Select Page

Ataatsimiinneq 3/10

Qupperneq 4/8: Toqqissisimanngitsumik attaveqarnaveersaartumik pissusilersuut

Toqqissisimanngitsumik attaveqarnaveersaartumik pissusilersuut

Meeraaqqap isumassuisuni naatsorsuutigiuminaatsikkuniuk, qanilaanngitsuusorlu nillertuulluni, piumasaqartuartoq meeqqamullu tunniussimanermik takutitsinnitsoq misigiguniuk, meeqqap isumassuisuminut inunnullu pingaaruteqartunut allanut attaveqarfigisamut toqqissisimanngitsumik attaveqarnaveersaartumik pissusilersuut ineriartortsissinnaavaa. Immaqa meeraq ’inersimasuaqqatut’ pissusilersorniarsinnaavoq imaluunniit ’nammineq imminut angajoqqaaritilluni’.

  • Naalungiarsuup pisariaqartitaminik misigissutsiminilluunniit takutitsinnginnissaq ilikkapallattarpaa, pisariaqartitsinerli pigineqartuartarpoq stresseqalersitsisarlunilu. Meeraq qianeq ajorpoq, ikioqqunngisaannarpoq, misigisaminik takutitsinngisaannartutut pissuseqarsinnaavoq.
  • Isumassortini uterpat pinngussat sammisalluunniit assut ulapputigissavai, isumassortinilu attaveqarfiginiassanagu. Meeqqap isumassorneqarneq soqutiginngitsooqqajaasarpaa.
  • Meeqqat anginerit inuusuttullu ikioqqussanngillat isumassorneqarusussanatillu, naak taamatut pineqarnissaq atorfissaqartikkaluarlugu.
  • Misigissutsitik aqunniarsarisarpaat qanorlu misigisimanertik erseqqissumik takutikkusussanagu. Ilissi pinngitsoorsinnaarusunngilaasi, misigissutsitillu takutikkusussanagit oqaluusererusussanagillu.
  • Ineriartornerminni siusippallaartukkut ajornartorsiutitik nammineerlutik qaangerniarusuttarpaat.
  • Pisimasut nikallornartut artornartulluunniit eqqaamajuminaatsissavaat oqaluuseriuminaatsillugillu – assersuutigalugu avissaartitaaneq annaasaqarnerlu.
  • Amerlanertigut misigittaatsutut, stresseqartutut misinnassapput, misigissutsikkut soqutigittaatsutut misinnarsinnaallutik, oqarsinnaallutillu: ”Uanga taanna sussagakku?”, ”Inersimasut tatigineqarsinnaanngillat.”, il.il. Suut tamaasa namminersuutiginiarajuttarpaat.
  • Kiserliortutut, kisimiittutut, ikinngutissaaleqisutut nikallungasutullu misinnarajuttarput, tamannali oqaluusererusussanagu.

Meeqqat inuusuttullu akuliutsitaanaveersaarnermik pissusilersuuteqartut, toqqissisimanermik misigisaqarniarunik inunnit isumassorneqarnissaq ujartornagu pigisanut (soorlu, bamsimu, videomik pinnguaammut, imaluunniit sammisamut aalajangersimasumut) attaveqalertarput. Isumassorneqarnissaq annertuumik pisariaqartippaat, misigisalli taassuma naqisimalersinnaasimavaat, isumassortertik siulleq piumasaqarpallaartarmat, misigittaalluni pissarsiariuminaallunilu. Tamanna isumaqarpoq ”nillertutut” paatsoorneqarajuttarnerannik ulluinnarnilu puigorneqartarnerannik, namminneerlutik maluginiaqquneq ajoramik ikioqqussanatillu – siusippallaartukkut imminnut nammineq isumaginissartik ilikkarsimavaat. Tamanna isumaqarpoq artornartunik ajornartorsiuteqarsinnaasut, assersuutigalugu imminut toqoriarnermik kinguneqarsinnaasunik, qanoq misigisimanersut eqqarsarnersulluunniit, aamma qanilaarfigineqarnissamik, oqaloqatigineqarnissamik paasineqarnissamillu qanoq pisariaqartitsitiginersut arlaannaannilluunniit ilisimaneqarani.

MEEQQANIK INUUSUTTUNILLU ATTTAVEQARNAVEERSAARNERMIK PISSUSILERSORTUNIK ISUMASSUINEQ

Meeqqanut inuusuttunullu isumassuinermik pinngitsuuiniaqqajaasartunut aamma inooqatigiinnermi ajattuerpalaartumik periuseqartunut atatillugu, ilissi pissusilersornersi pingaaruteqarpoq:

  • Meeraq inuusuttorluunniit isumassorsiuk, tamanna pisariaqartinneqartoq takusinnaagussiuk takusinnaanngikkaluarussiulluunniit – isumassuinissamut suliniuteqarit, naak meeraq tamatuminnga ujartuinngikkaluartoq imaluunniit kisimiikkusunnerulluni: ”Ilinniagassat taakku nammineerlutit naammassisinnaanngilatit, nalunarpallaaqaat – marluulluta ingeriarta ilinniagassallu suliarineranni nuannisaarluta!”
  • Tamatigut pissarsiarineqarsinnaasarnersi kiisalu meeqqamik inuusuttumilluunniit soqutiginninnissinnik takutitsinissamut piareersimajuarnersi oqaloqateqarusunnersilu takutissiuk.
  • Nammineq misigissutsisi takutissigit, namminerlu oqaatsisi atorlugit meeqqap inuusuttulluunniit qanoq misigisimagunarnera ’nutserlugu’. Soorlu: “Arraa, orlugavit? Ilumut annersimassaqaatit. Maanngarlutit issiaqatigilaannga”.
  • Inussiarnersuugit, uteriisaarlutit naammagittarlutillu – meeqqap inuusuttulluunniit pisariaqartippaasi, namminerli pisariaqartitaminik takutitsinissaq ersissutigalugu.
  • Toqqaannanngitsumik attaveqarneq atorsiuk: meeqqamut inuusuttumulluunniit attaveqarnaveersaarnermik pissusilersuuteqartunut inuttut pissutsit oqaloqatigiissutiginissaat sapernartorujussuusinnaavoq, amerlanertigulli pigisanut soqutiginnissaaq ornigalugillu. Assersuutigalugu meeqqap bamsia, videokkut pinnguaataa titartagarluunniit maluginiaqqusinnaavarsi meeqqamullu oqaloqatigiissutigalugu ”bamsi qanormita misigisimava” imaluunniit titartakkami suna takuneqarsinnaanersoq. Soqutigalugu takutitat ”pigisaq aqqutigalugu” meeraq imminut oqaluuserilissaaq. Tamatuma kingorna aperisinnaavutit meeraq assigisaanik misigisaqarsimanersoq.

 

OQALLINNEQ – minutsit 5

  • Meerartassi inuusuttassiluunniit ilaat taamatut pissusilersuuteqartarpat?
  • Ilaquttassi ikinngutissiluunniit akornanni taamatut pissusilersuuteqartartunik eqqaasaqarsinnaavisi?
  • Meeqqat inuusuttulluunniit isumassuinissinnik, soqutiginninnissinnik nersualaarinninnissinnilluunniit pinaveersaaraangata qanoq qisuariaateqartarpisi?
  • Meeqqat attaveqarnaveersaartumik pissusilersuuteqartut takugaangassigit suna ilissinnut artornarnerpaasarpa?

Eqimattaqatigiit nipangiussisussaatitaapput. Nipangiussisussaatitaagassi ilassilu killissaat ataqqisussaagassigit eqqaamasiuk.

Siulia
Tullia