Ataatsimiinneq 5/10
Qupperneq 6/7: Meeqqat inuusuttullu annaasaqarnermik qaangiinissamut ikiorneqartarneratMeeqqat inuusuttullu annaasaqarnermik qaangiinissamut ikiorneqartarnerat
Avissaartitaanermi qisuariaatit ilisimatusarfiginerisa erseqqissumik takutippaat angajoqqaarsianut ammasumik oqaloqateqartarnerup pingaaruteqassusia.
Meeqqap avissaartitaanermi misigisat pillugit oqaluttuartarneri tamarmik imaluunniit taakkununnga tusarnaarnerit tamarmik sunik misigisaqarsimanerminut misigissusaanik eqqarsaataanillu pitsanngoriartitsisarput. Eqqaamasat paasinninnerlu aaqqissorluarneqarugaangata annaasaqarneq pillugu misigissutsit tamatigut sakkukilligaluttuinnalersarput, kiisalu eqqaamasat paasinninnerlu aaqqissugaalluarnerulersarlutik. Meeqqap piffissap ingerlanerani meeqqatulli allatut toqqissisimalernissaa, taassumalu isummakkut pissusaanut aamma pinnguarusussusianut, paasiniaarusussusianut ilikkagaqarussusianullu ajoqutaanngitsumik aliasunnermik pissusissamisoortumik misigisaqarsinnaalernissaa tikillugu. Aliasunnerup tamarmiusup peersinnissaa sulinissinni siunertaanngilaq, meeqqalli sakkukinnerusunik paatsiveqarnerusunillu misigissuseqalernissaanut meeqqap ikiorneqarnissaa siunertaavoq.
Isumassuisut siusinnerusukkut annaasaqarneq ilumuunnginnerarpassuk, sianiginngitsuusaarpassuk imaluunniit suunngitsutut isiginiarsarippassuk, meeqqat namminneq qisuariaatiminnik aqutsisinnaassusertik pitsanngortissinnaassanngikkaat ilisimatusarnerup aamma takutippaa, tamannalu inuttut ineriartoqqinnerannut aserorsaataasinnaavoq.
Assersuut: siusinnerusukkut meeqqat meeravissiartaarineqaraangata, inissinneqaraangataluunniit kanngusuutigineqartarpoq inooqataanikkullu ileqqunut akerliulluni. Meeqqat nalikinnerusutut misigisimanerat tamatuma kinguneraa, meeqqallu paasissallugu naammaginartumik ukioqalerlutik ”kinaassuserminnik kinaassuseqaqqusaanatik” paasigaangamikku amerlanertigut tuparujussuartarput.
Una video takujuk siornatigut angerlarsimaffiup avataanut inissinneqarnikut marluk imminut pisuutinnermik annaasaqarnermillu misigisaminnik oqaluttuartut
Meeqqat amerlaqisut kingunipiloqartitsinerat artornartumillu inuuneqalernerat tamatuma inerneraa. Siusinnerusukkut meeravissianngorsimasunik inissinneqarsimasunillu apersuinermit akissut nalinginnaavoq: “Suna pingaarnerpaanersoq pillugu arlaannaalluunniit uannik oqaloqateqarsimanngilaq – angajoqqaakka annaasimagikka – taamaattumik aliasunnera kanngusunneralu misigisimajuarpakka”.
Meeqqap siusinnerusukkut misigisimasani pillugit oqaloqateqarnissamut kiffaanngissuseqartutut misigisaqarfigisaanik inissaqartitsilernissaq oqaluttuassaqarnissarlu ilissi suliassaraarsi. Tamanna sammisat arlaqartut atorlugit pisinnaavoq.
Annaasaqarneq tamatuminngalu qanoq qaangiisarneq pillugu meeqqamik imaluunniit ilaqutariinni meeqqanik tamanik qanoq ilillusi qaqugukkullu oqaloqateqarnissarsi aalajangerussiuk isumassarsiatsialaavoq. Ulluinnarni nuannisaaqatigiinnermi pisinnaavoq – ualikkut imaluunniit unnukkut nerinerup kingorna pisinnaalluni.
