ክፍለ ጊዜ 10/19

ዛሬ ትኩረት የምናደርግበት ነገር ለምን አስፈላጊ ነው?

አንዳንድ ጊዜ በአደራ ቤተሰብ እንክብካቤ ውስጥ ያሉ ህጻናት እና ታዳጊዎች ከወላጆቻቸው ጋር መለያየትን ብቻ ያሳለፉ ላይሆኑ ይችላሉ። ምን አልባት ከእናንተ ጋር ከመገናኘታቸው በፊት ከዚያ በተጨማሪ ሌሎች ሰዎችን አጥተው እና ከሌሎች ሰዎች ጋር ተለያይተው ሊሆን ይችላል። ምን አልባት በርካታ የአደራ ቤተሰቦች ውስጥ የተመደቡ፣ ከዘመዶች ጋር ወይም እንክብካቤ ሰጪዎች በተደጋጋሚ ይለዋወጡባቸው የነበሩ የህጻናት ማሳደጊያዎች ውስጥ የኖሩ ሊሆኑ ይችላሉ። በተጨማሪም እንደ ፍቺ፣ የልጅ አሳዳጊ የመሆን ክርክር፣ ወዘተ የመሳሰሉ በርካታ ግጭቶች በወላጆቻቸው መካከል ሲፈጠሩ ያዩ ሊሆኑ ይችላሉ።

ህጻናት አስተማማኝ እና ለረጅም ጊዜ የሚቆይ የእንክብካቤ ሰጪ ግንኙነት ሲጎድላቸው መተማመን የጎደላቸው የአቀራረብ ባህሪዎችን በማዳበር ምላሽ ይሰጣሉ (በክፍለ ጊዜ 9 እንደተማራችሁት፡- የመሸሽ፣ የመጠራጠር እና የተዘበራረቀ)። የአደራ ቤተሰብ ውስጥ በሚገቡበት ወቅት በዕለት ተዕለት መስተጋብሮች ውጥ የኃይለኝነት፣ የመደንዘዝ ወይም ሳይለዩ ሰውን በጣም የመቅረብ ባህሪዎችን ሊያሳዩ ይችላሉ። ምን ማለት እና ማድረግ እንዳለባቸው እና በቤተሰቡ ውስጥ ላሉ ሌሎች ሰዎች ምን ዓይነት ባህሪ ማሳየት እንዳለባቸው ለመገንዘብ ሊቸገሩ ይችላሉ። ይህ ለሁሉም የቤተሰቡ አባላት እንዲሁም በቤተሰቡ ውስጥ ያሉትን ማህበራዊ ደንቦች መረዳት እና ተግባራዊ ማድረግ ሲያቅተው እንደማይፈለግ ሊሰማው ስለሚችል ለህጻኑ በጣም የሚረብሽ ተሞክሮ ሊሆን ይችላል።

ስለሆነም እነዚህን ችግሮች በመቋቋም ማህበራዊ ግንኙነቶችን በአግባቡ ለማከናወን እና ህጻኑ ቤተሰብነት እና ቅርርብ እንዲሰማው ለማድረግ የሚያስችሉ መንገዶችን ማግኘት ብዙ ማሰብ፣ መወያየት እና ማቀድ የሚጠይቅ ጉዳይ ነው። ከዚህ ጎን ለጎን ህጻኑ ቀስ በቀስ የዕለት ተዕለት እንክብካቤዎችን እንዴት ማስኬድ እንዳለበት እንዲለምድ ማድረግ ያስፈልጋል። አብዛኛውን ጊዜ ከሥራ ድርሻ እና መታለፍ ከሌለባቸው መስመሮች ጋር በተያያዘ ያሉት አሠራሮች የራሱን የቤተሰቡን ልጆች ጨምሮ ለሁሉም የቤተሰቡ አባላት የሚሰሩ እስከሚሆኑ ድረስ ከፍተኛ እና ትዕግስት የተሞላበት ጥረት ማድረግን ይጠይቃል።

ከከባድ የጀርባ ታሪክ የመጡ ህጻናትም እንኳን ይህን ሊማሩ ይችላሉ። ከአደራ ቤተሰብ ወላጆች እና ባለሞያዎች ትዕግስት የተሞላበት ድጋፍ ካገኙ ጠቅላይ ሚኒሰትርም ጭምር ሊሆኑ ይችላሉ።