Immikkoortoq 5/8

Meeqqat inuusuttullu eqimattat ineriartornerat pillugu teorii

 EQIMATTAT TOQQISSISIMASUT QANOQ INERIARTORTARNERAT PILLUGU TEORII

Ilisimatuup William Schutz ukiuni 30-ni apeqqut sulissutiginikuuaa: klassit imaluunniit inuusuttut taamungaannaq katitigaanikut eqimattatut qanoq suliassanik aallutarinnittunngortinneqarsinnaava?

Paasivaa, suliassanik tunniussinermik aallartiinnartoqarsinnaanngitsoq. Soorlu meeqqat ataasiakkaat inersimasumik toqqissisimasumik tunngavissamik pisariaqartitsisut, aamma meeqqat inuusuttullu ataatsimut toqqissisimasumik tunngavissamik ineriartortitsissapput. Eqimattat inersimasortaanut attaveqarnertik isumaqatiginninniutigalugulu misileraqqaassavaat, imminnullu attaveqarnertik paasiniaqqaassallugu. Aatsaat taamaalinermi suliassaminnik suliarinninnissaminnut toqqissisimalertarput. Kalaallip ilinniartitsisup oqarneratut: “Ilinniartitsinermit attaveqarnernik sungiusaanermut sulinerusarpugut”

Taamaattumik sullissisut eqimattanik aqutsissapput kiisalu meeqqat inuusuttullu toqqissisimanissaannut isumaqatiginninniarnerit tapersersussallugit. Matumani pisariaqarpoq piffissami suliassanit aallutarinninnermit attaveqarnermik aallutarinninnerunissaq.

Eqimattat nutaat toqqissisimanermik pilersitsiniarlutik nalininginnaasumik alloriarnikkaartumik sammisanik pingasunik suliaqassapput. Tamanna immikkoortunik pingasunik, sulisut ataasiakkaat imaluunniit suleqatigiit eqqumaffigalugit sulissutissaannik tunniussivoq:

Ilaatitsineq, Aqutsineq aamma Tatigeqatigiinneq.

• Ilaatitsineq: Eqimattani ilaanermi akuerisaasutut kikkut tamaasa misigitinnissaat, ilaanerup siunertaanik paasinninnissaat kiisalu eqimattani pissusilersuutinut malittarisassanik ilisimasaqarnissaat. Eqimattat taaguusernissaat kiisalu ataatsimut suliassamik sammisaqartinnissaat.

• Aqutsineq, inissisimanerit agguataarneri aamma malittarisassat: Kina aalajangiisussaanersoq paasinissaa, eqimattanilu inissisimaffiup paasinissaa. Allanut sunniiniarnermi killissat misilittarnissaat. Inersimasut piumasaqaraangamik ilumoortarpat? Eqimattani allat qanoq sunnersinnaatigivakka?

• Tatigeqatigiinneq: Qanoq misiginerluni eqqarsarnerluniluunniit qanoq ammatigisumik oqaluttuarineqarsinnaava? Inersimasumut imaluunniit eqimattani allamut ammaraanni qanoq tiguneqartarpa?

Immikkoortuni taakkunani pingasuni kikkut tamarmik qanoq inissisimanerlutik aatsaat paasigaagamikku kajumissuseqarlutik ukkatarinnissinnaallutillu suliassanik suliaqarsinnaanissamut toqqissisimalersarput.

Eqimattat ineriartorneranni immikkoortoq siulleq takoriartigu. Qanoq ilaatitsilluni sulisoqarsinnaava, meeqqallu tamaasa ataatsimoornermut peqataasutut misigilersillugit?