Naammagittaritsi – meeqqap ukioqqortusiartornini ilutigalugu inerissutsimini ineriartornerminilu killiffimmut nutaamut killinnerit tamaasa annaasaqarnini pillugit oqaloqateqaqqinnerit pisariaqartissinnaavai isiginneriaatsinillu nutaanik nassaarluni.
Imaassinnaavoq piffissami aggersumi sivisuumi tamanna kisiat iliuuserisariaqarissi: Annaasaqarneq pillugu ammasumik oqaloqatigiinnerinnassigut aamma avitseqatigiinnissamut tusarnaarnissamullu piumassuseqarnissinnik takutitsiinnarnissigut meeqqat ikiminnik mamisitsinissaannut ikiorpasi.
Aamma ilaqutariit paarsisartusi imatut nassuiaatigisinnaavasi:
“Uagut ilaqutariitsinni angajoqqaanik annaasaqarneq, meeqqallu tamatumunnga pissusissamisoortumik qanoq qisuariaateqartarnerat pillugit suut tamaasa nalunngilagut. ”Tarniminnik qerititsillutik” ”misigissutsiminni mattullutik ”oqarlutillu suut tamaasa soqutiganagit tunuarterneq qisuariaatigigajuttarpaat. Naleqanngitsutut imminnut misigigajuttarput. Qisuariaatit tamakku tamarmik pissusissamisoorput, allanulli paasiuminaatsuullutik. Ilaqutariinnili maani meeqqat maanga pinngikkallaramik misigisimasaminnik qaangiiniarnerannik qanoq ikiorneqarnissaat pillugu sorpassuarnik ilisimasaqarpugut. Tamanna pillugu oqaloqateqarneq meeqqanut iluaqutaasarpoq, ikinnguteqalertarput atuarfillu nuannarileqqittarlugu. Annaasaqarnerup qanoq isumaqarnera, qanorlu tamatuma qanoq qaangerneqartarnera, naggueqatigiiullutalu tamatigut pissuseriarsimasatsitut nukittuunngortarneq tamatta immikkut ilisimasaqarfigaarput. Piffissarujussuaq ingerlasinnaavoq, tamatumali inuunermut nuannisaarnissamullu uterteqqittarpaatit. Imaassinnaavoq maannakkorpiaq upperinngikkit, meeqqalli amerlaqisut inuuneqaqqilersut inuunerminnillu nuannarinnittut takusareerpagut.“
Naleqanngitsutut misigisimanermut illersuutitut suut meeqqani inuusuttunilu takukulanerisi paasiniarsiuk. Piffissaq ilissi meeqqallu ajunngitsutut misigisimaffissi piffissaqarfissilu toqqarsiuk.
- Inunnut pingaaruteqartunut (anaanamut, ataatamut, qatanngutinut imaluunniit uumasuutinut attaveqarfigisimasanut) attaveqarneq annaaneqaraangat meeqqat qanoq qisuariartarnerat pillugu oqaloqatiginnikkusunnissinnik meeraq inuusuttorluunniit oqaluttuussiuk.
- Qisuariaatit meeqqani takusimasasi nassuiaatigisigit, oqaluttuullugillu meeqqat inummik pingaaruteqartumik annaasaqaraangamik tamanna amerlaqisut iliuuserisaraat. Assersuutigalugu:“Ilaanneeriarluni meeqqat arlaanniik asasaminnik annaasaqartarput, aamma annaasaqaqqinnissaq ersissutigisarpaat. Taava allanik oqaloqateqarumajunnaartarput ullorlu naallugu ineeqqaminniiginnartarlutik. Meeqqat amerlaqisut taamatut iliortarput, isumaqarpungalu tamanna silatusaarnerusoq – tassami kisimiivillutik ineeqqaminniiginnarunik arlaannillu ikinnguteqalernatik, taava ajattorneqaqissanngillat. Tamanna paasiuminartorujussuuvoq!“
Annaasaqarneq avissaartitaanerlu pillugit oqaluttuamik nammineq meeraanissinneersumik meeqqat oqaluttuunnissaat toqqarsinnaavarsi:
“Ilittut ukioqarallarama anaana ataatalu ulapittuaannartuupput, uangalu kisimiititaagajuttarlunga. Meeqqat allat ikinngutigiumagaagakkit t itigartitaasarpunga uumisaarneqartarlungalu. Taava aalajangerpunga ulloq naallugu ineeqqanniiginnartarniarlunga – allanut attaveqarusunngilanga, qularinnginnakku nuannarissanngikkaannga itigartillungaluunniit. Alliartorama paasilerpara meeqqat amerlaqisut taamatut iliortartut, isumaqarpungalu tamanna silatusaarnerusoq – taamaanneratigummi itigartitaaqqinnissamut imminut illersortoqartarami“.
