Immikkoortoq 5/8
Qupperneq 4/8: IlaatitsineqIlaatitsineq: Eqimattani nutaani meeqqat inuusuttullu ilaatinneqartutut misigitinnissaat
Ilaatitsinermi ilinniartitsisup imaluunniit perorsaasup suliassaraa qitiulluarnissani, peqataasut tamaasa eqimattani takuneqartutut, tusaaneqartutut akuerisaasutullu misigitissallugit.
Eqimattamiinnermi siunertaq paasissagaat, pissusilersuutit suut naatsorsuutigineqarnersut paasissagaat, eqimattanilu malittarisassat qanoq innersut paasissagaat. Inersimasoq qaaqqusisuussasoq, neriulluartuulluni, assigiinngissutsinik annikillisaasarluni, kikkullu tamarmik isumaqatigiissutigisaannik ujartuisuulluni.
Assersuut: Ilaatitsinermi sammisaqartitsineq
Klassi imaluunniit eqimattat nutaat aallartipput.
Sulisoq oqaluttuarluni aallartippoq:
“Klassissinnut/ skolehjemmissinnut/ børnehjemmissinnut nutaamut tikilluaritsi. Inummik ateqarpunga. Maniitsuminngaanneerpunga, namminerlu marlunnik niviarsiaqqamik nukappiaqqamillu 10-nik 12-inillu ukiulinnik meeraqarlunga. Qimusserneq/ atisanik mersorneq/ nalunneq/ allallu nuannarinerpaavakka. Nammineq atualernialerama pissangasorujussuuvunga, aamma ilissi immaqa pissangavusi. Isumaqarpunga immissinnut ilinniassasusi maaniinnersilu nuannarilerlugu, taamaattumik nerrivissinnut pappilissamik aqerluusamillu ilisinikuuvunga, ingigitsi piareerlusilu!
Maanna 10 minutsit titartaassaasi imaluunnit atersi, suminngaanneernersi sunalu nuannarinerpaanerissi allassavarsi.
Taamaalioreerussi tamassi 2 minutsimik periarfississavassi qanoq ateqarnersusi, suminngaanneernersusi sunalu nuannarinerpaanerissi oqaluttuarnissassinnut”.
Atuartut imminnut oqaluttuarereeraangata ilinniartitsisoq nersualaarinnilaarluni atuartumut oqaaseqartassaaq: ”Nujarmiut kusanaq” – “oqalutsinnak eqqarsaqqaarnissat pikkoriffigigit” – “eqeersimaangaaravit, uninngaannarsinnaanngingajapputit!”.
Kaajallaareernermi:
“Eqimattani/ klassimi matumani marlunnik suliassaqarpusi: immissinnut ilakkuminartuussaasi, ilikkagarpassuaqassallusilu. Taamaattumik tamassi eqqaamassavarsi:” – sulisoq pissusilersuutinut kissaatigisanut malittarisassanik marlunnik pingasunilluunniit saqqummiussissaaq oqarlunilu “ilakkuminartuunissatsinnut arlarsi arlaannik siunnersuutissaqarpa – tamatta qanoq iliussaagut?”
Ilinniartitsisup malittarisassat siunnersuutigisani allattarfissuarmut allassavai imaluunniit titartassavai, taakkuninngalu allagartamik nivinngaassalluni.
“Tiimip naggataavani marlukkaarlusi oqaluuteqquassi. Eqimattassinnut nutaamut taaguummik torrattumik nassaarsinnaavisi? Uumasup nukittuup nuannaartullu atianik taaguuteqassava – imaluunniit Ammassaat imaluunniit Iluliaq allamilluunniit?”
Klassimik eqimattanilluunniit ingerlataqareerussi: klassimi eqimattamiluunniit piffissami naleqquttumi kaajallaasitsigitsi:
“Maaniinnissinni iluarisimaarnissarsi angerlarsimasutullu misiginissarsi qulakkeerusupparput. Taamaattumik qinnuigissavassi tamassi immikkut 3 minutsini oqaluttuarissagissi maani najugaqarluni/ atuarluni qanoq iginerissi?
