Ataatsimiinneq 4/10
Qupperneq 2/7: Suliassat attuumassuteqarfigisallu sulissutigineratSuliassat attuumassuteqarfigisallu sulissutiginerat
Meeqqat inuusuttullu tamarmik inersimasunik aalajaatsunik, qanimut attuumassuteqarfigilersinnaasaminnik pisariaqartitsipput. Meeqqat inuusuttullu toqqissisimanartunik angajoqqaaqarlutik peroriartortut, avissaartitaaneq sukkasuumik aqussinnaalertarpaat. Meeqqat ataasiakkaat angajoqqaaminnit avissaartitaaneq ersissuteqaratik aqussinnaajumallugu periutsinik ilikkariartuaalertarput. Angajoqqaat nalinginnaasut nalunngilaat naalungiarsuk qanilaarnermik annertuumik pisariaqartitsisartoq, meerarli mikisoq meeqqerivimmi aallartikkaangami atualeraangamiluunniit, ima toqqissimatigisarpoq, aallartinnissani qilanaariinnartarlugu, inuusuttuaranngornermilu assersuutigalugu nuannaarlutik efterskoleriarsinnaapput, tatigalugu angerlarsimaffimminni tamatigut toqqissisimasumik aallaaveqarlutik.
Meeqqalli inissinneqarsimasut toqqissisimaneq taamatut ittoq misigisarsimanngilaat, taamaattumik avissaartitaaneq qaangissallugu taakkununnga ajornakusoornerujussuuvoq. Meeqqap ilaqutariinnut paarsisartunut pisinnani, angajoqqaaminnit atornerluisuusunit nakuusertartunilluunniit sumiginnagaaneq misigigajuttarsimavaat, immaqa assigiinngitsunik amerlaqisunik isumassorteqartarsimapput, imaluunniit sulisut ulapeqisut suliassaqarpallaartullu naapittarsimallugit. Taamaattumik meeqqat paarisat amerlaqisut nalinginnaasumik paarineqarnerminni isumassorneqarnerminnilu nalinginnaasumik qisuariaateqartanngillat, toqqissimanermillu misigilernissaannut piffissaq sivisoqisoq ingerlasinnaavoq. Ilisimatusarnerup takutippaa inissinneqarnermiit pingaartumik ukioq siulleq annertuumik uippakajaartutut, taamaattumik naammagittarneq isumassuinerlu pinngitsoorneqarsinnaanngillat.
Taamatut isigalugu ilissi angajoqqaarsiatut tassaavusi meeqqamut inissinneqarsimasumut inuit pingaarnersaat.
Meeraq amerlasuutigut inooqataanissamut ulluinnarnilu suliassanik imminik ilinniartitsisinnaasunik angajoqqaaqartarsimanngilaq, taamaattumik angoqqaarsiaminit ilinniartinneqarnissaq tatigisariaqartarlugu. Meeqqap angajoqqaaminit ilikkarsimasariaqaraluani, maanna ilissinnit ilinniartariaqarpai. Akisussaaffik taanna oqimaassinnaavoq, aammali tunissutaalluni: Meeqqap toqqissisimasumik aallaaveqalernissaa iluatsikkussiuk, inuunermini pitsaasumik tunngavissaqalersimassaaq.
Suleriaatsikkulli tamanna suliassaavoq annertooq. Pingaartumik meeqqat arlaqartut akisussaaffeqarfigigussigit. Tamanna erseqqinnerusumik isiginiariartigu.
Ulluinnarisassinni meeqqanik sullissigussi, maluginiakkasi suliassanut attuumassuteqarfigisanullu sammititaanerat nikerartuaannartarpoq, tassalu ulluinnarni suliassat kiisalu meeqqamik pissusilersoqatigiinnermi qanoq pisoqarnera nikerarfigisarlugit:
Suliassanut sammititsineq: Meeqqat inuusuttullu peqatigalugit sammisat, tamatumani suliassap naammassinissaanut meeraq akuutissinnaavarsi. Assersuutigalugu atisalersorneq, meeqqap asannissamik ilinniartinnera, nangermik taarsiineq, piffissaq eqqorlugu innarneq il.il. Tamakku tamarmik meeqqap pisariaqartitaasa eqqortinnissaannut pinngitsoorneqarsinnaanngillat (nerineq, sininneq, sammisaqarneq), aamma ullup ingerlanerani pissusissamisoortumik tulleriinnilersuisinnaaneq. Meeqqanut inuusuttunullu ullup ingerlanerani tulleriinnilersuinerit siumut pilersaarusioreernissaat siunertaavoq: piffissani aalajangersimasuni nerisarluni, atuarfimmi skemaqarluni, piffissani aalajangersimasuni ilinniagasserisarluni, il.il.
Attuumassuteqarfigisanut sammititsineq: Suut tamarmik atuumassuteqarfiginninnermut tunngasut: attaveqatigiinneq, oqaloqatigiinnerit, eqqarsaatit, misigissutsit, isumassarsiat, aliasuutit nuannaarutillu pillugit oqaloqateqarneq.
