Ataatsimiinneq 5/10
Qupperneq 3/7: Annaasaqarnermi meeqqat qanoq qisuariaateqartarpatAnnaasaqarnermi meeqqat qanoq qisuariaateqartarpat
Meeraq qisuariaateqartarpoq, aliasunninilu assigiinngitsunik takutittarlugu, apeqqutaalluni qanoq ukioqqortutiginersoq, angajoqqaaminillu avissaartinneqarluni paarineqartussanngorluni inissinneqarnermini qanoq paasisaqartigisarnersoq. Meeqqat aamma aliasunnertik assigiinngitsunik periuseqarlutik aqunniarsarisarpaat. Angajoqqaamik annaasaqarnermut inuit oqarajuttarput “ikilerneqarnerit tamarmik piffissap ingerlanerani mamittarput”, tamannali taamaallaat atuuttarpoq meeqqat angajoqqaaminnik imaluunniit attaveqarfigisamik allamik pingaaruteqartumik pingasut inorlugit ukioqarnerminni annaasaqaraangamik. Avissaartitaanerup kinguninngua ingerlaannaq angajoqqaamik inissaraluanni inummut allamut attaveqarfissaqalerunik, meeqqat angajoqqaaminnut attaveqarnerattulli sakkortutigisumik angajoqqqaarsiaminnut attaveqalersinnaasarput.
Meeqqap annaasaqarnera angajoqqaap toqusimaneranut tamatigut attuumassuteqartariaqanngilaq, kisiannili timikkut avissaartitaanerusinnaavoq, imaluunniit angajoqqaat meeqqamut asannittumik maluginiagaqarsinnaanatillu isumassuisinnaanngikkaangata meeqqap avissaartitaanertut misigisaanut tunngasinnaalluni. Angajoqqaaq timikkut najuussinnaavoq, meerarli isumagisinnaanagu, assersuutigalugu erninermut atatillugu nikallungarujussuarneq, tarnikkut nappaatit imaluunniit isumassuisup nammineq meeraanermini isumassorneqarsimannginnera pissutigalugit.
Meeqqap annaasaqarnermut qisuariaataasa qanoq sivisutigisumik qanorlu sakkortutigisumik atugaanerannut, isumassuisut nutaat meeqqamut qanoq attaveqarnissamik neqeroornerat apeqqutaasarpoq.
PIFFISSAQ AKERLIUFFIUSOQ PISSUSISSAMISOORTOQ – KIINNAMIK TAKUTITSINNGITSUMIK MISILIINEQ
Nalinginnaasumik meeqqat avissaartitaanermik imaluunniit isiginngitsuusaarneqarnermik misigisaqaraangamik piffissamik akerliuffiusumik aqqusaagaqartarput: qiasarput, toqqissisimajunnaarlutik saammarsaruminaallutillu, immaqa aamma isumassuisunit nutaanit qanittumik attaveqarfiginiarneqarunik itigartitsisinnaallutik. Tamanna piviusutigut ilumut tassaavoq pissusissamisoortumik peqqissumillu qisuariaateqarneq: meeqqap attaveqarfigisanut periusaa avissaartitaanikkut pissusissamisoortumik ingerlarsulersarpoq, annerusumik avissaartitaanissaq pinngitsoortinniarlugu. Taamatut qisuariaateqarneq Dr. Ed Tronick’ip kiinnamik takutitsinngitsumik misileraanerani “Still Face Experiment”-imi takuneqarsinnaavoq. Aallaqqaammut anaanaasoq tusaaniarpoq suleqataarusullunilu – taava qinnuvigineqarpoq kiinnamigut sumilluunniit takutitsiunnaassasoq. Naalungiarsuk ingerlaannaq anaaminut malugeqqusaalerpoq, tamaviaarujussualerluni, naggataagullu qissaserluni.
Misileraaneq pillugu videoliamit matumannga ajornaatsumik takorloorneqarsinnaavoq naalungiarsuk qisuariaateqarsinnaanngitsumik angajoqqaaqartoq sakkortuumik ersinermik misigisaqarsinnaasoq. Inuunermilu kingusinnerusukkut isumassuisunik angajoqqaarsianilluunniit nutaanik naapitsinermini ersineq tamanna qanoq aallarteqqittarnersoq.