Immaqa arlasi ilaqutaqarput ilissinnik nutsuisunik imaluunniit maaniinnissinnik nuannarinninngitsunik, imaluunniit ilaquttassinni maqaasisaqarussi – oqaluttuarisiuk. Tamannalu pillugu inersimasumik oqaloqateqarnissamik pisariaqartitsigussi oqarisi”.
Ataatsimut sammisamik pilersitsineq
Eqimattat tamarmik ataatsimut sammisamik pisariaqartitsipput, assigiinngissutsit akornanni eqimattamik ataatsimoortitsisumik.
Ass. Nuummi skolehjemmi angalaartitsisarpoq timimillu aalatitsinermik sammisaqartitsisarluni.
Sisimiuni ulloq unnuarlu angerlarsimaffik erinarsornermik aallutaqartitsivoq, Uummannamilu børnehjemmi ilaatigut nipilersornermik ataatsimut sammisatut atuisarluni, taakku meeqqanik inuusuttunillu inooqatigiinnermi ataatsimoortitsisarlutik.
Tunuliaquttami ajornartorsiut
Meeraq inuusuttorluunniit eqimattanut allanut ilaareerpoq – ilaquttat, inuusuttoqatit, il.il. Taakku inissisimanerisa meeqqap inuusuttulluunniit eqimattani, klassimi imaluunniit suliffeqarfimmi pimoorussisinnaaneranut siuarsaasinnaavoq akornutaasinnaalluniluunniit.
Meeqqat inuusuttullu eqimattani klassimiluunniit pimoorussisinnaanngillat imaluunniit ilaasutut misigisinnaanatik ilaquttat imaluunniit kammalaatit allamut nutsuippata: “Anaanaga oqarpoq atuarfik pausernerinnaasoq, tamatuma kingorna nunaqarfimmut angerlassaanga meeqqiorlungalu!”.
Assersuutigalugu ima oqaaseqarfigineqarsinnaavoq “Taava paasisinnaavara sooq ilinniakkerineq tiguartisimaffiginngitsiginerit – eqqarsaatiginikuuiuk atuarneq allannerlu pitsaasinnaasut, taamaasillutit nammineq meerassatit ilinniartissinnaaniassagakkit – sunillu tunerusussinnaavigit?”.
Sulinissamut pilersaarummut eqqarsaatit: Ilaatitsineq
Siunnersuutit uku atorsinnaavatit/si, imaluunniit ilaatitsinissamut sammisassanik nammineq isumassarsiorsinnaavusi.
Qanoq tullissaanut suliaqarsinnaavit/si:
- Eqimattani kikkut tamarmik ”isersimasutut” misigitinniarlugit?
- Inooqatigiinnermi pissusilersuutinut malittarisassanik qanorlu atornissaanik ilisimasaqartinniarlugit?
- Eqimattami ilaaneq qanoq isumaqalersimanersoq?
- Tunuliaquttami ajornartorsiutit pillugit ammasumik oqaluttuarnersi tusaasimassagaat.
Tullissaanut ilaatitsinissamut qanoq suliaqarnissat/rsi pilersaarusiorsiuk.
Meeqqat inuusuttullu naammattut eqimattani ilaasutut misigippata ilaatitsiniarneq unissaaq. Kikkut tamarmik pisussaasutut misigisinnaanngillat, eqimattami ilaasutut akuerisaasutut amerlanerpaat misiginissaat siunertaavoq. Tamanna pereerpat sammisaq alla naliginnaasumik puttutissaaq, tassa eqimattani sunniuteqarsinnaaneq pillugu apeqqut, kiisalu oqartussaassutsimik inissisimaffinnillu misileraaneq.