ክፍለ ጊዜ 17/21
ገጽ 7/9 ከመልሶ ማገገሚያ ማዕከሉ የአደራ ቤተሰብ ማቅረብከመልሶ ማገገሚያ ማዕከሉ የአደራ ቤተሰብ ማቅረብ
አንዳንዶቹ የአደራ ወላጆች አስቀድመው የሚንከባከቧቸው ህጻናት ያሏቸው ሊሆኑ የሚችሉ ሲሆን አንዳንዶቹ ደግሞ አዲስ ሊሆኑ ይችላሉ። የሚከተለው ለእነሱ የቀረበ የመጀመሪያ ገለጻ ነው።
የጎዳና ህይወት ለህጻናት እንዴት ከባድ እንደሆነ እና በርካታ ህጻናት ወላጆቻቸውን ወይም ዘመዶቻቸውን ያጡ ወይም ትተው የመጡ እንደሆኑ አብራሩ። ምን ማቅረብ እንደምትችሉ ግለጹ። የአደራ አሳዳጊዎች የህጻኑ ወላጆች እንዳልሆኑ ለህጻኑ/ኗ አስረዱ። ነገር ግን ህጻኑ/ኗ እስከሚያድግ/እስከምታድግ ድረስ ፍቅር፣ ምግብ፣ ጥበቃ እና ትምህርት እንደሚሰጡት/ጧት አስረዱ። በተጨማሪም የጎዳና ጓደኞቹ/ቿ ከናፈቁት/ቋት ወደ ጎዳና ወይም በአደራ ቤቱ ውስጥ እንዲጠያየቁ ሊመቻችላቸው እንደሚችል ለህጻኑ/ኗ ንገሩ። ይህም መጥፋት እንደማይኖርበት ለህጻኑ ያሳውቀዋል። አንዲት ልጅ ሁለት ጊዜ ጠፍታ እንደሄደች እና በመጨረሻም ከአንድ ዓመት በኋላ ከአደራ አሳዳጊዎቿ ጋር ለመኖር እንደወሰነች ሁለት የአደራ አሳዳጊዎች ነግረውናል። አንድ ህጻን ምንም ያህል ድሀ ቢሆን ማህበራዊ ትስስሩን ለመተው ምን ያህል እንደሚከብደው መገንዘብ አስፈላጊ ነው።
ህጻኑ ከመወሰኑ በፊት የአደራ ቤተሰሰቡን እንዲጎበኝ አድርጉ እንዲሁም ከመጨረሻው ውሳኔ አስቀድማችሁ የሙከራ ጊዜ ስጡት። የጎዳና ተዳዳሪ ህጻናት በህይወት ውስጥ የራሳቸውን ውሳኔ (በተለምዶ ወላጆች ብቻ የሚወስኗቸውን ዓይነት ውሳኔዎች) የሚወስኑ የልጅ አዋቂዎች መሆናቸውን አስታውሱ። በዚህ ሂደት ውስጥ መረጃ በሚገባ የማግኘት እና የውሳኔ አሰጣጥ ሂደቱ አካል የመሆን መብት አላቸው።
ህጻኑን ከማነጋገራቸው በፊት እና በኋላ ሠራተኞች እና የአደራ ወላጆች ህጻኑ እና የአደራ ወላጆቹ የሚጣጣሙ ስለመሆኑ መወያየት ይችላሉ። መተማመን በጎደለው መልኩ ሰውን የመቅረብ ባህርይ ያላቸው ህጻናት 3-5 ዓመት ሳይሞላቸው በፊት የአደራ ቤተሰብ ውስጥ ከገቡ ካሳለፉት አሰቃቂ ተሞክሮ የማገገም እና መተማመን በተሞላበት መልኩ ሰውን የመቅረብ ከፍተኛ ዕድል እንደሚኖራቸው ሁሉም ሰው ሊያውቀው ይገባል። በዕድሜ ተለቅ ያሉ ወይም በአሥራዎቹ የዕድሜ ክልል ውስጥ የሚገኙ ልጆችን በተመለከተ የአደራ ወላጆች በዕድሜ ተለቅ ያሉ ልጆች በአንጻሩ ቋሚ የሆኑ ተግዳሮቶች ሊኖሩባቸው እንደሚችል እና በእንክብካቤ ላይ እያሉ ተጨማሪ ትኩረት እንደሚያስፈልጋቸው ሊያውቁ ይገባል። በተለይም ደግሞ የመጠራጠር ባህርይ የሚታይባቸው ህጻናት በአደራ ቤተሰብ ውስጥ ለማሳደግ አስቸጋሪ ሊሆኑ ይችላሉ። የአደራ ወላጆች ልምድ ባለው ሠራተኛ ወይም የስነ-ልቦና ባለመሞያ መደበኛ ቁጥጥር እንዲደረግባቸው እንመክራለን።