MEEQQANI AVISSAARTITAANERMUT QISUARIAATIT SAKKORTUUT
Attaveqarfigisanut pissusilersuuteqannginneq:
Meeraq siusissukkut avissaartitaanerup kingorna inummik attaveqarfigisassaminik neqeroorfigineqanngikkuni, imaluunniit isumassuisut meeqqap qianeranut qisuariaateqanngippata, meeqqap qianissani sussakkiiginnavissinnaavaa, allaajunnaarlunilu meeraq eqqissisimasoq, soqutigisaqanngitsoq tunuarsimaartorlu. Tamanna ilumut aarlerisaarinermik takutitsineruvoq: Attaveqarfigisanut periuseq unissimavoq, meerarlu aliasuttuarnermik pissuseqalersimalluni. Imaassinnaavoq meeraq isumassorneqarnissamik imaluunniit qanimut atassuteqarfigineqarnissamik saammarsarneqarnissamillu neqeroorfigineqarnerminut annikinnerusumik qisuariaateqartoq, imaluunniit qisuariaateqanngilluinnarluni. Tamanna nikallungasunngornermut tunuarsimaartunngornermullu ineriartorsinnaavoq, meeraq ingerlalluarunnaarluni imaluunniit naammaginartumik alliartorunnaarluni. Taamatut qisuariaateqartarneq meeqqani siusissukkut isumassuisumik imaluunniit atassuteqarfigisamik arlaleriaqalutik taarseraattarnerannik misigisaqarsimasuni, aamma meeqqani assersuutigalugu meeqqat angerlarsimaffiini napparsimmavissuarniluunniit annikitsuinnarmik pissusilersoqatigineqartarsimasuni attaveqarfigineqartarsimasunilu takuneqarsinnaavoq.
Avissaartitaanermut sakkortuallaamik qisuariaateqarneq:
Avissaartitaaneq tassanngaannartumik sakkortoqisumillu pisimappat – imaassinnaavoq meeraq angajoqqaat qiatillugit sorsuuteqartillugillu oqartussanit politiinillu arsaarinnissutaasimasoq – taamaappat meeqqap nalinginnaasumik uippakajaartuarneq avissaartitaanissamullu ersissuteqartuarneq ineriartortissinnaavai. Imaassinnavoq ataasiarluni arlaleriarluniluunniit siusissukkut tupatsitaarujussuarnerit pissutigalugit attaveqarfigisanut periutsit misikkarissivallaarsimasut imaluunniit ”ingerlarsulersimallutik”. Taamaattumik inimiit aninerit tamaasa imaluunniit tunuinnarnerpit tamaasa meeraq ersiorujussualersinnaavoq tatamaalersinnaallunilu. Arlaannaanulluunniit nikinniannginnerpit tamatigut uppernarsarneqartuarnissaa pisariaqartippaa. Meeqqat avissaartitaanermut misikkarissivallaarsimasut imaassinnaavoq ilinnik iperaanaveersaartuassasut, sinilernissaq annertuumik ajornartorsiutigalugu aammalu toqqissisimaneq saammarsagaanissarlu atorfissaqartittassallugu, allaat sivikitsumik pissusissamisoortumillu avissaartitaanerup kingorna piffissami sivisoqisumi. Tamanna meeqqanut angerlarsimaffiup avataanut inissinneqarsimasunut piffissami siullermi ajornartorsiutaagajuttarpoq.
EQIMATTAKKUUTAARLUNI OQALLINNEQ
- Meerarsiassi inissinneqarnerisa kingorna tunuarterneq imaluunniit avissaartitaanissamut sakkortuumik ersissuteqarneq taakkunani takusimavisiuk?
- Tamanna qanoq sivisutigiva (tamanna unissimappat imaluunniit maanna sakkortuallaarunnaarluni)?
- Meeqqamut misigissutsissinnut tamanna qanoq sunniiva?
- Nammineerlusi nikallungasutut imaluunniit meeqqamut isumassuisutut itigartitaaneq misigisimavisiuk?
- Meeqqap avissaartitaanissamut sakkortuumik ersissuteqarnerata ilissi nalinginnaasumik sivikitsumik avissaarnernut ersilersippaasi, soorlu meeqqap sivikitsuaraannarmik kisimiitilaarnissaanut?
- Meeqqap akinngippasi imaluunniit ilissinnut ataavartumik pakkusimaarinnittuarneranut, inimillu aninissassinnik ersissuteqarneranut qanoq qisuariaateqarsimavisi?
