnerup qaangernissaanut inersimasut ilinnik ikiuinerpaasut qanoq iliorpat?
- Sulininni meeqqat inuusuttulluunniit ilittut qisuariaateqartut sumi takusarpigit?
Meeqqat inuusuttullu annaasaqarnerminni qanoq nalinginnaasumik qisuariartarnerannnik ilisimatusarnerup takutitai, aamma ilissi inuunermi misilittakkassanik qanoq atuisinnaanersi isiginiariartigu.
