Ataatsimiinneq 3/10
Qupperneq 2/8: Meeqqani attaveqariaatsit aamma isumassuisup pissusilersuutaaMeeqqani attaveqariaatsit aamma isumassuisup pissusilersuutaa
Meeqqap attaveqariaasianik ilisarinnissinnaaneq (– alaatsinaataqariaaseq Mary Ainsworth-imit ineriartortinneqartoq)
Meeqqat ukiukeqalutilli inersimasunut pissusilersoqatigeeriaatsit ineriartortittarpaat, taamaasiornermikkut isumassuisuminnut attaveqalissagamik. Periutsit tamakku attaveqariaatsinik taaneqartarput, immikkoortullu pingaarnerit sisamaapput: toqqissisimasoq, akuliutsitaanaveersaarpasissoq, arlariinnik isumalik kiisalu aaqqissugaanerliugaq. Attaveqariaatsit qanoq ineriartortarnersut isiginiariartigu. Tamanna mikisuaraaneraniilli pisarpoq, nalinginnaasumik ilissi angajoqqaatut paarsisartutut taakkuninnga naapitsinersi sioqquterujussuarlugu.
Videomi uani takusinnaavarsi meeqqat avissaalernerminni pissusilersuutaasa takutikkaat isumassuisuminnut qanoq attaveqariaaseqarnerlutik. Videomi assersuutip siulliup takutippaa meeqqap toqqissisimasumik attuumassutillip avissaartitaanermi qisuariaataa. Assersuutit aappaanni takutinneqarpoq meeraq akuliutsitaanaveersaarpasissumik periuseqartoq. Assersuutit pingajuanni meeraq arlariinnik isumalimmik periuseqartoq. Ileqqorissaarnissaq tunngavigalugu meeqqat aaqqissugaanerliukkamik pissusillit immiunneqanngillat.
(Video tuluttuujuvoq)
ATTAVEQARFIGISANUT TOQQISSISIMASUMIK PISSUSILERSUUTIT
ATTAVEQARFIGISANUT PISSUSILERSUUTIT TOQQISSISIMANANNGITSUT
Inuunermi ukiut siulliit marluk pitsaasumik isumassorneqarneq kingusinnerusukkut inuunermi inoqatit akornanneeriaatsimut inuunermilu qanoq ingerlanermut aalajangiisuuvoq:
Isumassuisoq toqqissisimasumik aallaaveqalersitsippat, meeraq mikisoq attaveqarfigisamut pissusilersuutinik takutitsissaaq, isumassuisorlu ingerlappat aliatsassalluni. Tamannali sivikitsuinnaassaaq, isumassuisuni tatigigamiuk. Meeraq erniinnaq paarngulissaaq piffissarujussuarlu pinnguarnermut paasisaqarniarnermullu atussallugu. Toqqissisimasumik aallaaveqarneq imminut annertuumik tatigilersitsivoq, kiisalu inuunerup ingerlanerani kingorna ilikkaqarusussusermut pinnguarnissamullu piumassuseqalersitsilluni.
Meeqqat angajulliit inuusuttullu amerlanertigut nammineersinnaassuseqassapput, kiisalu imminnut allanillu pitsaasumik isiginnillutik, pisariaqartillugulu ikiortissarsiorsinnaasarlutik. Meeqqanut allanut isumassuisunullu arlalinnik pitsaasumik attaveqassapput, kikkullu qanimut attaveqarfiginiarlugit toqqarumaarlugu. Allat qanoq eqqarsarnersut paasikannersinnaassavaat, pineqartumilu attaveqartumik akisinnaassallutik (allat misigisaat paasisinnaallugit inooqataanikkullu piginnaasat). Suliassat nutaat sapiissuseqarfigaat.
Attaveqarfigisanut pissusilersuutit toqqissisimanartut saniatigut suli pingasunik attaveqarfigisanut periuseqarpoq, taakku siusinnerusukkut isumassuisuusimasunut nalornisumik attaveqarnermik takutitsisuupput. Attaveqarfigisanut pissusilersuutit toqqissisimananngitsut inooqataanermi pissusilersoqatigiinnermit pitsaanngitsunik misilittagaqarnermit pilersarput. Isumassuisoq ingerlagaangat meeraq nalinginnaasumik tuppallersaruminaattassaaq, meeqqat ukioqqortunerit inuusuttullu imminnut pitsaanngitsumik isigissapput, ikioqquneqarnissarlu sapersaatigissallugu. Meeqqat ilaasa allat qanoq eqqarsarnerat misigisimanerallu paasiuminaatsittassavaat, inunnillu allanik inooqatigiittut pissusilersoqatigiinneq siulittoruminaatsissallugu.
Attaveqarfiginneriaatsit taakku isiginiartillugit, meeqqat akisussaaafigisasi eqqarsaatigeriarsigit. Attaveqarfiginneriaatsit misissoreerutsigit, meeqqat akisussaaffigisasi pissusilersoqatigiiffigigaangassigit qanoq qisuariaateqartarnersut oqallisigissavarput, toqqissisimalersinniarlugit inooqatitullu pissusilersoqataatinniarlugit qanoq ungasinnerusumut isigaluni sullinneqarsinnaanersut oqallisigissallutigu.
”Ilinniartitaaneq manna annertuumik iluaqutigaara, maannalu atuagarsornikkut uppernassaatissaqalerlunga, qanilaarnermut periutsit sivisoqisumik atorsimasakka, meeqqanut eqqortuusut. Uanni meeqqat sooq toqqissisimasarnersut maanna paasilluarsinnaanerulerpara, inissaqartittuarakkit qasunartutut misiginagit. Pissusilersoriaatsit toqqissisimanartut toqqissisimananngitsullu pillugit ilimagisat iluaqutigeqaakka, amerlanerusunullu ingerlateqqinniarlugit.”
– Fairstartimi ilitsersuisoq
