Ataatsimiinneq 5/10
Qupperneq 4/7: Naalungiarsunnik meeraaqqanillu annaasaqarnermik qaangiisitsiniarluni ikiuineq: avissaartitaanermut qisuariaatit sakkortussusaasa annikillisinniarneratNaalungiarsunnik meeraaqqanillu annaasaqarnermik qaangiisitsiniarluni ikiuineq: avissaartitaanermut qisuariaatit sakkortussusaasa annikillisinniarnerat
Sulinissinni meeqqap tamatigut nuannaartuartuunissaa siunertaanngilaq. Avissaartitaanermi meeqqap qisuariaataasa sakkortussusaat annikilliartuaartissinnaagussiuk, meeraq nalinginnaasumik qisuariaateqarsinnaasunngorlugu ikiorsimavarsi. Tamakkiisumik tunuarterneq naapertuutinngilaq, ittuulaarnerli sunnertianerlu nalinginnaapput – assigiinngissutituaat tassaavoq qisuariaatip qanoq sakkortutiginera. Inimit anigussi meeqqap sakkortoqisumik tatamaalertarnera nalinginnaanngilaq, inimilli anigussi meeqqap ilaanneeriarluni qiasarnera imaluunniit pakatsilaartarnera nalinginnaalluinnarpoq.
Aaku siunnersuutaaluit atorsinnaasasi. Suut iluaqutaanerannut angajoqqaarsiap meeraaqqallu pineqartup akornanni pissutsit ataasiakkaat apeqqutaalluinnarput. ”Eqqortumik” iliorniassanngilasi. Malussarissuuniarsarigitsi, aaqqiissutit nammineq periutsissinnik akoorsigit, meeqqallu suliniarnissinnut qanoq qisuariaateqartarnera pillugu ullut tamaasa allattugaqarlusi.
- ”Isumassuisup pissusilersuutai toqqissisimalersitsisut”-ni uuttuutit tallimaasut sungiusarsigit. Meeqqamik annertuumik tunuarsimaartumik imaluunniit ataavartumik eqeruloorinnittuartumik pitsaanngitsumik sunnertinnani sulinissaq ajornakusoorpoq. Meeqqamik nalinginnaasumik qisuariaateqarneq ajortumik ajornakusoortumik sullissisariaqarninni, attaveqarfigineqarnissamut imminut ammasuutinnissannut qanoq innerit pillugu allat (uiit/nuliat, ikinngutit) akuttunngitsumik oqaloqatigisinnaasariaqarpatit.
- Toqqissisimasumik aallaaveqalersitsiniarlutit timikkut qanimut attaveqarneq atortaruk: Naalungiarsummik tagiartuinerusinnaavoq, imaluunniit meeraaqqamik akuttunngitsumik kissumiarnerusinnaalluni. Timikkut qanimut attaveqarneq attaveqarnermut periutsit nalinginnaasumik ingerlaasiinik eqeersaasuusarpoq. Annertuumik naammagittassaatit, meeraq nalinginnaanerusumik attaveqarfigisamut pissusilersulersinnagu, soorlu pakkunneqarnermik, aparneqarnermik, sarliarneqarnermik imaluunniit attuualaarneqarnerminik nuannaarutiginnilluni, qaammatit ukiulluunniit ingerlasinnaapput.
- Misigissutsissinnik erseqqissumik takutitsinissaq annertuumik eqqumaffigisiuk – allaat naalungiarsummik meeraaqqamilluunniit attaveqaraangassi kiinarsornersi nipimillu atuinersi ingasattajaarussinnaavarsi.
- Najuunnersi meeqqamut takutissiuk naatsorsuutigalugulu meeqqat nalinginnaasumik pisariaqartitaannit annerusumik toqqissisimanissaq kiisalu sivisunerusumik najuunnissarsi pisariaqartikkaat.
- Meeraararlu toqqortaanneq imaluunniit kuukooqattaarneq akuttunngitsumik pinnguaatigisarsiuk. Taamatut pinnguartarneq meeraaqqap avissaartitaanermik nuannersutut quianartutullu aqutsilersinnaaneranut iluaqutaavoq. Meeqqap ilissi najuuttuartutut takorluugaqalernissaannut sammisaq iluaqutaasarpoq. Ilissi timikkut najuunnissi pinngitsoorsinnaanerata annikilliartortinneranut sammisaq aamma iluaqutaasarpoq. Pigisanik aamma toqqortaqartarsinnaavusi, meeraaqqallu ujarlertillugit – inuit pigisallu imaaliallaannaq takusinnaanngikkaluarlugit tusaasinnaanngikkaluarlugillu toqqissimalertitsumik suli maaneeqataajuarnerisa paasinissaanut tamanna meeqqanut iluaqutaasarpoq.
- Meeqqap inerisimassusia paasinnissinnaassusialu apeqqutaatillugit: Innarnermi meeqqap ineeraa qimannaarnagu imatut pinnguarsinnaavusi: Meeqqat namminneq sinittarfimminniit “anisissavaasi” ersilerunillu uteqqusinnaallusi. Taamatut iliornikkut avissaarneq nammineq nakkutigisutut misigisinnaavaat, ilissinnit qimanneqaannartutut misiginatik. Sinittarfimminnit sivisunerujartortumik ”aneqqusaasimanissassinnut” sapiissuseqarmata nersualaarsinnaavasi. Allunaasaaraq atisassinnut qilerussinnaavarsi, taamaasilluni meeqqat siniffimmik tungaanut utertillusi nusussinnaammasi. Taamatut pinnguarneq nuannersuuvoq!
Periutsit qulaani taaneqartut qanoq akuleriiaarlugit misiligutiginissaat aalajangereerussiuk allattorsinnaavasi, aamma allallugu meeqqat ataasiakkaat sunut pitsaanerpaamik qisuariaateqarnersut.
