Immikkoortoq 3/8

Toqqissisimanngitsumik innarlernikumik attaveqarnermi pissusilersorneq

Meeqqat ikittunnguit siusinnerusukkut isumassuisunut annilaanganermik ersinermillu annertuumik misigisaqarsimasarput, allaat toqqissisimannginnerat uippakajaarninngorluni. Tamanna innarlernikumik pissusilersornertut taaneqartarpoq misigissutsikkullu assoroorfinni piffissani sivikitsuni takuneqarsinnaasarluni.
Meeraq taama pissusilersuuteqalerpat ima annilaangatigisarpoq, isumassuisumut atatillugu pissusilersuutit ataqatigiinnerat tamarluinnaq annaasimasarlugu.

Meeraq annerusoq/inuusuttoq:

• Inunnut pequtinulluunniit sivikitsuinnarmik qalliinnarsiortumillu attaveqarsinnaasarpoq. Sammisaq imaluunniit oqaaseqatigiit kipiinnartarlugit, naatsorsuutiginngisamillu sammisamut allamut nooriasaartarluni.
• Uniffeqanngittuaannarluni sammisamut, inummut peqummulluunniit ukkataqarsinnaanani. Nutaanik naammassinngisaannakkaminik sammisanik aallartitsiuaannartoq, taakkunanngalu nuannaarutiginnissinnaanngitsoq.
• Nammineq inuttut killissani nalusarai (imminermut tunngavallaartunik takornartanut sunnertinnani oqaloqateqarsinnaalluni)
• Takornartanut ajornaquteqanngitsumik attaveqarsinnaalluni (naapitani tamaasa oqaloqatigisarlugit, takornartat tuppallersaatigisarlugit qanilaarfigisarlugillu). Immaqalu naapertuutinngitsumik kinguaassiornermut tunngasunik pissusilersorsinnaasarluni.
• Pisuusutut, misiginneqataanermut kamannermullu misiginissamut piginnaasaqanngitsoq.
• Nammineq pisariaqartitani kisiisa soqutigisarai.

Pisuni ajornarnerusuni meeraq 5-7-inik ukioqarnermi nalaani atassuteqaatinik ineriartortitsinissaq ajornakusoortissinnaavaa

Meeraq ataqatigiissumik inoqatinut atassuteqarsinnaasanngilaq inoqatinullu allanut sivisunerusumik atassuteqarsinnaasarnani.

Ataqatigiissumik atassuteqarnissamut amigaateqarneq tamanna ajornakusoortuuvoq, meeqqallu taama pissusilersuuteqartut arlalitsigut alliartornerminni inuttut pissutsimigut akornutinik ineriartortitsisarput (assersuutigalugu ’borderline’, ’inoqatinut akulerusimanani inuttut pissutsikkut akornut’ il.il.).

OQALLINNEQ

MEEQQANUT INNARLERNIKUTUT PISSUSILERSUUTILIMMIK SULINERMI ISUMASSUINEQ

Meeraq sumiginnarneqarsimaguni imaluunniit isumassuisumini siullerni pissutsini allannguuteqarnermik misigisaqarsimaguni, suna tamarmi meeqqami ”kinguaattoortarpoq”. Siusissukkut sumiginnagaanerit arlallit kiisalu niguisumik kukkorujussuarlunilu paaqqutarinninnerit meeqqap inooqataanermi misigissutsikkullu ineriartorneranut kinguarsaataallutik sunniuteqassapput.

Ass. inuusuttoq sumiginnagaasimasoq meeqqatut mikinertut timimi utoqqaanerumiittutut isigissallugu iluaqutaassaaq

•  Ukiui pingasunik agguakkit – meeqqamut taama ukiulimmut qanoq attaveqarneq pitsaanerpaava? Meeqqap ilitsersuutit qanoq paasisarpai? Qanoq sivisutigisumik meeraq taama ukiulik ukkataqarsinnaava?
• Imminut aperigitsi: Ukiuni siusinnerusuni sorlerni pissusilersorneq taama ittoq nalinginnaasuua?
• Ataasiakkaarlusi meeraq-isumassuisup akornanni attaveqatigiinneq sapinngisamik pingaartinniartariaqarparsi, meeqqap allanut ataqateqarsinnaanera naatsorsuutigilersinnaassagussiuk.
• Sammisassat oqaloqatigiinnerillu meeqqamut minnerusumut tulluartut toqqartarsigit.
• Utaqqilluarit, sukkasuumillu ineriartornissamut naatsorsuuteqarpallaarnak.
• Angajoqqaatut perorsaasutut, tapersersuiuartutut, pitsanngorsaajuartutut, aaqqissuisartutut siunnersuisartutullu immissinnut isigigitsi.

Sammisassat sivikitsuinnaat pilersaarusiorsigit, ullormullu sammisassat aalajangersimasumik pilersaaruteqartissigit.