Immikkoortoq 5/8

Schutzip erseqqissarpaa, ilaatitsinermi, aqutsinermi aamma tatigeqatigiinnermi isumaqatiginninniarnerit naammattumik naammassereerpata eqimattani ilaasortat ima toqqissisimatigissapput, attaveqarnernit suliassanik naammassinninnissamut ajornannginnerujussuarmik ukkatarinninnertik nuutsissinnaassallugu.

Matumani suliakkiinerit, suleqatigiinnik katiterinerit aamma suleqatigiisitsinerit aallartivinneqarsinnaapput, tamarmik imminnut atassuteqarnertik qularinngereermassuk, ataatsimoorlutillu misissuisinnaallutik, suliamik naammassisaqarsinnaallutik kiisalu ajornartorsiutinik naapitaminnik ammasumik oqaloqatigiissinnaallutik.

Sammisat aamma taakku pingasut eqimattap naapinneranni isumaqatiginninniutigineqaqqittarput: tiimi imaluunniit eqimattat naapinnerat aallartikkaangat, niviarsiaqqamik nukappiaqqamilluunniit nutaamik klassimut pisoqaraangat, ilinniartitsisoq imaluunniit sulisoq nalunngisaq taarsiullugu taartaasumik takkuttoqaraangat.

Taamaattumik isumassarsiatsialaavoq inersimasut taarseraannerat annikillisissallugu. Meeqqat/ inuusuttut eqimattat ingerlalluanngippata, annilaanganeq attaveqarnernullu nalornineq akerleriinnerpassuarnik pilersitsissapput, eqimattamilu imaluunniit klassimi inersimasumik nutaamik aqutsisoqalernerit tamaasa sammisat taakku pingasut sivisuumik isumaqatiginninniutigineqartassapput.