Ataatsimiinneq 4/10
Qupperneq 3/7: Suliassanut sammititsineq aamma attuumassuteqarfigisanut sammititsineq ulluinnarni qanoq akuleriissinneqartarpat?Suliassanut sammititsineq aamma attuumassuteqarfigisanut sammititsineq ulluinnarni qanoq akuleriissinneqartarpat?
Suliassanut sammititsinerup aamma attuumassuteqarfigisanut sammititsinerup akuleriissinnerinut periutsit pingasut aaku:
1. Suliassiitinnasi attuumassuteqarfigisanut sammititsineq tamatigut aallarniutigisarsiuk
Suliassiitinnasi attuumassuteqarfigisamut sammititsinerup aallarniutiginissaa ilisimaarigaanni, aaqqiagiinnginnerpassuit pinngitsoortinneqarsinnaapput. Attuumassuteqarfigisanut sammititsineq pissusilersoqatigiinnermi eqqissisitsisarpoq, taamaasilluni meeraq inuusuttorluunniit suliassamik naammassinnissamut piareersimassagami.
”Atuarfimmi ullugissaarsimagavit nuanneq, sunik misigisaqarsimanersutit tusassallugu nuannarisaqaara. Taava ullumikkut nuannisaarsimassaqaatit?… Nerereerutta nerriviiaaleruma ikiorsinnaavinga?”
2. Suliassat attuumassuteqarfiullu akornanni nikittarnerni aalajangersimakannersumik inooriaaseqarnissaq takutiguk
Suliassat attuumassuteqarfigisallu akornanni nikittarnerni aalajangersimakannersumik inooriaaseqarnikkut meeqqat inuusuttullu sumiinnertik paasiumarnerutissavaat.
”Angajoqqaatit oqaluuserigatsigit iluaq, tamanna illit pisariaqartikkakku…Maanna taakku puigorallalaarpagut, maannami uagut marluulluta ataatsimoorluta sulerinissarput tullinnguukkami – aqagu sisorariarnissannut piareersartussaavugut, poortuininnik ikiussavakkit?”
3. Meeqqat suliassanut tigussaasunut akuutissigit aamma oqaloqatigisarlugit
Meeqqat suliassanut tigussaasunut akuutinnerisigut ulluinnarisaq pillugu pissusissamisoortumik oqaloqatigiinnerit pilersinneqartarput.
”Nerrivilioqatigigamma iluaq – tusarusukkaluarpara sooq ullaaq Maloulu assortuunnersusi – immissinnut kamaakkassi?”
EQIMATTAKKAARLUNI OQALLINNEQ
- Ulluinnarni suliassat suliarineqartussat aamma meeqqamik oqaloqateqarnerup akuutitsinerullu akornanni ulluinnarni ajornartorsiuteqarpa – tigussaasumik suliassat suliarineqartariaqartut angumeriuminaassinnaagamik?
- Ulluinnarni suliassanik tigussaasunik suliarinnitsinni sapinngisamik maluginiarneqarnissaq ikioqatigiinnissarlu anguniarlugit qanoq iliorsinnaavugut?
- Suna ilissinnut pingaarnersaava imaluunniit pisariaqarnersaalluni – suliassanut sammititsinerup aamma attuumassuteqarfigisanut sammititsinerup akornanni ilissi angajoqqaarsiatut oqimaaqatigiissitsineq qanoq ilillusi piviusunngortittarpisiguk?
Ulluinnarni tamani tigussaasumik suliassanik attuumassuteqarfigisanut sammititsisoqarpat meeqqat akuullutik ingerlataqarsinnaapput ilikkariartorlutillu. Toqqissisimasumik aallaaveqarnermi allaat meeqqat sakkortuumik eqqugaasimasut angajoqqaarsiaasartuni taakkualu attaveqarfigisartagaanni inooqatigiinnermi piginnaasanik ineriartortitsiartuaalersinnaapput. Tamannali nalinginnaasumit sivisunerujussuuginnartarpoq.
Videomi matumani isumassuisumik meeqqanik igaqateqarnermigut attuumassuteqarfigisanik pilersitsisumik assersuut takusinnaavarsi.