Immikkoortoq 3/8

Attaveqarnissamut ajornartorsiuteqartunik sullissineq pillugu ilisimasat allat

Atuarfimmi katsorsaaffiusumi tarnip pissusiinik ilisimasalittut tarnip pissusiinik ilisimasalik Niels Peter Rygaard atuakkiorsimavoq: Tilknytningsproblemer og tilknytningsforstyrrelse – en håndbog i udvikling af det praktiske arbejde”. Kalaallit Nunaanni Isumaginninnermik Aqutsisoqarfik atuagaq pigaat, katsorsaavinnut atuarfinnullu arlalinnut nassiunnikuullugu. Pædagogisk konsulentimut Arnákatak Jensenimut saaffiginnittoqarsinnaavoq.

Onlinekkut atuagarpassuarnik nassaartoqarsinnaavoq ima allallugu ”Tilknytning”. 

Meeqqanik taakkuninnga sullissinissinni qanoq iliorsinnaavisi – inernerillu suut naatsorsuutigisinnaavisigit?

Inernerit suut anguneqarsinnaanerannut apeqqutaavoq, meeqqap qanoq siusitsigisumik sulisunik toqqissisimaffiusunik naapitsinera.
Meerarsiat pillugit misissuinerit (takuuk: http://www.psych.udel.edu/people/detail/mary_dozier/ og andre) takutippaat, meeraq inissinneqarnermini utoqqaassusaa qaammatit 20-t ataappagit, nalinginnaasumik isumassuisumut sulisumut atatillugu attaveqarsinnaassusaa allanngorsinnaavoq, tassani inuk meeqqamut akisussaasoq meeqqap eqqumaffiani sivisunerusumik najuuttarpat. Tamanna isumaqarpoq, toqqissisimanartumik isumassuinermik pissusilersuuteqarussi, meeraq peqqinnartumik attaveqariaatsimik ineriartortitsinissaminut periarfissaqarnerussaaq.

Meeqqat angajulliunerusut tigugaangassigit, tunngaviusumik tatiginninnermik pilersitsinissaq sivisunerusinnaavoq. Taamaattumik utaqqisinnaalluartariaqarpusi naatsorsuutigalugulu meeqqap pissusaata allanngornissaanut ikiorneqarnissamut piffissamik sivisuumik pisariaqartitsisoq. Ilisimatusarnerulli takutippaa sulisut tamarmik utaqqisinnaaqatigiillutik ingerlaavartumillu toqqissisimasumik attaveqarnermik pissusilersuuteqarlutik suleqatigiinnerani, meeqqat inuusuttullu amerlasuut toqqissisimanarnerusumik attaveqarnermik ineriartortitsisartut kiisalu pissusilersuutini ajornartorsiutit annikillineqarsinnaasut.