Ataatsimiinneq 4/10
Qupperneq 5/7: Ilaqutariinni paarsisartuni ulluinnarni pissusilersoqatigiinnermut ilaalernissamut meeqqap piginnaasaanik tapersersuineq – inissisimaffinnik killissanillu paasinninneqIlaqutariinni paarsisartuni ulluinnarni pissusilersoqatigiinnermut ilaalernissamut meeqqap piginnaasaanik tapersersuineq – inissisimaffinnik killissanillu paasinninneq
Ilaqutariit ataasiakkaat tamarmik pissusilersoqatigiinnissamut namminneq maleruagassaqarput, ilaqutariinnilu ilaasut akornanni killissat qanoq malinneqarnissaat pillugu namminneq maleruagassaqarlutik. Taakku oqaluuserineqangaarneq ajorput, ”uagutsinnimi taamatut ittuuinnarnera” pissutigalugu. Meerarli killiliussanik immaqa misigisaqarsimanngippat, imaluunniit perorsaariaatsimit allaanerusumeerpat, angajoqqaarsiat maleruagassat oqaasinngortittariaqarpaat, qanorlu iliornermikkut takutillugit. Assersuutigalugu ilaqutariit namminneq meerartaat isumaqarajussinnaapput meerarsiaq allatut pineqartartoq, imaluunniit meeqqap allat ineeraannut isertarluni, imaluunniit misigissutsikkut sakkortuumik qisuariaateqartarluni pissusilersoqatigiinnermik paasinninnginnera kamassaatigalugu. Taamaattumik ilaqutariinnut ilaasutut misigilernissamut piffissarujussuaq ingerlasinnaavoq – aatsaat taamatut misigilersoqartarpoq ulluinnarni pissusilersoqatigiinnerit paasisimagaanni, piffissamilu sivisuumi sungiusarsimallugit.
Meerarsiat amerlaqisut inooqatigiinnikkut killissaritat malugiuminaatsittarpaat. Taamaattumik ataatsimoorluni maleruagassiornissaq isumassarsiatsialaasinnaavoq, pingaartumik angerlarsimaffissinni najugaqartunik nammineq meerartaqarussi.
Inoqutigiinnut ataatsimoorussamik maleruagassat pilersissigit
Ilaqutariinni paarsisartuni ataatsimiigitsi, tassani paasissagassiuk ilassi timikkut eqqarsartaatsikkullu inissaqartitsinerat qanoq ataqqineqassanersoq paasissagassiuk. Matumani meeqqat (meerarsiat namminerlu meerarisat) siunnersuutaasa tusaaniarnissaat pingaaruteqarpoq, pingaartumik ataatsimoorussamik malittarisassat oqaasinngortinnissaannut ikiorlugit. Allat ineeraannut isertoqarsinnaava imaluunniit pinngussanik avitseqatigiittoqarsinnaava? Allat ineeraannut isertinnani kasuttortoqassava? Illumi init ataatsimoorussat atoreeraanni, qimatsinnagit iluarsaassisoqassava, qanoq taamatut iliortoqartarpa? Nammineq ineerarisami tukatsitsisoqarsinnaava, matulli silataani pinnani? Ataatsimiinneq sapaatip akunneranut aalajangersimasumik sammisaasinnaavoq, taamaasilluni tamarmik tusaaniarneqartutut misigissammata, isumaqatigiinngissutillu qaangerneqarlutik.
Assersuutigalugu arnarsiaasup meerarsiani ikiorpaa illumi matunut allagartaaqqanik nivinngaassuinermut, taakkunani allassimalluni ”kasuttoqqaarlutit akineqarnissallu utaqqillugu aperillutilluunniit” (taamaallaat nammineq meeraviisa ineeraannut matui nivinngaavigineqarput).
Assersuut:
Arnarsiap panissiaminut 12-nik 13-inillu ukiulinnut atatillugu unammilligassaqarnerminik misigisaqarpoq, pingaartumik angerlarsimaffimmi ulluinnarni suliassanut atatillugu. Panissiaasa oqartussaatitaanera unammillertarpaat, piffissartillu namminneq aqunniarsaralugu. Suliassat suut qaqugukkut naammassineqassanersut maleruagassallu suut malinneqassanersut naalakkiutiginagu, suliassat tamaasa ilaatillugit inoqutigiinni tamanut atuuttumik pilersaarusioqqullugit niviarsiaqqat taakku marluk suliassippai. Niviarsiaqqat pilersaarummik eqqarsaatigilluagaasumik ineriartortitsipput, taannalu tulluusimaaqalutik inoqutigiit sinnerinut saqqummiuppaat. Pilersaarut nillataartitsivimmut nivinngarneqarpoq, tamarmik suliassanut sorlernut qaqugukkut akisussaaffeqarnersut malinnaaviginiassammassuk.
ULLUINNARNI IMMINNUT PAASEQATIGIISSINNAALERSITSINEQ
Meeqqamik inuusuttumilluunniit sumiginnagaasimasumik ilaqarneq ulluinnarisaq aaqqiagiinnginnerpassuaqartutut misinnarsinnaasarpoq. Ungasinnerusumulli isigaluni ilaqutariit pitsaanerusumik ingerlalersinnaapput, nammineq tunngaviusumik naleqartitat naammagittassuserlu tamatigut isummerfigineqartariaqartarmata, namminerlu killileeriaaseq suli ilisimaarineqalertariaqarluni. Taamatut iliornikkut imminnut paaseqatigiittoqarsinnaavoq ilaqutariinnilu paarsisartuni allat tunuliaqutaat paasineqarsinnaallutik.
Assersuutip matuma erseqqissisippaa allat timikkut eqqarsartaatsikkullu inissaqartitsinerannik minnerunngitsumillu pisariaqartitaannik paasinninnissaq qanoq pingaaruteqartigisoq. Meeqqamik ataatsimik arlalinnilluunniit paarisaqaraanni, meeraqatigilikkap namminermit pisunut allaanerusumik sooq qisuariaateqartarnera paasinera meeqqanut allanut (nammineq meerarisanut paarisanullu allanut) aalajangiisuusinnaavoq. Meeqqat attaveqarfigisanut pissusilersuutimikkut ajoquteqartut inooqatigiinnermi killissarititaasut ilikkarnissaannut ukiut arlallit atorsinnaavaat. Taamaattumik qanoq ilillusi immissinnut ataqqeqatigiissinnaanersi angerlarsimaffimmi meeqqanut allanut oqaloqatigiissutigisiuk, arlaat ”meeratsialattut” ”meerapalaatulluunniit” takutinnianngikkaluarlugit.
Assersuut:
Arnarsiaasup pingasunik meerarsiallip marlunnillu angerlarsimmaffimminni najugaqartunik meeraqartup meeraqatigiit akornanni annertuumik aaqqiagiinngittarnerit misigisarpai. Meeqqat assut assortuuttarput, oqaasinnguisoqartillugu ilaanneeriarlunilu timikkut annersaannerit pilersarput. Ullut arlaanni arnarsiap panissiani angajulleq Marie kisimeeqatigalugu allat tusagassarinngisaannik oqaloqatiginialerpaa. Mariemit tusaaniarneqarnissani assut ajornartorsiutigaa, taannami qaammatit kingulliit ingerlaneranni imminut mattukkaluttuinnarsimammat. Arnarsiap eqqarsartaatsimut nuutitsineq atorpaa, paasiniarlugu aaqqiagiinnginnerit amerlasuut pilersartut Mariep paasisinnaanngimmagu sooq qatanngutisiaata Maliup inuit nakuuserfiginiartuartarai. Arnarsiaata Mariemut nassuiaatigaa Malik inuunermini ukiuni siullerni annertoqisumik sumiginnagaasimasoq, taamaattumillu ilaqutariinni inooqatigiittut killissarititaasut malugiuminaatsillugit. Mariep maanna Maliup pissusilersuutai paasilluarsinnaanerulerpai, Malillu tatineqartutut misigilluni avammut sammititamik qisuariaateqaraangat eqqissisaaneq assut pikkoriffigilersimallugu.
”Qanoq innersugut assut oqaloqatigiissutigisarparput. Misigissutsit oqaluuserissallugit ajornakusoorsinnaavoq, tamannali pingaaruteqarpoq. Isumaqarpoq oqaloqatigiinneq taamatut ittoq aallartissallugu ajornakusoortuusoq, taamaattumik oqarfiginiartarpakka ’qaagit, maani issiaqatigiilaarta’ imaluunniit ’oqaloqatigiilaassagatta’. Taava oqaloqatigiittarpugut.”
– Inuusuttuaqqamut 15-inik ukiulimmut arnarsiaq.