Ataatsimiinneq 4/10
Qupperneq 5/7: Angerlarsimaffimmi inooriaatsip ulluinnarisallu eqqissisimasumik ingerlanniarneraAngerlarsimaffimmi inooriaatsip ulluinnarisallu eqqissisimasumik ingerlanniarnera
Meeqqat angerlarsimaffiup avataanut inissinneqartut angajoqqaaminnit avissaartitaaneq kisiat misigineq ajorpaat. Isumassuisunit nutaanit assigiinngitsunit aamma inissinneqarfigisanit avissaartitaanerit tulleriiginnartut misiginikuugajuttarpaat. Aammattaaq isumassuisut akornanni aaqqiagiinnginnerit amerlaqisut misiginikuusinnaasarpaat, assersuutigalugu angajoqqaatut oqartussaassuseq pillugu akerleriinnerit, imaluunniit angajoqqaarsiat aamma angajoqqaat akornanni isumaqatigiinnginnerit. Angajoqqaarsiallio aamma ulluinnarni najoqatigiinnermi aaqqiagiinnginnerpassuit pilersinnaapput. Meeqqat meeqqat angerlarsimaffiini najugaqarsimasinnaapput, taakkunani isumassuisut nutaat ullormut pingasoriarlutik naapittuartarpaat, sulisullu ilaat ullut ilaanni meeqqanik eqimattanik sullissisartut, ullunilu allani meeqqanik eqimattanik allanik sullissisarlutik. Arlaleriarlutilli inissinneqarsimasuusinnaapput. Meeqqat toqqissisimasumik sivisunerusumillu inersimasunik isumassorteqarfiusoq amigaatigigaangamikku, attaveqarfigisanut pissusilersuutit qularnerlu ineriartortissinnaavaat. Inuunermi kingusinnerusukkut inooqatigiinnermi pissusilersuutit nalinginnaasumik naammaginanngitsut ineriartortissinnaavaat, soorlu kamanniartarneq, sivikinnerusumik qalliinnarsiortumik attuumassuteqarfigisat, attaveqarneq inooqataanikkulluunniit akisussaassuseq eqqarsaatiginngilluinnarlugit.
Ulluinnarni attuumassutit ingerlalluarsinnaatinniarlugit, meeraq ilaqutariinnut ilaasutut misigisimatinniarlugu kiisalu allanut atalluinnartutut taakkunanngalu naleqartinneqartutut misigitinniarlugu, angajoqqaarsiat tamanna tunuliaqutaralugu amerlaqisunik eqqarsaatersortariaqarput pilersaarusiorlutillu. Ilaqutariit nalinginnaasut assigilluinnangajagaanik ulluinnarisat ingerlalluarsinnaaqqullugit inissisimaffeqalersigani aamma killissarititaasut inissinneqartinnagit annertuumik suliniartoqarajuttarpoq.
Ilaqutariit inuttaraat angajoqqaat Julie aamma Peter, taakku qitornaat Nuka aamma Kristian kiisalu meerarsiaat Ivalu aamma Isabella. Ilaqutariinni kikkut tamarmik ulapittuupput, angajoqqaallu isumaqarput ilaqutariittut najoqatigiinnissamut piffissaalatsinarsinnaasoq. Taamaattumik Julie aalajangerpoq ilaqutariit qaammammut ataasiarlutik illumi ataatsimiittassasut, tamatumani pissutsit artornartut oqaluuserinissaat inissaqartinneqartassalluni, kisiannili aamma misigisat nuannersut oqaluuserineqartassallutik. Ataatsimiitsigani kikkut tamarmik unammilligassatik, kiisalu ilaqutariinni inuunermi allannguinerit pisariaqartitatik allattortassavaat. Juliep meeqqanit isornartorsiorneqaraangami, imaluunniit maleruagassaatimi ilaannik isornartorsiuigaangata, meeqqat naveerneq ajorpai. Aamma meeqqat oqaaseqarusutsinnagit, pinngitsaalillugit oqartinniarneq ajorlugit. Taamaannera nammineq meeraanut meerarsiaanullu annertuumik eqqissisitsivoq, siumoortumik isummiussaqareernani pillarneqassananilu namminneq isummaminnik ernumassutiminnillu oqaaseqaateqarnissamut kiffaanngissusilerneqaramik.
ANGAJOQQAARSIAT ANGERLARSIMAFFIMMI SUNA SULIASSARIVAAT?
Inuusuttut, meeqqat angerlarsimaffiini aamma/ ilaqutariillu paarsisartuni peroriartorsimasut paasisassarsiorfineqarnerini, amerlaqisut nalinginnaasumik imminut annikitsuinnarmik naleqartinneq itigartitaanerlu misigisimasarpaat, ingerlatsiviulli iluani inissiineq pillugu oqaloqatigiissuteqartarsimannginneq angerlarsimaffeqanngitsutut misigisimasartut inissinneqarnerullu nalaani imminnut pingaaruteqartutut ilaqutarinnut ilaasutut misigisimanissamik maqaasisaqavinnertik, aamma angajoqqaaminnik isumassuisunilluunniit allanik pingaaruteqartunik annaasaqarnertik pillugit pisortani sulisut arlaannaannilluunniit oqaloqatigineqarsimannginnertik nassuiaatigaat. Siusinnerusukkut inissinneqarsimasut meeqqanit assigisaanik atugassaqartitaasunit inissinneqarsimanngitsunit peqqissusaat pitsaannginneruvoq, qaffasinnginnerusumik ilinniagaqartarput pinerlunniarnerusarlutillu. Tamanna pinaveersaartinneqarsinnaavoq ilaqutariinni paarsisartuni sulinikkut.
Meeqqat inissinneqarsimasut, inersimasutut ingerlalluarsimasut, tamarmik meeraanerminni isumassuisuminni ilisarnaatit sisamaasut nassuiaatigaat:
- Isumassuisoq aalajangersimasoq inuunerminnik soqutiginnittuusimavoq, imminnullu attaveqalernissaq akuersaarsimallugu. Arriitsumik ineriartornissamut piffissaqartitaasimapput.
- Kinaanertik ataqqineqartoq misigisimavaat, ”inuttullu nammineq inissaqartitaaneq” misigisimallugu.
- Ilaqutariinni paarsisartuni inooqatigiinnikkut nukittuumik kinaassuseqartuni peroriartorsimapput.
- Ilaqutariit najukkami avatangiisiminni pitsaasunik attavigisartagaqarput.
”Meeqqat ulluinnarisamut aaqqissugaasumik inuuneqartinnissaat pingaaruteqarpoq. Meeqqat ullormut pilersaaruteqarnissaq pisariaqartippaat. Illumi pisussaaffinnut, soorlu erruinermut, støvsugernermut, ineeqqami eqqiaanermut skemaqarpugut. Meeqqat anginerit suliassanut annerusunut soorlu aputaajaalluni nivannermut ikiuukkaangata qaavatigut kaasarfimmiussittarpakka. Pinngitsaalinissaat iluaqutaanngilaq, akissarsitinneqartariaqarput. Meeqqat arlaannik pitsaasumik iliuuseqaraangata nersualaarneqarnissaat tuiisigulluunniit pattalaarneqarnissaat uannut pingaaruteqarpoq.”
– Meeqqanut pingasunut, 6-nik, 12-nik 15-inillu ukiulinnut arnarsiaq.
”Aatsaat 13-inik ukioqarlunga arnarsiannut nuukkama errorsineq, natermik asaaneq, iganeq erruissummillu imaarsineq ilikkarpakka. Tamanna nuannaarutigeqaara.”
– Meerarsiaq 15-inik ukiulik.