Angusaqartoqaraangat imaluunniit pissusilersuut kissaatigineqartoq takutinneqaraangat nersualaarinnittarluni. Nammineq eqqarsaatigeqqaagaanngitsumik misigissusisi qisuaariaatisiluunniit erseqqissumik takutittarlugit, meeraq inuusuttorluunniit akigaangassiuk, ilissi qanoq pissuseqartarnissinnut naleqquttumik.
Meeqqamik inuusuttumilluunniit oqaloqateqarnerusinnaavoq, qungujunnerusinnaavoq, pakkussinerusinnaalluni, immaqa meeqqap misilissallugu ersissutigisaa pillugu oqaloqatigiinnerusinnaalluni il.il. Inuttut naleqquttumik attuumassuteqalernissaq siunertaavoq, tamanna toqqissisimanermik ammasuunermillu pilersitsisinnaammat. Oqaluttuatsialammik oqaluttuarluni imaluunniit quujanartumik oqarluni. Attuumassuteqarneq nukittorsarniarlugu meeqqallu inooqataanikkut misigissutsikkullu ineriartornera nukittorsaaviginiarlugit meeraq toqqissisimalersinneqartariaqarpoq.
”Inuk arfineq pingasunik ukioqarpoq, unnukkullu aalisakkanik nerisassanik igaqataasussaalluni. Aalisakkalli aggorniarnera ajornakusoorpoq, taava savik igippaa, qialerluni ineeqqaminullu iserluni. Taava arnarsiaata iserfigisariaqarpaa, tuppallersarlugu misileeqqitsinniarlugulu.”
Taamatut tigussaasumik suliassat Inummillu pissusilersoqatigiinnerup akornanni nikerartuartussaavoq. Nerisassallu piffissaq eqqorlugu qalatsinnissaat ajornakusuulissaaq. Taamatut suliassanut sammititsinerup Inummullu attuumassuteqarnerup akornanni nikerartuartussaavoq. Piffissalli ingerlanerani Inuk ima toqqissimalersitsigaa, tunniutiinnarnani imminut tatigilersimalluni – tamanna ukioq ataaseq tikivillugu sivisussuseqarpoq. Meeqqat toqqissisimanngitsut ilaqutariit ingerlariusaannut qanoq ulluinnarnilu tigussaasumik suliassat naammassinerannut piviusumik qanoq akuulersinneqartarnerat maluginiassallugu isumassarsiatsialaavoq.
Assersuutit suli marluk isiginiariartigit: siullermik arnaq tigussaasumik suliassanik taamaallaat eqqarsaateqartartoq, nangermik taarsiineq peqatigisaanillu meeqqamut pissusilersuuteqaqataanngitsoq. Kingornalu arnaq meeqqap nangianik taarsiinermini annertuumik pissusilersoqataasitsisoq akuutitsisorlu.
ATTUMASSUTEQARFIGISANUT SANNGIITSUMIK SAKKORTUUMILLU SAMMITITSINEQ: INGERLAASEQ MISIGISSUTSILLU
Attuumassuteqarfigisanut annikitsuinnarmik sammititsineq:
Arnaq una Bulgariami meeqqat angerlarsimaffianni sulisuuvoq, tassanilu sulisut suliassanik tigussaasunik taamaallaat suliaqarnissaat, meeqqanullu attuumassuteqannginnissaat kaammaatuinnginnissaallu isummiussaavoq. Taamaattumik nangermik taarsiinermini suliassani kisiat sammivaa. Sukkaqisumik naammassivoq meeqqallu tullia ornillugu. Attuumassuteqarfigisanut sammititsinnginnerup qanoq isumaqarnera erseqqippoq: niviarsiaraq timikkut inooqataanermilu ineriartornermigut sakkortuumik kinguarsimavoq, naak naammattunik nerisitaasarsimagaluarluni.
Attuumassuteqarfigisanut annertuumik sammititsineq:
Arnaq una aamma nangermik taarsiivoq – peqatigisaanillu meeraq assut oqaluffigalugu meeqqamullu imminut malugitinniarsaraluni. Suliassaq attuumassuteqarnerlu oqimaaqatigiississinnaavai – suliassani piffissaliussap iluani naammassivaa, peqatigisaanillu meeraq kaammattorlugu. Arnap taassuma meeraq suliassanik aallussinermik, nuannaarnermik, inuttut attaveqatigiinnermik, kingusinnerusukkut ilinniartitsisumik / perorsaasumik attaveqarnermut pinngitsoorneqarsinnaanngitsunik ilinniartippaa.
“Meeqqanik sammisaqarnissara suliassannillu tigussaasunik suliaqarnissara toqqartarunnaarpara. Ataatsimiinnermi matumani taakku marluk tamaasa ataatsikkut suliarinissaat ilikkarpara. Eqqissisimavunga meerartakkalu nuannisaarput. Taamatut iliornikkut meeqqat pinnguaqatigisinnaavakka, meeqqallu pakkuttarsinnaavaannga. Nalunngilaat qanorluunniit pisoqaraluarpat taakku pillugit maaniittunga.”
– Isumassuisup oqaaseqaatai