- Meeraq qimagaasoq pillugu oqaluttuamik meeraq atuffassinnaavarsi imaluunniit nammineq oqaluttualiorlusi – assersuutigalugu Oliver Twist (imaluunniit atuakkiamit inuk alla, meeqqap imminut assersuussinnaasaa). Piffissap ingerlanerani meeraq aperisarsinnaavarsi inuup qanoq misigisimanera eqqarsaateqarneralu ilisarisinnaaneraat. Kalaallit oqaluttuatoqaanni meeqqamut inuusuttumullu qimagaasumut, taamaattorli ingerlalluartumut tunngasoqarpa? (Kunuk iliarsunnguaq, Kaassassuk, Anngannguujunnguaq).
- Meeqqamik pinnguaqateqarnissinni inuusat titartakkallu atorsinnaavasi, isiginnaartitsissuteeraliorlusi imaluunniit marrarmik ilusilersuillusi. Oqaluttuanik meeqqap itigartitaaneranut imaluunniit angajoqqaaminik annaasaqarneranut, pissumillu aqutsisinnaalerneranut tunngasunik oqaluttuassarsioritsi.
- Meeqqat ukioqqortunerit inuusuttuaqqalluunniit: Oqarasuaammik angallattakkamik (assiliivimmilluunniit videoliuutaasinnaasumik) tunisinnaavasi, angajoqqaaminnillu allanilluunniit annaasaqarnerminni qanoq qisuariaateqarsimanerat, taamaattorli inuunerissaalersimanerat pillugu filmeeraliornermut apersuinermulluunniit ikiorlugit. Aammattaaq inuusuttut inuusuttunik allanik attaveqarfigisinnaasaannik nassaarniarneranni ikiorneqarsinnaapput, assersuutigalugu Facebookimi attaveqaatiniluunniit allani.
- Meeqqat atuarfianni ilinniartitsisua attaveqarfigilluarussiuk: ”Inummik asasamik pigisamilluunniit nuannarisamik annaasaqarneq” qulequtaralugu ilinniartitsisoq qinnuvigiuk ullormik sapaatit akunneranilluunnit sammisaqartitseqqullugu. Ilinniartitsisoq ikiortigalugu meeqqat tamarmik annaasaqarneq pillugu assersuusiorsinnaapput, soorlu aataa, aanaa inulluunniit alla, imaluunniit pigisaq, titartakkat, isiginnaartitsissuteeqqat il.il. atorneqarsinnaapput. Meeqqap arlaannik annaasaqarneq pillugu oqaluttuarnissaannut qanoq ikiorneqarsinnaanerat ilinniartitsisorlu oqaloqatigiissutigisinnaavarsi.
Assersuutigalugu:
Taamatut iliornikkut meeqqap periusissiaata pissusiviusutigut ersineq maannakkorpiaq peersikkaa meeqqamut sallaatsumik takutissavarsi, sivisunerusumilli isigaluni meeraq aamma kiserliortunngortillugu. Meeqqat itigartitaaqqinnissaq imaluunniit nuannarisaminnik annaasaqarnissaq qanoq annilaanngatigisarneraat kingorna oqaloqatigiissutigisinnaavarsi.
Assersuutigalugu:
Imaluunniit: