Immikkoortoq 5/8

Tatigeqatigiinneq: Eqqarsaatit, misigissutsit ajornartorsiutillu pillugit qanoq ammatigisinnaavugut

Peqataasut inissisimaffitik paasereerpatigik, inersimasullu sinaakkutai aalajangernerilu misilerareerlugit aqutsineq naasarpoq. Iluatsipajaarsimappat killissani toqqissisimanermik pilersitsivoq, kiisalu pissaaneqarniuussinnaanerit unipput. Maanna eqimattat misissulerpaat misigissutsit eqqarsaatillu qanoq ammatigisumik oqallisigineqarsinnaanersut:

Suna nammineq pigiinnarneqassava? (tamanna inimi ataatsimi tatigisannut taamaallaat oqaluttuarissavara)

Suna uannut tunngassava? (ass. eqimattani sumiginnagaaneq, neriuutit sinnattullu, annaasaqarneq immaqalu imminut toqoriaraluarneq mianersortumik oqallisigisinnaavarput?)

Suut tamanut oqaatigineqassappat? (ass. sila, ilinniagassat imaluunniit suliassat toqqissisimalluni oqallisigineqartuaannarsinnaapput?)

Matumani inersimasut suliassaraat aqutsivallaannginnissaq, kisianni naleqquttumik ammasuunermik allartisaanissaq, kiisalu kikkut tamarmik eqqarsaataat pillugit oqaloqatigineqarnissaat, kiisalu arlaannaalluunniit oqaatigerusunngisaminnik naalakkigaallutik oqaaseqartitaasassanngitsut.

Kikkut tamarmik suut nammineq pigiinnassanerlugit imaluunniit avitseqatigiissutigisinnaanerlugit assigiinngitsunik isumaqarput, taamaattumik inersimasut aamma suliassaraat avitseqateqarpallaanngitsut aamma misigissutsinik eqqarsaatinillu ammasumik avitseqateqartartutut ataqqineqassasut.

Assersuut: Inuusuttuni eqimattani tatigeqatigiinneq

Sulisut malugisinnaavaat inuusuttut arlallit tunniutiinnaqqajaasut, ilaallu isumakulunnermik siunissamullu neriuuteqannginnermik oqalliseqartut.

Ualit ilaanni aalajangerpaat sulisut marluk namminneq inersimasunngoriartulernerminnit oqaluttuassasut. Ilaquttat qimaqqaneri qanoq artornartigisimanersoq, kiisalu qanoq ilaquttat ilinniakkallu akornanni avissaartuutsitsisimanersut. Inersimasut malittarisassaannik unioqqutitsillutik qanoq misileraasimanertik aamma oqaluttuaraat. Aappaa oqaluttuarpoq ilinniarnerani angajoqqaami aappaa atornerluisuusimasoq. Aappaa oqaluttuarpoq inersimasunngulernermini nammineq atornerluisuusimalluni, aapparminit qimanneqarnini aliasuutigigamiuk. Marluullutik oqaluttuaraat inuusuttuulluni qanoq nalorninartitigisoq, qanorlu imminnut naniartuaarsimanertik aammalu misigisaminnit qanoq nukittortigisimanertik.

Tamatuma kingorna aperipput inuusuttut ilaat assingusunik misigisaqarnikuunersut, piumasullu oqaaseqarsinnaasut. Inuusuttut ilaat tusarnaaginnarniarlutik aalajangertarput. Allat neriuuteqannginnertik oqaluttuarivaat, ataatsillu oqaluttuaraa illooqqami imminut toqoriaraluarsimanera, imminerminullu qanoq sunniuteqarsimanera.

Inersimasut inuusuttuunermi inuuneq qanoq neriuuteqarnanngitsigisinnaasoq, isummani allanngorafiusoq, aammali misilittagaqalerneq ineriartornissamut nukissanik tunisisoq, taamaasilluni inersimasunngoriartornermit 20-t aallartinneranni ukioqaleraanni nukittuninngorsinnaanermut oqaloqatigiinneq saatissavaat.

Matumani inuusuttut ilaatigut misigissavaat inersimasut ammarnissamut piareersimasut, ilaatigullu nammineq qanoq ammanerusinnaanertik. Peqatigitillugu sulisut piffissaatillugu paasisinnaavaat, arlaannik ima ulorianartorsiortoqartiginersoq, pikkorissunik ikiorneqartariaqarlutik, MIO allaluunniit attavigalugu.

Sulinissamut pilersaarummut eqqarsaatit: Tatigeqatigiinneq

Meeqqat inuusuttullu eqqarsaatsiminnik misigissutsiminnillu ammasumik oqaloqatigiissinnaanerannik siuarsaanissaq pillugu tullianimut sunik sammisaqartitsisinnaanerlusi pilersaarusiorsinnaavisi?

• Ammasumik oqaluttuarnissamut piareersimanermik qanoq nammineq takutitsisinnaavit/si?
• Sammisat suut meeraatissi/ inuusuttuutissi tiguartisimaffigaat, ammasumik oqaloqatigiissutiginissaanik pisariaqartissinnaasaannik?
• Qanoq qulakkeersinnaaviuk qanoq ammartiginissaq nammineq kajumissutsimiimmat, kiisalu allat ilaminnit privatiunerunerat ajunngitsoq?
• Sammisap matuma qanoq isumassarsitippaatit – ammasuunermut oqimaaqatigiinnermik pitsaasumik nassaarnissamut qanoq tullissaanut suliaqarsinnaavit/si?