Immikkoortoq 3/8

Toqqissisimanngitsumik arlariinnik pissuseqarluni attaveqarnermi pissusilersuutit

Meeqqap imaluunniit inuusuttup siusinnerusukkut misiginikuuppassuk isumassuisup allanngorartuunera nalunartuuneralu: naveersigajuttoq imaluunniit aatsaarluinnaq pillaasinnarluni tullissaani inussiarnisaartartoq, ilimaginngisamillu misigissutsit pitsaasut nuanniitsullu sakkortuut akornanni nikerarajuttoq, meeqqamut arlariinnik attaveqariaaseqarnermik ineriartortitsisinnaavoq: Meeraq isumassorneqarnissamut ujartuinissamik pisariaqartitsinerup ataatsikkullu isumassuisumut naatsorsorneqarsinnaanngitsumut immaqalu kamajasinnaasumut ersinerup akornanni mattunneqarpoq.
Tamanna pissuseq meeqqani, nammineq alliartornermi sumiginnagaasimasunik, atornerluisuusunik angajoqqaalinni, isumassuisut akornanni aaqqiagiinnginneqakulasuni, imaluunniit isumassuisoq tarnikkut nappaateqarpat takuneqakkajuttarpoq. Pisuni taakkunani tamani isumassuisup pissusilersuutaa naatsorsuutigineqarsinnaanngitsutut kiisalu meeqqamut tatigineqarsinnaanngitsutut misigineqartarpoq. Toqqissisimasumik tunngavissiisinnaanngilaq.

Tamanna isumaqarpoq meeraq utoqqaanerulaartutut inuusuttutullu attaveqarniarnermi annertuumik annilaangasinnaasarlunilu uippakajaarsinnaasoq, taamaattumillu qanilaartumik isumassorneqarnissamik qanilaarnissamillu ujartuiinnaavinnerup kiisalu isummassuinermik neqeroorfigineqarnermi kamammik unnerlunnermillu qisuariartuarnermik paarlakaajaassisarluni. Sulisunut tamanna annertuumik paatsuunganartarpoq, perorsaanermilu suliniutissat pillugit isumaqatigiinnginnernik pilersitsikkajulluni.

• Meeqqat angajulliunerulaat – pitsaanngitsumik – annilaagagissavaat allat qanoq eqqarsarnersut (”arlaannaataluunniit nuannarinngilaanga”, ”kikkut tamarmik kamaappaannga”).
• Meeraq aatsaarluinnaq allanik aqutsiniarsinnarluni, immaqa meeqqanut allanut ”angajoqqaaniariarluni” imaluunniit qinngasaarisinnarluni sivitsunngitsoq napparsimanerarluni imaluunniit paatsoorneqarnerarluni ”arlaannaataluunniit nuannarinngilaangamik” pissusilersornermik takutitsissaaq. Aalajangernisi tamaasa allanngortinniarsarissavai imaluunniit isumaqatigiissuteqarniartuarluni suaqqanillu piumasaqaateqartarluni, annilaanganerup takkuteqqittarnera pissutaalluni.
• Meeraq peqaapajaaminik amerlasuunik kammaqarusunngilaq, ataasiinnarmilli kammaqarnermik kisermaassiniarsarissalluni (”Kisivit kammagaakkit, allanik oqaloqateqaruit sumiginnassavarma”).
• Pisuni sakkortunerni meeraq nakuusertalersinnaavoq meeqqanillu allanik naalagarsiortitsiniarsinnaalluni kiisalu pisunik nuannarinngisaannik imaluunniit peqataaffigerusunngisaannik, soorlu kinguaassiutitigut kanngutsaatsuliornernik imaluunniit nakuusernernik ilioqatiginiartarlugit.
• Meeraq malugineqarusuppoq, aammali isumassuisoq nakkarsarniarsaralugu imaluunniit isornartorsiorniarsaralugu.
• Meeqqap atassuteqarneq pitsaanngitsoq ukkatariniartarpaa piumasaqaatinullu tamanut, annertuunut annikitsunullu, pinaveersaartarluni imaluunniit aaqqiagiinnginnermik aallartitsiniartarluni.

MEEQQAT ARLALINNIK PISSUSILERSUUTILLIT ISUMASSORLUGIT SULLINNERAT

Meeqqat isumassorneqarnissamut pisariaqartitsigaangamik ataatsikkullu isumassuisunut qanittumik atassuteqarnissamut annertuumik annilaangagaagamik qanilaarneq tatiginninnerlu ajornartorsiutaalertarput, ajornakusuulertarporlu misigissutsikkut ungasissutsip qanilaassutsillu aaqqissornissaat. Meeqqat taakku annertuumik naalliuuteqarput, toqqissisimasutullu misigitinnissaat ukkatarisariaqarpasi ima iliornikkut:

• Ikinngutinnerlusi, aalajangersimallusili. Meeraq pillassanngilarsi, piumasaqaatisili eqqissillusi kimigiiserutigisigit. Isumaqatiginninniassanngilasi.
• Aalajangiinerit, meeqqap imaluunniit inuusuttup nammineq aalajangersinnaanngisai aalajangersigit.
• Suliassamut ukkataqarniarnermut ikiorsigit: ”Kamaakkaluarumma nuannarigaluarummaluunniit: Maanna atuarpugut, minutsillu qulit tulliit allanik sammisaqassanngilagut. Tamatuma kingorna oqaloqatigiissinnaavugut”.
• Sammisanik naatsunik ileqqunik aalajangersimasunik pilersitsigitsi taakkulu ullormut utertarlugit. Aallartinnginnissinni minutsit qulit tullii susoqassanersoq oqaluttuuteqqaartuaannaruk.
• Meeraq imaluunniit inuusuttoq unnerluppat, isorinnippat imaluunniit pisuutitsippat eqqissillutit inussiarnersumillu pissuseqarit. Oqaluttuutikkit tunniutiinnarfiginiarnagit, ajornartorsiutitillu qaangersinnaagaat. Akissut pitsaanngitsoq oqalliffiginagu.
• Meeraq ingattarseraangat ataatsimut isiginnissinnaassusaata tiguteqqinnissaanut ikioruk: ”Toqorusullutit oqarputit nuannarineqarnallu – atuagaq ammaqquinnarpara imaluunniit errueqquinnarpakkit. Maanna aliasullutillu kamapputit, erniinnannguarli qaangiutissaaq, aamma maanna ilimaginngikkaluarit. – qaangiuttuaannarpormi”.
• Maluginiaruk – immissinnullu oqaluugitsi – qaqugukkut meeqqap/ inuusuttup paamitsatsittarneraasi kamaammertittarneraasilu. Meeqqamut isiginninnersi ungasilliniarsarisiuk, eqqissisimaannarniarlusi, patajaatsuuniarlusi, inussiarnerniarlusi aalajangiusimaniarlusilu.

OQALLINNEQ