ክፍለ ጊዜ 16/21

ጨዋታ ከዕድሜ ጋር እያደገ ይመጣል

ድክ ድክ የሚሉ ህጻናት – 1-3 ዓመት

ድክ ድክ የሚሉ ህጻናት በዙሪያቸው ያለውን አካባቢ ማሰስ እንዲሁም የሰውነታቸውን አቅም እና አካላዊ ጥንካሬአቸውን መፈተሸ ይወዳሉ።

• እንደ ኳስ ወይም ባልዲ ያሉ የተለያየ ክብደት ያላቸው ዕቃዎች ህጻኑን እንዲሮጥ፣ እንዲገፋ፣ እንዲጎትት ወይም እንዲያንሸራትት ያበረታቱታል።
• ገመድ፣ ሙዚቃ እና ማስቀመጫ ዕቃዎች ህጻኑን እንዲዘል፣ በእግሩ እንዲመታ፣ እንዲረጋግጥ፣ እንዲራመድ እና እንዲሮጥ ያበረታቱታል።
• የሳጥን ቅርጽ ያላቸው ዕቃዎች፣ ትላልቅ ድንጋዮች እና ትራሶች ህጻኑን እንዲንጠላጠል፣ ሚዛኑን እንዲጠብቅ፣ እንዲጠማዘዝ ወይም እንዲንከባለል ያበረታቱታል።
• የተለያዩ ልብሶችን የመልበስ ማንኛውም ዓይነት ጨዋታ ምናብን የመጠቀም እና የፈጠራ ችሎታን ያዳብራል።
• መዝሙሮች፣ ሙዚቃ እና የሙዚቃ መሳሪያዎች ህጻኑን የተለያዩ ድምጾችን እና ምቶችን እንዲሞክር ያበረታቱታል።

የትምህርት ዕድሜ ላይ ያሉ ልጆች – ከሰባት ዓመት ጀምሮ

• የቤት ዕቃዎች፣ ናይለን፣ የልብስ ቅርጫት እና ሳጥኖች ትናንሽ መደበቂያዎችን ለመስራት ጥሩ ናቸው። 
• እንደ ጣውላ፣ የዛፍ ግንድ ቁራጭ፣ ማስታጠቢያ፣ ትልቅ ድንጋይ፣ ወዘተ ካሉ የተለያዩ ቁሳቁሶች የሚሰሩ መሰናክሎች ህጻኑን በተለያዩ መንገዶች፣ አቅጣጫዎች እና ፍጥነት እንዲንቀሳቀስ ያበረታቱታል።
• ምግብ ማብሰል፣ ምግብ ማዘጋጀት እና አትክልትን የመንከባከብ እንቅስቃሴዎች የቁጥር አጠቃቀምን እና የዕለት ተዕለት ክህሎቶችን ለማዳበር ጥሩ ናቸው።
• እንደ ሀብል መሥራት፣ ሹሩባ መሥራት እና ቀለም መቀባት ያሉ የእጅ ሥራዎች።

“ጨዋታ ለልጆቼ ምን ያህል አስፈላጊ እንደሆነ አላውቅም ነበር። ከዚህ ቀደም ለመጫወት ጊዜ ማግኘት እና ከልጆቹ አጠገብ መገኘት ከባድ ነው ብዬ አስብ ነበር እንዲሁም ለልጆቼ የሚሆኑ ብዙ መጫወቻዎች አልነበሩኝም። አሁን ግን ከእነሱ ጋር ለመጫወት ጊዜ እመድባለሁ ወይም እነሱ እየተጫወቱ እያለ አጠገባቸው ሆኜ የቤት ውስጥ ሥራዎችን እሰራለሁ። ማግኘት የምንችላቸውን ነገሮች በመጠቀም ብዙ ዓይነት ጨዋታዎችን እንጫወታለን፡- የካይት (kite) ጨዋታ፣ ኳስ፣ አሻንጉሊቶች፣ የመቁጠር ጨዋታዎች፣ የቀለም ጨዋታዎች እና የመሳሰሉትን ማለት ነው። ከልጆቼ ጋር መጫወት በጣም ነው የሚያስደስተኝ።” – እንክብካቤ ሰጪ

ከልጆች ጋር መጫወት በተለይም ደግሞ ድክ ድክ የሚሉበት እና የቅድመ መደበኛ ትምህርት ዕድሜ ላይ እያሉ አስፈላጊ ነው። ህጻኑ ከዋና እንክብካቤ ሰጪው ጋር እንዲሁም ከህጻኑ ጋር ልዩ ግንኙነት ካላቸው ሌሎች አዋቂዎች ጋር መጫወቱ አስፈላጊ ነው።

መፍትሄ የሚያስፈልጓቸው በርካታ ተግባራት ያሉበት እና ሥራ የበዛበት የዕለት ተዕለት ህይወት ያለን ከሆንን ከልጆቻችን ጋር ለመጫወት ጊዜውን እና ጉልበቱን ማግኘት አስቸጋሪ ሊመስለን ይችላል። ነገር ግን ጨዋታ አስቀድሞ የተወሰነ ጊዜ ወይም ደግሞ የተወሰኑ ዕቃዎች ወይም መጫቻዎች አያስፈልጉትም። ጨዋታ እንደ ሁኔታው ሊሆን ይችላል እንዲሁም ህጻናት ምናባቸውን መጠቀም እና መሯሯጥ የሚችሉበት ማንኛውም ቦታ ላይ ሊከናወን ይችላል።

አንዳንድ የዕለት ተዕለት የቤት ውስጥ ሥራዎች በቀላሉ ወደ ጨዋታ ሊቀየሩ ይችላሉ። አስቤዛ ለመግዛት ስትሄዱ ህጻኑን ይዛችሁት ሂዱ እና የተለያዩ እንስሳትን ተመልከቱ፣ መንገድ ላይ ያሉትን ድምጾች አዳምጡ፣ መራመድ የምትችሉባቸው የተለያዩ ዓይነት መሬቶችን ፈልጋችሁ አግኙ፣ ወዘተ። በተጨማሪም አትክልትን በምትንከባከቡበት ወቅት ህጻኑን እንዲቆፍር፣ ውሀ እንዲያጠጣ ወይም በጭቃ ወይም በአሸዋ እንዲጫወት በማድረግ ልታሳትፉት ትችላላችሁ።

ጨዋታ መጫወት ቀላል እና አዝናኝ ሊሆን ይገባል። በዚህ ረገድ ማስታወስ የሚያስፈልጉ አንዳንድ መመሪያዎች እንደሚከተለው ቀርበዋል፡-

• ህጻኑ ስህተቶችን እንዲሰራ ፍቀዱ። ፍጹም ክህሎትን ለማዳበር የሚቻለው ደጋግመው በመሞከር እና በመሳሳት ብቻ ነው። ይህን ለህጻኑ ንገሩት።
• ህጻኑ እያደረገ ስላለው ነገር አውሩ፤ ለሚያደርገው ጥረት አድንቁት እንዲሁም አበረታቱት።
• ህጻኑን አዳምጡት፣ የሚያደርገውን ነገር ተከትላችሁ አድርጉ እንዲሁም ጨዋታውን እንዲለውጥ እና “ሕጎቹን” እንዲወስን ፍቀዱለት።
• ጨዋታው ደህንነቱ የተጠበቀ መሆኑን እና አደገኛ ያለመሆኑን አረጋግጡ።
• ነገሮችን ከእሱ በተሻለ እንደምታደርጉ ለህጻኑ አታሳዩት። የራሳችሁን ቀላል ስህተት እየሰራችሁ በዚያ ሳቁ።