Ataatsimiinneq 3/10
Qupperneq 7/8: Atteveqarfigisanut ajornartorsiuteqarnermik sulissutigininneq3.7 Atteveqarfigisanut ajornartorsiuteqarnermik sulissutigininneq
PAARISAQARNERMUT PISSUTSINIK ATTAVEQARNERMULLU NALINGINNAASUMIK ISIGINNINNEQ
Meeqqat paarisat attaveqariaatsinik toqqissimananngitsunik nalorninartunillu ineriartortitsinissamut annertuumik aarlerinartorsiortuupput. Angajoqqaavimminnut toqqissisimasumik attaveqarnissaq amigaatigisimavaat, isumassuisumillu nikeqattaarnerpassui misigisarsimallugit, isumassuisullu amerlaqisut ullup ataatsip ingerlanerani nikeqattaartarnerat akuttunngitsumik misigisarsimallugu. Angerlarsimaffimmik avataanni angerlarsimaffimmut imaluunniit ilaqutariinnut paarsisartunut inssinneqarnertik sioqqullugu akuttunngitsumik naalliutsitaasarsimapput imaluunniit sumiginnagaasarsimallutik. Atuagaq atuarneqarsinnaavoq taaguuteqartoq Tilknytningsproblemer og tilknytningsforstyrrelse – en håndbog i udvikling af det praktiske arbejde – Attavefigisanut ajornartorsiutit attuumassuteqarfigisanullu ajoqutit – suleriatsip ineriartortinnissaanut quppersagaq.
Ilissi angajoqqaarsiatut inissisimanissinni meeqqanut inuusuttunullu taakkununnga qanoq iliuuseqarsinnnaavisi, sunillu angusaqarnissaq naatsorsuutigisinnaavisuk?
Meeqqap inuusuttulluunniit piffissami inissinneqarfimmini qassinik ukioqarnera tamatumunnga apeqqutaalluinnartoq ilimanarpoq. Meeqqanik paarisanik misissuinerit takutippaat meeraq piffissami inissinneqarfigisamini qaammatinit 24-nit nukarliuppat, attaveqariaatsiminik nalinginnaasumik sukkaqisumik allannguissasoq, ukiullu marlussuit ingerlaneranni ilissinnut toqqissisimasumik attuumassuteqalerluni. Tamanna isumaqarpoq, attaveqarfigisanut toqqissisimasumik pissusilersuuteqarussi, meeqqap peqqissumik attuumassuteqariaatsimik ineriartortitsinissaa ilimanarluinnartoq. Meeqqalli ilissinnit tiguneqarnerminni ukioqqortunerusut, attuumassuteqariaasianni tunngaviusumik allanngortoqarnissaanut sivisunerujussuussaaq, taamaattumik naammagittassaasi ilaatigullu naatsorsuutigalugu meeqqap pissusilersuutiminik allanngortitsinissaanut atatillugu meeraq piffissami sivisuumi ikiorneqartariaqartoq. Ilisimatusarnerup takutippaa, meeqqat inuusuttullu amerlaqisut attaveqarnermik toqqissisimanerungaartumik ineriartortitsisartut pissusilersuutitigullu ajornartorsiutit annikillisinneqarsinnaasut, angajoqqaat paarsisartut naammagittarlutik unissanatillu attuumassuteqarfigisanut toqqissisimasumik pissusilersuutinik takutitsisarlutik sulippata.
ILISSI SULIASSARSI: ATTAVEQARFIGISINNAASANIK TOQQISSISIMASUNIK NEQEROORUTEQARNEQ
Angajoqqaarsiatut suliassaat:
- isumassuisutut pissusilersuutit toqqissisimanertut pillugit siunnersuutit pitsaasut suleriaatsissinni atorlugit.
- meeqqat attaveqarfigisanut ajornartorsiutillit inooqataanermi ingerlalluarsinnaalersinniarlugit ikiornissaannut aqqutissarsiuillusi.
”Meeqqanut qanoq attaveqartoqarsinnaanera isumassuisut maluginiarnerulersimavaat, minnerunngitsumillu meeqqat toqqissisimasumik sinaakkuteqarnissamut pisariaqartitsinerat ilisimaarilernerusimallugu. Isumassuisoq ataaseq oqaluttuarpoq, meeraq maanna toqqissisimalersimasoq, maanna isumassuisuminut orniguttartoq oqaloqatiginiarlugu, aamma ikioqqujartorluni. Meeqqat tungaannut suleriaatsit pissusilersuutillu nutaat meeqqanut iluaqutaalluarnerannik tamanna takutitsivoq.”
– Fairstartimi ilitersuisoq
OQALLINNEQ – minutsit 20
Meeqqat inuusuttulluunniit ulluinnarni attuumassuteqarfigisani amerlaqisuni tulliuttunik takutitsisartut nassuiaatigisigit:
- Attaveqarnaveersaarnermik pissusilersuuteqartut
- Arlariinnik isumalimmik pissusilersuuteqartut
- Paatsuungasumik/Aaqqissugaanerliukkamik pissusilersuuteqartut
Pissusilersornermik taamatut ittumik naammattuuigaangassi ilissi angajoqqaarsiatut qanoq qisuariaateqartarnersi oqaluuserisiuk. Meeraq uumisaarisutut, attaveqarnaveersaartutut il.il. pissusilersoraangat, qaqugukkut eqqissisimasumik toqqissisimasumillu qisuariaateqarnissaq ajornakusoortarpa? Pingaartumik meeqqamik ilissinnik tikitsinaveersaartuartumik imaluunniit ilissinnik pitsaanngitsumik isiginnittuartumik isumaginnittussaanerup qanoq ajornakusoortiginera ammasumik oqaluuserissallugu pingaaruteqarpoq. Uagut inuinnaavugut, meeqqanik attaveqarfigisaminnut ajornartorsiutilinnut eqqissisimajuarnissaq sivisuumik ilikkarniagassaavoq. Akuttunngitsumik pakatsisutut, uumigusuttutut imaluunniit kamassaarneqartutut misigisimasoqarsinnaavoq, pingaartumik paarsinerup aallartinnerani.